Loma 16 - O Mikanda Ikola

Kumenekena ni kulekela

¹ Nga mʼ ijidisa Fibe, pangʼ ietu ia muhatu, mukalakadi mu Ngeleja ku Senkeleia.

² Phangiʼetu ia muhatu muenʼ iú mu tambululienu mua Ngana, kala kia fuama akua Ngana, mu mu kuatekesa ue, se uala ni maka ma mi bhinga enu. Kuma muene uala mukuatekexi ua athu avulu, ni eme-muène ue.

³ Menekenu Pidisila ni Akuila, akalakadi ni akuetu mua Kristu Jezú,

⁴ a bhakuile kiá jixingu jâ ene mu ku ngi kudila o muenhu uami. Nga a sakidila kiavulu muene. Ki eme ngó nga a sakidila, maji ni Jingeleja joso ja akua jixi jengi, ió ki Jijudé.

⁵ Menekenenu ue o Ngeleja iene kubhongolokela mʼ onzo iâ. Menekenenu Epêneto, mukua kazola kami, muene o kibundu kia dianga mu ku ki bhakuila Kristu mu Azia.

⁶ Menekeneu Madiia, ua ku mi kalakalela kiavulu.

⁷ Menekenênu Andoloniko ni Júnia, jindandu jami nga kexile-nâ kumoxi mu ʼaleia. Ene ala athu a ejiia kiambote kuala o Jipoxolo, ene uâ a diangele kudiela mua Kristu, eme nga xedi kuema.

⁸ Menekenenu Ampiliiato, mukua kazola kami mua Ngana.

⁹ Menekenenu Lubanu, mukalakadi ni mukuetu mua Kristu; ni Xitake mukua kazola kami.

¹⁰ Menekenenu Apele, fiiele iangene ia Kristu. Menekenenu akua dibhata dia Alixtóbulo.

¹¹ Menekenenu Helodiia, ndandu iami. Menekenenu akua dibhata dia Narsizu, oso ala jiphange mua Ngana.

¹² Menekenenu Tidifena ni Tidifoza, akua kukalakala mua Ngana. Menekenenu Pelesida, kamba diami nga mu zola, kuma muène ua kalakala kiavulu mua Ngana.

¹³ Menekenenu Lufu, mukalakadi ua dikota mua Ngana, ni manhʼ â, eme uami ngi mu ila manhʼ etu, mukonda uene ku ngi bhanga kiambote kala ngi monʼ ê.

¹⁴ Menekenenu Asinkilito, ni Felengonde, ni Herme, ni Pataloba ni Herma, ni jiphange joso jala-nâ kumoxi.

¹⁵ Menekenenu Filôloko ni Júdia, ni Neleu ni phangʼ iê ia muhatu, ni Odimpa, ni athu angene a Ngana ala kumoxi ni ene.

¹⁶ Dimenekenienu mudienu ni beju ia ujitu. Jingeleja joso ja Kristu ja mi menekena enu.

O milongi ia sukidila-ku

¹⁷ Nga mi diondo-phe, jiphange, di langienu ni enʼió oso ala kubheka o makudimuanga ni kutondalesa akuâ mu kuxikana o ulongelu uâ uengi, ki uene u mua di longo enu. Enʼiá muenda ni ku a ebha.

¹⁸ Kuma enhá, a kala kiki, kene kubhikila Kristu, Ngana ietu, maji a bhikila ngó o jihanji jâ ene. O mu kuzuela kuâ kuambote, kuatouala, ene mu kubhomba miẋima ia athu kiluua a ejiia.

¹⁹ Enu-phe o kutumaka kuenu ku mua mu tumaka o Njimbu Iambote, kua fumana ku athu oso. Kiene ki nga mu sangulukila mukonda dienu. Maji nga mi mesena mu kala mu jinjimu mu ima iambote, anga mu kala mu iximba mu ima iaiibha.

²⁰ O Nzambi, otho ia paze ietu, kindala uanda ku titidila Satana bhoxi dia inama ienu. O kiadi kia ngana ietu Jezú Kristu, ki kale ni enu oso.

²¹ Timote, mukalakadi ni mukuetu, ua mi menekena. Ni Lúsiu, ni Jasone, ni Sosipata, o Jijudé akuaʼ xi iami, a mi menekena ue.

²² Eme Tʼérsiu, nga soneka o mukanda uenʼiú, ua Phaulu, nga mi menekena mua Ngana.

²³ Ngaio, muadiakime ua ngi zalela, mukua inzo iê kunu mualù bhongolokela o Ngeleja ioso, ua mi menekena. Elasto, muingi a jimbongo ja mbonge kunu, ni Kuáluto, phangʼ ietu, a mi menekena. [

²⁴ O kiadi kia Ngana ietu Jezú Kristu, ki kale ni enu oso; Amén!]

O musambu ua suku-ku ua kuximana

²⁵ Tu ximane Nzambi! Kala ki nga mu tanga mu Njimbu Iambote i nga mu kola—o Njimbu ia tokala Jezú Kristu—kuila Nzambi ua soko-bho ku mi bhaka mu kuxikana. Kala ue ki kia tukuluka mu kijinganu kiòbhake mu kabuu mu jihama ja mivu ni mivu, tunde mu xahùlu.

²⁶ Maji mu kindalʼ iki, o kijinganuʼ okio kiòtukulule mu Mikanda ia soneka o Jipolofeta. O Nzambi ua kaiela-ku, iú ua tumu kuila a kʼijidise mu miji ioso, phala athu oso a xikane, nʼ a ki tumake.

²⁷ Kua Nzambi imoxiʼ èlele, uejiia ioso, o fuma iendela kua Jezú Kristu, i kale iê-muène katé ku hadia ni hadia. Amén!