Josuué 16 - O Mikanda Ikola

Ma-ubhinganu ma anʼa Zuze. Ubhinganu ua Ifalaime

¹ Kua tundu kiuua o hasa iamukuá iabuila anʼa Zuze, tunde kiá ku Njolodá bhu dikaẋi dia Jedikó, honga iâ ienhoio, ni mu thunda (ku mutundila-kumbi), mu kubanda ni kikangalakata kia Jedikó mu ku di tela ku milundu ia Betele;

² mbambe ibhitila ku Betele anga iʼjiia mu Luze, ii ku jimbambe ja Alaki, katé mu Atalote;

³ anga i kulumukina ku luiji ku mbambe ia Jafete, katé mua suku Mbetolone, hé iia mu luiji, i somboluela ku Ngazele, matundilu mê o musanza ua kalunga.

⁴ Anʼa Zuze, Manasa ni Ifalaíme, kienhiki kia tambula o undundu uâ.

⁵ O mbambe-phe ia anʼa Ifalaime, ku majiku-majiku, mu ku a uanuina o ubhinganu uâ, ienhiʼii: Ku thunda, mbambe iâ Atalote-Dale katé ku Mbetolone ia thunda;

⁶ anga mbambe iii ilungila ku luiji anga ituta ku Makemeta, kuenhoko-phe iia katé kiá ku mbambe ia kusuku, anga ialukila dingi mu thunda i lunga ku mutundila-lumbi katé ku Tanate-Silu, anga i somboluela, i bhita mu thunda ia Janoua;

⁷ anga i kulumuka tundé mu Janoua, ii mu Atalote ni mu Nahalate, hé i tuta Jedikó bhobho, ni mu Njolodá tulé.

⁸ Ku mbandu ia mutudila-kumbi-phe, mbambe ii i tunda dingi mu Tapuua anga iia ku luiji ku kahonga ka Kana, katé bhua kutukila kahongʼaka mu Kalunga. Iú uene o ubhinganu ua kibuka kia anʼa Ifalaíme, ku majiku-majiku mâ.

⁹ Sai dingi jisanzala-phe ja uanuna-ku phale anʼa Ifalaíme ja kexe mu kaẋi ka ubhinganu ua anʼa Manasa; sanzala jene josuʼojo muene ni tumadiembu tuâ.

¹⁰ O Makanana-phe a tungile mu Ngezele ka a muangene-mu; kienhókio, Makanana-phe enhó katé kizuua kia lelu axalela muʼaxaxi ka akua Ifalaíme; maji-phe enda ni ku a bhikila, ni ku a bhana lubhaku.