Jobe 8 - O Mikanda Ikola

Bidade u vutula maka a Jobe hé u lungisa Nzambi

¹ Bhenhobho Bidade, musuuita, u vutula anga u zuela, uixi:

² Katé bhebhi bhu ua-nda kusuka ni kuzuela ima iii? Ua-nda kusuka bhebhi ni kulundulula ima ni dikanu dié kala kitembu kia suína?

³ Mbebhu Nzambi uene mu kubhengeleka ima ia iuka? O Muteni-a-Ioso mu kufundisa u bhengeleka?

⁴ Eie Jobe, se anʼé a te kituxi kua muene, muene ue ua a takuila bhu lukuaku lua kutondala kuâ.

⁵ Maji eie se u di meneka mu ku sota Nzambi, anga u dionda o henda kua Muteni-a-Ioso,

⁶ se u zela anga u kala ni kidi ku muxima, Muene ue ka-nda kunanga ku balumuka mu ku ku zokela, anga kididi kié kia kutunga ni kusoma u ki kuatesa ni kulúnga.

⁷ Ditala dié dia dianga, ku tanga kidi, dia kexile diòfele, maji di sukidila-ku di kala diònene muene.

⁸ Kuma eme nga ku diondo, ibhula hanji o miji iòkulukulu, nda uibbule muene ima ia bhiti na-iu o jitata jâ.

⁹ Mukonda etu tu anʼa mazá, ki tuijiia kima; mbata o izuua ietu mu ngongo mukuá ni kizúzumbia ngó.

¹⁰ Manhi jitata ki ja-nda ku ku longa? A kamba ku ku zuelela? Mu kuijiia kua mixima iâ, ka-nda ku ku tela ue maka eneʼá?

¹¹ Mbé dibu di sabhuka bhua kambe o maloua? Mba jimbamba ji kula bhua kambe o menha?

¹² Ki ji kala hanji mu kubeketa kuê, kuila ka ji batula luua, né kienhókio ki ji nange-phe mu ku kukuta lusolo iangu ioso ndenge.

¹³ Kiene ue kia soko ni jinjila ja ió oso a kambe kusuua ni kuxinganeka Nzambi; o akua kubhanga ia ibha kudielela kuâ kua kà jikinina.

¹⁴ Ioso ia dielela jinga ia kà sendumuka; o kudielela kuâ kua kà di bhanga kala uandanda ua mujandanda.

¹⁵ Ua kèla, kia kà xamenena kʼonzo iê, iene i idibhalʼé; kia kà sota ku kuatenena-ku, iene ki ia kèmana dingi.

¹⁶ Muene mu muanha u buingita kiambote, jithangu jê ji zandela muene mʼóbhia diê.

¹⁷ O jindanji jê ji di zala mu matadi katé bhu mbanduʼa fixi, ji talela muene ku matadi.

¹⁸ Maji se Nzambi u mu vuza bhu kididi kiê, kuabhu-phe, ni kididi kiene ki mu di tuna kiá kuila: kiluua ngi ku mona.

¹⁹ Tala, kiene-phʼiki kia di bhange ni muenhu uê! O mu fufuta mua kà tunda athu engi.

²⁰ Kuma Nzambi kene mu kamba kusuua muthu ua iuka, mba akua kubhanga ia ibha u a kuata mu lukuaku phala nʼa xamenena kua Muene, kana.

²¹ Muene ua-nda kuizalesa dikanu dié-eie ni jingolela, o mizumbu ié i kala mu ximana.

²² Oso a ku zembe, a kà zuata jisonji; dibhata dia iá oso a bhanga ia ibha, dia kà muangana.