Jona 1 - O Mikanda Ikola

Kixanu kia Jona, o kulenga kuê ni kaxtiku kê

¹ Dízui dia Ngana dieza kua Jona, Monʼa Amitai kuila:

² Balumuka, u-ie mu mbanza ia dikota ia Ninive, u kole njimbu ia kibuika kiê, mukonda ituxi iê ia bande kunu, ia ngi bhiẋila.

³ Jona anga u balumuka phala kulengela ku Talxixi, mukonda dia Ngana; kia kulumuka ku Jope, u sanga-ku naviiu iala kuia ku Talxixi, u futa muômbo uê, anga u di longa momo phala kuia ku Talxixi mukonda dia kulenga pholo ia Ngana.

⁴ Maji o Ngana u tuma kitembu kia dikota kubhuka mu kalunga, hé mu dibhanga kibhungu kionéne, naviiu anga inda i budika.

⁵ Kienʼokio atabhuidi ezala ni uoma uavulu, anga a samba kala muthu kua nzambi iê, kala muthu kua nzambi ié, imbamba ioso iala mu naviiu anga a i takula mu kalunga, phala kusosolola o kinemenu mu naviiu. Jona-phe ua di kuzula mu kaẋi ka naviiu ku hole iê, iu ua zeka; hé u di ta ku kilu muene kia muioko-ioko.

⁶ Ua mu tumina o naviiu-phe, u bhiẋila bhu mbandu iê, hé u mu ambela uixi: Na Kakilu, ihi ia ku kuata? Ua zekela-hi kiki? Balumuka, u sambele Nzambi ié, sumba Nzambi u tu lembalala phala ki tu di bote muʼalunga.

⁷ Anga a di ambela kala muthu mu diâ exi: Zenu, tu tienu jisorte, phala tu ijiie se mukuaʼhi ua tu bhekela uíndua uosʼú. Hé a ta jisorte, o Sorte ia buila kua Jona.

⁸ Kienʼokio a mu ambela exi: Eie tu tangele kindala se uíndua iú ua tu ijila bhebhi. Ufunu ué, uahi? Ua tundu ue kuebhi? Ixi ié iahi? Eiʼmuene u mukʼuahi? Muiji uenu kuebhi ku ua tokala?

⁹ O muene u a tangela uixi: Eme ngi Hebeleu, ngene mu kubheza Jihova, o Nzambi ia diulu, ua bhanga musanza ua kalunga nʼoxi ia kukuta.

¹⁰ Kienhokio mala iá a kala ni uôma uavulu, hé a mu ambela, exi: Eie phala-hi ua bhange kiki? Mbata a kʼijiia kuma muene uala kulenga Ngana, kuma muene ua a lomboluela-kiu.

¹¹ Anga a mu ambela exi: Tu ku bhanga-phe kiê, phala o kalunga ka tululuke, mukonda ka teme, menha ala kuditudijika dingi kiavulu.

¹² Muene anga ua ambela uixi: Ngi zangudienu; mu ngi takule mu kalunga, kalunga ka-nda kutululukʼê; mbata eme ngejiia kuma mukonda diami, kiene ki kua miʼijila kibhungu kia dikota kiki.

¹³ Suke-phe mala a kuata kutabhula ni nguzu, a di suinisa muene kutala se a zaúka ku sámbua, maji ka tena; mukonda kalunga ka di vunzulula, ka a tatesa kiavulu.

¹⁴ Anga a samba kua Ngana, exi: U Jihova, etu tua ku diondo, ki tu di bote mukonda dia muenhu ua diiala didi, o manhinga mê ka kale kikuma kiza ku thandu dietu, kuma eie Jihova ua bhange kioso kia ku uabhela ki ua solo kubhanga.

¹⁵ Hé a zangula Jona, a mu mvunduna mu kalunga, njinda ia kalunga anga i sosoloka.

¹⁶ Mala enhá-phe a kala ni uoma ua Ngana, uoma uavulu muene; anga a bhana jisata kua Jihova, hé a mu tela jihâsa.

¹⁷ Jihova-phe ua iudika kiá kuila bhu kale mbiji iadikota phala kuminha Jona; anga Jona u bhanga makumbi atatu ni mausuku atatu mu mala dia mbiji.