Josuué 8 - O Mikanda Ikola

Mbonge ia Hai a i solomokena dingi

¹ Jihova anga uambela Josuué, uixi: Kana kukala ni uoma, kana kubhuuama. Katula makuenze oso a ita, u bande-nâ ku Hai; tala-ze, ni sobha ia Hai ni kifuẋi kiê, ni mbonge iê ni ixi, iene ioso nga i bhakula bhu makuʼé.

² Ni Hai ni sobha iê, ua kà a bhanga kala ki ua bhànga Jedikó ni sobha iê; Inda o kiki-phe imbamba iê i mua-nda kubhûnda-mu, ni ibhaku iê, i kale kiá mbole ienu, mu i tambula kiá enʼuenu. U tuma athu kubatamena ku dima dia mbonge.

³ Kala kiki, Josuué anga u balumuka, ni makuenze a ita oso, mu kubanda ku Hai, Josuué angʼu tungula-bhu makuinhi atatu a hulukaji ia mala, indànda ioso, u a sulula mu usuku.

⁴ Anga u a tuma, uixi: Enu-phe mu bhita ku dima dia mbonge, mu i batamena koko; ki muie dikanga; o ku mua batamena mu di lunga muene.

⁵ Eme-phe, ni kifuẋi kioso ki ngala na-kiu, tu zukama muene ku mbonge ku mbandu kunu. Mu kuiza-ku-phe, ene kia-nda kutunda mu ku tu kaia, kala kia diangele kubhanga, etu tuila kala tua-nda kulenga.

⁶ Enu mu a eha muene. Ene-phe a-nda kutunda mu ku tu kaia; etu mu kubhanga kiki, kifua tua a sunga katé mu mbonge abhu-mu. Kuma a-nda kuila: Kaienu, ala ku tu lenga dingi; etu-phe tuila muene kala tuala kulenga.

⁷ Bhenhobho enu-phe muila mu ki mona, mu balumuka bhu kididi bhuoso bhu mua batamena, mu a bhingane mu mbonge, mu i tambule kuma Jihova ua-nda ku mi bhana-iu bhu maku menu.

⁸ Mbonge-phe hé mua i kuata, mu i ta túbhia; kabasa kizuelu kia tundu kua Jihova, kiene ki mu kaiela; alukenu-phe, eme nga mi tumuʼó.

⁹ Josuué anga u a sulula; ene enda usuku, anga a batamena bhu kaẋi ka Betele ni Hai, ku mbandu ia Hai ia luiji; usuku uoso uenhó-phe, Josuué ua mu bhuila mu kaẋi ka kifuẋi.

¹⁰ Josuué anga u balumuka mu kimene-mene, u bhongolola o kifuẋi, u a alula anga a banda ni muene ni adiakimi a Izalaiele, a di te ku pholo mu kuia ku Hai.

¹¹ Makuenze a ita aia-nê, anga a banda, a zukama ku Hai. Anga a ta kibangu ku mbandu ia Hai ia ku suku, bhu kaẋi ka ene ni Hai bhua bhiti dikôlo.

¹² Anga u katula kibuka ki tokala midi jitanu, u a sueka, mu kubatamena, bhu kaẋi ka Betele ni Hai, ku mbandu ia mbonge ku luiji.

¹³ Kala kiki kifuẋi kioso a a te mu ididi, ni kifuẋi kiala ku mbandu ia suku ia mbonge, ni iá a batamena ku luiji dia mbonge. Josuué anga u tuluka mu dikôlo usuku uenhó.

¹⁴ Kia zubha kubhanga kiki, sobha ia Hai u ki mona, anga a di meneka, akua mbonge, a tunda lusolo mu kúlua ni Izalaiele, ni muene sobha ni kifuẋi kiê kioso, bhu kithangana kiene kia xindi, ku sámbua dia dikôlo. Muene-phe ka kʼijiia kuila sai-ku dingi athu a mu batamena ku dima dia mbonge.

¹⁵ Josuué ni Izalaiele ioso a di bhangesa kala a a te kuala jinguma, a lengela njila ia kuia mu kikangalakata.

¹⁶ Ni ku ta mitendu ia makota, athu oso-phe ala mu mbonge anga a a kasa, mu kukaia iá a fikisa kulenga; anga aia ni kukaia Josuué, mu mbonge mua xala ngó.

¹⁷ Né ngó diiala ka xala-mu mu Hai ni mu Betele, ua kambe kuia mu kukaia Izalaiele; mbonge ia xala ia jikuka, ene oso eza ni kukaia Izalaiele.

¹⁸ Jihova anga uambela Josuué, uixi: Sunununa ditoma di ua kuata bhu lukuaku, u di lungise ku Hai; kuma ngi ku bhana kiá bhu maku o mbonge iê. Josuué anga u sunununa ditoma dia kuata bhu lukuaku, u di lungisa mu mbonge.

¹⁹ Bhenhobho, a suama anga a balumuka ni lusolo, bhu kididi bhuoso bhua batamenene, edi a mu mona ua sunununa lukuaku, a lenga hé a bhingana mu mbonge, a i tambula; kindala anga a i ta mu túbhia.

²⁰ Akua Hai kiedi a sakuka kuema, dibhata diâ diala kutuka dixi, o dixi diê diala kubanda ku diulu, ni kua ku lengela dingi ka mono-ko; kifuẋi kia di bhangesele kulengela mu kikangalakata, anga ki lunguluka mu kubhânga ni iá a kexi ku a kaia.

²¹ Kuma Josuué ni Izalaiele ioso, kia zubha kumona akuâ a suamene abhingana kiá mu mbonge, dixi diê di banda, a lungulukila kiá akua Hai, hé a kuata ku a jibha-jibha.

²² Ió ue a tunda mu mbonge a a kondela kuema; kifua Izalaiele ua a te mukonda, akua Hai ala mu kaẋi; anga a a nemeka, ki bhuala muthu ua subhuka, ki kuala ua lenge.

²³ Sobha ia Hai-phe a mu kuata ni muenhu uê, a mu bheka kua Josuué.

²⁴ O kiedi akua Izalaiele a zubha kiá kujibha akua Hai oso ala ku mukáu, ni iá a lengela mu kikangalakata aia ni ku a kaia, katé ene oso a a buidisa muene ku mazu a xibhata, buí; Izalaiele ioso a vutuka mu mbonge ia Hai, oso ala-mu a a buidisa ue ku mazu a xibhata.

²⁵ Ene oso-phe a buila kizuua kienhókio, ni mala ni ahatu, kuinhi dia midi ni midi jiiadi, akua Hai ene oso.

²⁶ Kuma Josuué hanji kia sunununa lukuaku lua kuata ditoma, nguê ku lu sunga katé kia buidisa akua Hai ene oso.

²⁷ Akua Izalaiele-phe anga a bhûnda ibhaku, ni ima ia ku di bongela mu mbonge ioio, anga i kala mbole iâ, ia tambula ene, kuma kiene kizuelu kia Jihova kia tumu kua Josuué.

²⁸ Josuué anga uoha Hai ni túbhia, u i bula katé ki ia di bhange dixita, ia xala ngó o kibhela kiê katé mu kizuua kia lelu.

²⁹ Sobha ia Hai anga u mu nhenga mu muẋi, katé mu kumbi dia ngoloxi. Kia tula dikumbi-phe, Josuué u tuma kukatula kimbi kiê mu muẋi, nʼa ki texi bhu muelu ua kimbaka kiê, anga a ta ndumba ia matadi ku thandu diê, í ia xalela katé mu kizuua kia lelu.

O Kitumu a ki lembalesa dingi ku Mulundu ua Ebale

³⁰ Josuué anga u tunga kalatódio ka Jihova, Nzambi ia Izalaiele, mu mulundu ua Ebale,

³¹ kala Mozé mukalakadi ua Jihova, kia tumu anʼa Izalaiele, kala kia ki soneka ue mu divulu dia ngonge ia Mozé, kuila, kalatódio ka kala ka matadi, a bundungulu, kana muthu luua ua bhitisa-ku felu ioso-ioso; anga a satela-ku kua Jihova, ni jisata ja kuoha, ni jisata ja uembu.

³² Anga u soneka-ku, ku matadi, maka ma ngonge ia soneka Mozé, ia sonekena bhu pholo ia anʼa Izalaiele.

³³ Izalaiele ioso-phe, ni adiakimi, ni jithuame, ni afundixi, emana ku mbandu ni mbandu ia álaka, bhu pholo ia jinganga ni jilevita ambata álaka ia kikutu kia Jihova, ni jinzuángiza ni iá a a vualela mʼonzo, ku bhata; mbandu iê emana mu mulundu ua Ngedizini, mbandu ia mukuá emana mu mulundu ua Ebale; kala Mozé mukalakadi ua Jihova kia tumu mʼokulu, ni a bhane nzediuise ku kifuẋi kia Izalaiele.

³⁴ O kia zubha kubhanga kiki, u tanga maka oso a ngonge, ni kizediuise ni mázui, kala kia a soneka mu divulu dia ngonge.

³⁵ Josuué ka xi-ku kizuelu kia kima, ku ima ioso ia tendelela Mozé, nʼa kambe ku ki tanga bhu mesuʼa kionge kioso kia Izalaiele, ni ahatu iá bhobho, ni anandenge, ni jinzuángiza, o idijila eza kutunga muʼaxaxi kâ.