Juda 1 - O Mikanda Ikola

Umenekenu

¹ Eme Juda, mubhika ua Jezú Kristu, phange ia Tiiaku, nga sonekena ió oso a exana kuata Nzambi, ata mu henda ia Nzambi Tata, ia ata ku a tanga kuata Jezú Kristu.

² Nzambi a mi lendukile dingi kinéne, o paze iê ni henda ia mi kuatela i vule dingi ku thandu dienu.

Jimesene ja makutu

³ Enu akuetu, nga mi zola, kioso ki nga tele o muẋima mu ku mi sonekena o maka ma kubhuluka kuetu etu-ene-oso, kua ngiza kibhidi kia ku mi sonekena mu ku mi suinisa mu kuzokela o kixikanu kia bhana Nzambi, tunde ukulu ku akua Ngana.

⁴ Kuma sai-ku athu a kambe o kuxikana, a mi zombela mudienu ni ku dʼimbikisa, ene tunde ukulu a a xindi o kuêla, athu abhumu, o kiadi kia Nzambi ietu a ki kitula uhabhu, o Mesene ietu imoxi, ni Ngana Jezú Kristu, a ditunu-nê.

⁵ Nga bhindamena ku mi lembalesa kuila, sumbala ima ioso mua ijiia ukulu, kuma Ngana kia bhuluile o mundu uê mʼ oxi ia Ijitu, o ku pholo ku eza kunu ua a buikisa, oso a kambele o kuxikana.

⁶ Xinganekenu ue kuila ni ji-anju ja kambele kubhaka o ukota uâ, ja xi o kididi kia a tokala, Nzambi ua ji kuika bhoxi dia usuku, ku malubhambu ma kolela-ku katé bhu kufundisa kua Kizuua kiná kia dikota.

⁷ Lembalalenu ue akua Sodoma ni Ngomola, ni jimbanza ja zukamene na-ju, kioso kia bhange uila kia bhangele o ji-anjuʼ ojo, a kala mù di ehelela ku undumbu, a kala mù balukila ʼxitu jengi. Enʼ iá a a tubhula kuma a kale kijimbuete, ni kuxixima mu tubhia ki tu xikina kujima.

⁸ Kiene kimoxi, hanji athu enʼ iá mu jinzoji jâ a kala mù bhanga ufusa ua xitu. A di tuna ku a tumina kuala Nzambi, o jingana ja diulu a ji xinga.

⁹ Sumbala né Mingedi-phe, kota dia jianju ka tenene kubhanga kiokio. Kuma kia di kuatele ni Diabhu o phata ia kumona uoso u xala ni mukutu ua Mozé, Mingedi ka bhuminine ku lebhula Diabhu, inda uixi-phe ngó: Ngana a ku bazele.

¹⁰ Maji athu enʼ iá-phe o ima ka ʼijiia a i lebhula. O ima-phe i ejiia mu mikutu iâ, mukuâ ni iama, ki i moneka kilunji, iene ima iâ di bolêsa na-iu phala kusenguluka kuâ.

¹¹ Lamba diâ! Kuma a kaiela mu njila ia Kaini! Mukonda dia luimbi lua kitadi, a texikila mu kutondala kua Balamu, ua bhindamenéne o nganhu! A buikila mu kuxibhaka kala Kola kia xibhakele iú ua buika.

¹² Enʼ iâ a di bhanga dilebhu phala enu, ki mu kala kudia-nâ mu fesa jenu ja ukamba, ni kukodiua kuâ ku kuatesa jisonhi. A kala mu ku di dikila, ni kudisuua ngó ene. Edi kala matuta ma kambe menha, ma phephuluka ni kitembu, ki ma bhana mvula ia kima. A di bhange mixi ia tokoka o kuima, né bhu mvula ia kudinji, ki i moneka kibundu. A di fuangana mixi iòvuze ni jindanji, ia fuila-ku kiá muene.

¹³ Edi kala mabhuku ma musanza ua kalunga, ma temanana, ma thuthuma kifulu kia ibhangelu ia jisonhi. A sokela ni jithethembua ja jimbila o njila, ja lungu mu usuku ua ji xikamena, ua ji iudikila Nzambi, uedi ni uene bui, ki uene dingi kukia katé ku hádia ni hádia.

¹⁴ Enoko, muène sambuadi mu ku di vuala tundé kua Adá, ua a tange enʼ iâ mu upolofeta tundé mu ukulu munhá, uixi: Talesenu! Ngana hádia uiza ni makuinhi a jimidi ja akunjiʼê a ngene,

¹⁵ mu kufundisa athu oso. Uà keza mu kuêlesa athu oso abhumu, a kambe kuxikana, mukonda dia imbamba iâ ioso ia kubhukumuka ia bhumina kubhanga, ni malebhu moso akua ituxi abhumu enhâ a ẋonguena jinga na-u Nzambi!

¹⁶ Athu kala iá, akua kudizumina jinga ni kulongolola ni kufunda, enda kioso kia a tumu o jihânji, a kala ni dikanu dia ku di kaka, a kala ni kathombo kʼ athu mbebhu o kunganhala.

Matendelelu ni jikoseliu

¹⁷ Maji enu-phe akuetu, mu makamba mami, xinganekenu maka ma diangele kutanga o jipoxolo ja Ngana ietu Jezú Kristu.

¹⁸ Ene a mi ambela, exi: Mu izuua i sukidilà-ku, hinu kua kà kala jisemenhi jenda ni ku mi bhanga kasekelu, athu enda kioso kia a tumu jihânji jâ ja kubhuma.

¹⁹ Enha ene a bheka o ku di muanga, ezala mu jihânji ja a vuala na-ju, a sokela ni iama, o Nzumbi ia Nzambi kala-nê.

²⁰ Maji enu-phe, akuetu, nga mi zola, suinenu ni kuia dingi ku pholo mu kuxikana kuenu ku muala na-ku, kuma kiene o kixikanu kikôla ki mua kuata. Muila ni kusamba jinga mu nguzu ia Nzumbi Ikôla.

²¹ Phala mu suine ni ku di bhaka mu henda ia Nzambi, ni kukinga o kulenduka kua Ngana ietu Jezú Kristu katé kia mi bhana o muenhu ki uábhua.

²² Oso a kala ni jiphata, mu a kuatela henda.

²³ Amukuá mu a bhulula ni ku a nhangumuna mu tubhia. Amukuá mu a kuatela muene henda. Xi, amoximu-phe mu a lendukila ni uoma, maji mu kuzemba o ituxi, katé ni izuatu iâ ia kuata o maxaka ma jivondadi jâ, ja iibha lengenu-iu.

Musambu ua diximanu

²⁴ O kiki Nzambi ió ua tena ku mi fudisa ku-di-bhukana ni mu di bhale, ua tena ku mi bhixidisa bhu pholo ia kubenha kuê ni kusanguluka, sé ngó kisemu,

²⁵ muène Nzambi imoxi ngó, Mubhuludi uetu a mu bhele fuma kua Jezú Kristu Ngana ietu, ni kujînga, ni kutumina, ni kusuina, tundé kuema dia kukala, ni kiki, katé ni ku hádia ni hádia.