Loma 15 - O Mikanda Ikola

Ala ni nguzu, a kuatekese a bhuila

¹ Etu-phe tuala ni nguzu mu Akuxikana, tua tokala tu kuatekesa oso a bhuila, kuambata o imbamba iâ. Kana ku kuata ku di uabhela ngó etu-ene.

² Tuendienu kala muthu ni kuuabhela mukuâ, mu ima iambote i bhekela o kutungiua mu kuxikana.

³ Mukonda ni Kristu muène ka di uabhelele ngó muène. Maji kala kia ki soneka mu Mikanda Ikôla, exi: O malebhu ma ió a ku lebhula eie, ma ngi tula ku thandu diami.

⁴ Kuma ima ioso iósokene mʼ ukulu mu Mikanda Ikôla, a i sonekena phala etu ku di longa, phala mu kinhenge, ni mu kutula o muẋima mu kutanga o Mikanda, tu kale ni kudielela.

⁵ Kala kiki, o Nzambi mukua kubhana o kinhenge ni kubhuisa o uôma, a mi bhane o kukala ni muẋima umoxi mudienu, mu kukaiela o phangu ia Jezú Kristu.

⁶ Phala mu kieniiki enu oso muenhu uenu u kale umoxi mu kuximana ni dikanu dimoxi, Nzambi, Tata ia Ngana ietu Jezú Kristu.

O Njimbu Iambote ku akua jixi jengi

⁷ Kala kiki, di tambululienu-phe mudienu, phala ki bhane fuma kua Nzambi, kala Kristu kia mi tambulula enu.

⁸ Kuma eme nga mi ambela kuila Kristu ua di bhangele mukunji ua Jijudé phala kuidikiza kuila Nzambi kene mu kualuluka, mbé o izuelu ioso ia bhele Nzambi ku Jitata a i kumbidile.

⁹ Phala ue ki bhangese akua jixi jengi, (ió ki Jijudé) kuximana Nzambi mukonda dia henda iê. Kala ki ambe mu Mikanda Ikôla, exi: Kiene kia kà ngi bhangesa ku ku tumbula mu ʼaxaxe ka akua jixi jengi, ió ki Jijudé, hé nga kʼ embila mu kuximana o dijina dié.

¹⁰ O bhuamukuâ iambe: Enu ki mu Jijudé, mu akua jixi jengi, sangulukenu kumoxi ni mundu ua Nzambi uòsole!

¹¹ O bhuamukuâ dingi, exi: Ximanenu Nzambi, enu mu akua jixi jengi, ni ifuẋi ioso i mu ximane muene kiavulu!

¹² O bhuamukuâ Izaia ue uixi: Hadia kuà keza muthu u tunda ku muiji ua Jese, muene ua kà zangalala mù tumina akua jixi jengi; o matumbu a kà mu dielela jinga muene.

¹³ O kiki Nzambi mukua ku tu bhana o kudielela, a mʼ izalese ni ngalasa ni paze, mu kuxikana ku mua mu xikana Muène, phala o kudielela kuenu kuende ni kukula dingi mu nguzu ia Nzumbi Ikôla.

O ukunji ua Phaulu ni jinjila jê ja kuenda

¹⁴ Eme uami-phe, phange jami, ngejiia kidi kuma enu muezala ni vondadi iambote, muezala ni kuijiia; uila kiki mua soko-bhu ku di longesa mudienu.

¹⁵ Mu ku mi sonekena-phe o mukanda iú, bhuala ni bhabha ngedi kala nga-bhu uôma mu ku mi ambela makʼ amoxi-mu, u nga mesena o ku mi lembalesa. Nga-bhu uôma mukonda dia kiadi kia ngi bhana Nzambi,

¹⁶ Kia ku kala ngi mukunji ua Kristu Jezú, phala kukalakalela akua jixi jengi, ió ki Jijudé. Nga di bhange kala ngi nganga ia kutula o Njimbu Iambote ia Nzambi. Nga mu bhanga kiki phala o ió ki Jijudé a di bhange sata ia xikina kuala Nzambi mu dibônzo dia Nzumbi Ikôla.

¹⁷ Ngala-phe ni kutana kuami mua Kristu Jezú, mukonda dia kikalakalu kia Ngana Nzambi.

¹⁸ Kuma ki ngi di metena ima iengi, maji ngi tanga ngó ioso ia kalakala Kristu ni eme mu kubhangesa akua jixi jengi kutumaka Nzambi. Kieniiki ngene ku ki bhanga jinga ni ku maka ni ku ikalakalu,

¹⁹ mu nguzu ia isumua ni madiuanu ni mu nguzu ia Nzumbi ia Nzambi. Mu kieniiki tunde mu Jeluzaleme ni mu jimbandu jê, katé ku Ilidiko, nga bhiti-ku ni kukola o Njimbu Iambote ia Kristu.

²⁰ Nga solo muene kukola o Njimbu Iambote, ku ididi kuoso kiluua evua-ku o dijina dia Kristu, phala ki ngile kala ngala kutungila ku disesa dia tele muthu uengi.

²¹ Kala kia ki soneka mu Mikanda Ikôla, exi: Oso ka a tudila-kiu, a ká ki mona. Oso ka kʼ ivile, a kà kʼ ijiia.

Phaulu u kana kumenekena mu Loma

²² Luavulu kiá lu ngandalele kuia ku mi kunda ku mualʼ oko, maji ki ki xikina luua.

²³ Maji o kiki-phe, kuma ku jixi kunu ki ngala-ku dingi ni kikalakalu, eme-muene ue kuma nga bhange kiá mivu iavulu ni hanji ia kuia koko ku muala phala ku mi mona,

²⁴ nga kinga ku ki bhanga kiá kindala. Kioso ki ngenda njila iami ia kuia ku Xipânha, nga mesena ngi mi mona mu kubhita, enu ue phala mu ngi xinjikile mu kuia koko, ki ngi mona kuila o vondadi ia ngi sosoloka kiá ia ku di mona ni enu.

²⁵ Kikiphe ngala kuia hanji ku Jeluzaleme, mu sedivisu ia kubhindumuna akua Ngana koko.

²⁶ Kuma o jingeleja ja akua Masedonia ni akua Akaia kia a uabhela kubhanga mukungu ua kubhindumuna jingadiama ku mundu ua akua Ngana ala mu Jeluzaleme.

²⁷ Ene-muene a solo kubhanga kieniiki. Kia a uabhela, maji kia a tokala ue o ku ki bhanga, mu kubhindumuna oso a tate. Kuma o Jijudé se a uanena akua jixi jengi o mabesá mâ ma Nzumbi, ene uâ a tokala ku a bhindumuna ni ima iâ ia mabesá ma xitu.

²⁸ Kioso ki ngi zubha-phe o kubhanga kikalaklu kiki, ni kubhana o ujitu ua mukungu uoso ua kungu athu phala ene, ngi mi somboka mu kuia ku Xipânia, o mu kubhita kiene ki nga kà mi kunda.

²⁹ Eme nga kʼijiia ue kuma, ki ngiia, nga kà mi sanga ni dibesá dia tenena dia Kristu.

³⁰ Kiki-phe, nga mi diondo, enu jiphange mua Ngana Jezú Kristu, ni mu henda ia mi bhana o Nzumbi, mu bangâma ni eme kumoxi, mu ngi kuatekese mu kusamba kua Nzambi, mukonda diami eme.

³¹ Sambenu phala eme ngi bhulake kua ió a kambe kuxikana ala mu Judeia, ni mukungu u ngala kuia na-u a u tambule ni ujitu kuala akua Ngana momo.

³² Phala hadia nga kà mi sange ni ngalasa, mu vondadi ia Nzambi; nga kà nhohe-ku hanji ni enu.

³³ O Nzambi, otho ia paze ietu, a kale kiá ni enu oso. Amén.