Jona 3 - O Mikanda Ikola

Jona u longa mu Ninive

¹ Anga dízui dia Ngana diza lua kaiadi kua Jona, uixi:

² Balumuka, uie mu mbanza iadikota ia Ninive, u boke njimbu ioso i ngi ku tuma.

³ Jona anga u balumuka, hé uia mu Ninive, kala kia zuela Jihova; Ninve-phe ia kexi mbanza iadikota, ku i enda kanga diê dia izuua itatu.

⁴ Jona anga u mateka kubokona mu mbanza, uende hanji ngó dikanga dia kizuua kimoxi, hé u boka, uixi: Kua kambe ngó makuinhi a uana a kizuua, Ninive a-nda ku mu sengulula, u jima mbutu.

⁵ Akua Ninive anga a xikana Nzambi; anga a kola ngonge ia kujila, hé a zuata jisaku ja kidinhaji, tunde ku dikota katé ku ndenge.

⁶ Njimbu iii ia bhiẋila kua sobha ia Ninive, muene hé u balumuka ku kiandu kiê kia ungana, u zula izuatu iê ku mukutu, u zuata saku, anga u xikama mu utôkua.

⁷ Anga u tubhula ngonge, anga a bhana jingolokela mu Ninive, kia tumu sobha ni makota mê, kuila: Né athu, né ibhaku, né jingombe, né jimbudi ka lole kima, ibhaku, ka i bhane iangu, né ngó kúnua menha.

⁸ Maji o athu ni ibhaku a di kuta jisaku; hé a dikola ni nguzu kua Ngana Nzambi, a diele, kala muthu ku njila iê ia bhengalala, ni ku ikuma ia maku mê.

⁹ Nanhi ua kʼijiia, se Nzambi u lunguluka, hé u diela ku ioso ia mesena ku tu bhanga, anga u sondolola kutema kua njinda iê, phala ki tu jime mbutu?

¹⁰ Kienhókio Ngana Nzambi anga u mona ikalakalu iâ, ni kioso kia diela ku jinjila jâ ja ku bhengalala. Ngana Nzambi anga u lunguluka, u bhomba muẋima uê, o kiaiibha kia tangele ku a bhanga ka a bhange-kiu dingi.