Jouele 1 - O Mikanda Ikola

Kiaula mukonda dia kabôtua ni ku kamba mvula

¹ Kizuelu kia Jihova kiótumikise kua Jouele monʼa Petuuele.

² O kiki ivuenu-kiu enuʼoso mua kuka kiá! Ividilenu enuʼoso mua tungu mu ngongo! Kiki kia bhiti mu izuua ienu? inga ni mu izuua ia jitata jenu ue?

³ O kienhiki tangelenu-kiu anʼenu; o anʼenu a ki tangele ue anʼâ, o iá ua ku muiji ua mukuá!

⁴ O kia subhuka ku jithothola, kia diua ku kihoho, kia subhuka ku kihoho kia diua ku kabôtua, kia subhuka ku kabôtua kia diua ku kajeja.

⁵ Tonenu, enu mu jihôlua, mu dile; kemenu, enuʼoso mu akua kúnua vinhu, mukonda dia vinhu ia uisu; kuma vinhu mu kanu dienu a i katula-mu.

⁶ Mbata mʼoxi ietu mua tomboloka muiji uengi, ua nguzu, o kuvula kuê ki u xikina ku u tanga; u kala ni mazu kala mazu a hoji, o jinganzuánzua jala na-ju mukuâ ni hoji ia ndumbe ia kuka.

⁷ Mivide iami a i sengulula, miẋi iami ia jifiku ka i xi ni ibalabala; ioso muene a i zula ia a i takuila bhoxi; thangu ja indemvuna ja phenzuluka.

⁸ Iú dila mukuâ ni kilumba kia muzeletete kia di kutu ni kidinhaji, mukonda dia diiala diê dia unzangala.

⁹ Mʼonzo ia Jihova o jisata ja makudia ni makunua ja batuka-mu; akuetu jinganga, o jingunza ja Jihova, lamba dia a kuata.

¹⁰ Mikáu iòsengulule, oxi ia di suuata; kuma tiliku ia buika, mivide ia kukuta, o maji a kambe.

¹¹ Ni idimakaji sonhi ja a kuata, akua mivide a di kumuna, kingumba tiliku ni sevada; mbata ima ioso ia kingile ku muna mu mábhia, ia di boto.

¹² Mivide ia kukuta, mifiku ia lela, iaxoueta; mulomela ue kiene, kumoxi ni diie ni masiiela; miẋi ioso mu míkáu ia kukuta, ni muʼaxaxe kʼanʼathu ue kusanguluka kua kukuta-mu, kua lengela dikanga.

¹³ Enu mu jinganga di kutienu bhu inhonga, mu te jingololo; di kumunienu, enu mu akunji a kalatódio, bokonenu, bhitenu enu mu akunji a Nzambi iami, o usuku uoso mu zuata kidinhaji; kuma o mibhaku ia makúdia ni ia makúnua a i batula mʼonzo ia Jihova Nzambi ienu.

¹⁴ Bhu kale kujila ku kôla, bhu kale ku kola kizuua kia kionge, bhongololenu ikulakaji ni oso a tungu mu ngongo, eze mʼonzo ia Jihova Nzambi ienu, mu di kole kua Jihova.

¹⁵ Uaué! Kizuuʼokio, tata! Kuma kizuua kia Jihova kia zukama! Kiene kia kèza mukuâ ni disengulukilu di tunda kua Muteni-a-Ioso.

¹⁶ Makúdia, bhu mesuʼetu manhi ka batuka-bhu? Ni kusanguluka ni kutana ue mʼonzo ia Nzambi ietu ki ku batuka-mu?

¹⁷ Jimbutu ja bolela koxi dia mavu, inganja ia xala itutu ia hatu, itula iòmuange, mukonda tiliku ia kukuta.

¹⁸ Uívua ibhaku ki idikola! Ibhanga ia jingombe ia tandanganha kuma ki ia mono sabhelela ia kúdia; katé ni ilunga ia jimbudi ue ia jimi mbutu!

¹⁹ Jihova, ngi dikola kokué, kuma sabhelela mu ixi ia kisekele o túbhia tua i lese-mu, o milengu ia jikinisa miẋi ioso mu mikáu.

²⁰ Iama ioso ue mu mikáu i dikola kokué, kuma jingiji ja kukuta; o túbhia tua zubha o sabhelela ioso mu ixi ia kisekele.