Jobe 9 - O Mikanda Ikola

Jobe u ki tanga kuila Nzambi ua lungu, anga u bhinga kunhoha ku lamba diê

¹ Kienhókio Jobe u vutula, uixi:

² Kutanga o kidi, eme ue nga kʼijiia kuila kiene muene: Mukonda muthu u di lungisa kiebhi kua Nzambi?

³ O muthu kiandala kuila u zoka-nê, ka tena ku vutula ngó kima kimoxi ku midi ia ima ia Nzambi.

⁴ Muene njimu ia muẋima, munéne mu kusuina; nanhi muene u zoka-nê mba úlua-nê nʼa kalʼé ni kutululuka?

⁵ Muene, muene ngó u tena kusondolola o milundu, sè athu ku kʼijiia, muene ue u tena ku i vutula kuema, ki mu kuata o kutema kuê.

⁶ Muene u tena kusondolola o mavu bhu kididi kiê, anga ngunji jê ji tunguta muène.

⁷ Muene u zuelela o dikumbi, o diene hé di lémbua kutunda; o jithéthembua u ji ta kidimbu.

⁸ Muene ubheka uê ua zale o diulu, anga uendela ku thandu dia kalunga kazongo.

⁹ Muene ua bhange jithéthembua ja Kitôto ni Udiiono ni ja Ndumbe ia ngombe ni ididi ia di takula makanga ku sulu;

¹⁰ Uene mu bhanga ima ia makota ki i xikina ku i tongolola, ni isuma ikolakola ki i ẋikina ku i tanga.

¹¹ Tala, muene u ngi bhitʼê muene bhu pholo iami, maji ngi tokoka ku mu mona. U ngi bhitʼê dingi lua mukuá, maji ngi lémbua ku mu ivua.

¹² Muene kia kuata o mbole, nanhi u mu fudisa? Nanhi muene, u muʼila: Ua mu bhangaʼhi?

¹³ Nzambi ka kà fudisa kutema kuê o akuatekexi a di zangeleka a kà bhetamena muene bhoxi.

¹⁴ Kuambe dingi eme, ngi tena ku mu vutuila, mba ku sola-maka a kufunda ni muene?

¹⁵ Kua muene, né-mbe hanji eme ngala ni kulúnga, ki ngejʼu tena ku mu vutuila; inda ngi bhinga ku ngi kuatela henda kua Mufundixi uami.

¹⁶ Né-mbe hanji nga muʼixanene hé u ngʼitaia, ki kiene ue kiejʼu ngi bhekesa kuxikana kuila muene u bhana mátui ku dízui diami.

¹⁷ Kuma ua ngi sasujula ni kibhungu kiê, o italakanha iami ua i sokolola, o mulonga u nga te ki u moneka.

¹⁸ Ni kubhuima ngó ka ngʼehela-ku, inda ua ngi kumisa ni kulula kuoso.

¹⁹ Se tu tanga nguzu ia dizonda, Muene, uila: Emʼiú. Se mu kufundisa kua kidi, nanhi ua kà ngi xitala ni muene?

²⁰ Né-mbe eme ngiia ngixi nga lunguʼami, hanji dikanu diami diene dia kà ngi belesa; né-mbe ngedi muene phophotʼó, Muene hanji a kà ngi mona kuma ngi mukua mulonga.

²¹ Eme sumbala ngi muthu ua kuiuka, o nzumbi iami-phe ki i ngi kuatela kima; o muenhu uami ki ngi u suu.

²² Kokuami iene ioso ia sokoʼé, kiene ki ngedila, ngixi: Muene u buikisa ni muthu uambote ni kisuéia.

²³ Se bhu kala kibuika ki jibha mu lusolo, muene uolela kia mona muthu ua iuka ua bhondalala.

²⁴ Ngongo a i bhakula bhu maku a isuéia; o afundixiʼé Nzambi u a vunga o pholo; se ki muene-phe ua bhange kiki, tuila mukuaʼhi?

²⁵ O izuua iami ia beta kuenda lusolo, o mukua kuambata o mikanda ndenge; ia lenge muene, kubhanduluka ni kuzediua nuka ngó a ku muene.

²⁶ Ia bhiti kala jinaviiu ja kitembu mu kalunga; mukua ni holokoko ki i dioueka anga i tuluka mu ku kuata o mbole.

²⁷ Se ngʼamba, ngixi: Kuditenda kuami ngi ku jimba hanji, o pholo iami ia luuala ngi i lungulula, anga ngi kala mu kutana,

²⁸ né kienhókio, misusu iami ioso hanji i ngi bhekela uoma, mukonda nga kijiia kuma Muene ka-nda kuila uixi, ki ngi moneka mulonga.

²⁹ Se eme-muène ngi mukua ituxi kiá, o kiki-phe ngi kalakaleleʼhi ngó mu kingoho?

³⁰ Né-mbe ngi di sukula ni menha a kikulakaji, o neve, maku hé ngʼa zelesa ni nzabá;

³¹ né kienhókio, eie u ngi kuzula mu malôua, ni izuatu iamiʼeme-muène ia kà ng ibhila.

³² Mukonda muene Nzambi ki muth kala eme, kuila eme ngi mu vutuila, ni tuijila kumoxi mu kufunda.

³³ Bhu kaẋi ketu ki bhuala mutumini, u ta lukuaku kokuetu tu kiiadi, mu ku tu muangununa.

³⁴ Mbangala iê a i katule ku thandu diami, o kimbulambula kiê ki ki ngi kuatese uoma.

³⁵ Bhenhobho-phe ngi zuela, ki ngi kala dingi ni uoma; o kiela kana, kuabhu-phe, kʼeme dingi ngala-na-kiu.