Jobe 7 - O Mikanda Ikola

Jobe uila kala ua mu zoka ni Nzambi

¹ Jobe uixi: Manhi o muenhu ua muthu mu ngongo, ki ua hadi uene? O izuua iê ki i soko ni ia ngunza u kalakalela o kizuua?

² Mukuâ ni mubhika kia kala mu kuinda o kilembeketa; kala ngunza ua mu kinga o futu iê,

³ kiene kia ngi bhana jimbeji ja hadi ni kukà kuka, mukuâ ni undundu ua ngi lunduisa, ia a ngi lungila ma-usuku a dilamba!

⁴ O ki ngiza-phe mu kuzeka, ngixi: O kuma ki ku kielaʼhi? Katé bhebhi ngi kamba kubalumuka? O usuku kulebha kuahi ngó! Ngi lunguluka bhu hama ngi tona! O ki ngi balumuka hadi jijʼê, ngixi: Ki ku vundilaʼhi kiá? U sanga kia ngi kumu katé mu kimene!

⁵ O mukutu uami uezala maminhu kala kizuatu, u batumuka jimbàmba jedi kala ibumu ia mavu! Kikonda kiami kia kekuka, kiia ni ku tunda utúlua! Kiaiibha muene kiavulu!

⁶ O izuua iami kulenga kuê, lasadela ia mutungi-a-thanga ndenge; iia muene ni kúbhua ngoho sè kudielela dingi kima.

⁷ Xinganeka, Ngana, ulembalale kuila muenhu uami uediʼé ngó kala mulenge; o mesuʼami kà tona dingi kumona mbote.

⁸ O mesu ma iá ala mu ngi mona lelu, ka kà ngi mona dingi; o mesu mʼeie a kà ngi tala, maji ki ngala-ku-dingi.

⁹ Mukuâ ni dituta ki di kenguluka kiá hé di bhita, kiene ue ió uoso u tuluka kuʼalunga mu mbila, ki lelu dingi a tunda-mu.

¹⁰ Nuka dingi a kà vutukila mʼonzo iê; ni kididi kiê kiene ue ngó bhua tungile ki kia kà muijiia dingi.

¹¹ Mukonda dia kiki, dikanu diami ki nga-nda ku di fudisa; mu lamba dia muenhu uami, nganda kuzuela; mu kulula kua muenhu uami, nga-nda ku di tenda!

¹² Mbebhu eme ngi musanza ua kalunga, mba ngi kilulu kia musanza, kuila a ngi tela mulangidi mu ku ngi kondela?

¹³ Eme ki ngi zuela, ngixi: Hama iami ia-nda ku ngi konda o malamba, hama iami ia-nda ku ngi sosolola o misusu,

¹⁴ eie-phe u ngi sasumuna ni jinzoji ji kuatesa uoma, ngi mona isúma ni madiuanu a kuatesa uoma!

¹⁵ ki kia bhingi o muenhu uami ua mu sola, uixi: Kota o ku di bhonda, kuma kota o kúfua, ki ngindi o hadi i kala kiki!

¹⁶ Muenhu uami ua ngi kumu, nguami kukola muenhu izuua ioso kiki. Ngambudia ʼmi kiá, kuma izuua iami ia sokoʼé ngó ni mulenge.

¹⁷ Muthu kima kiahi, phala eie ku mu suua, ni ku mu ta o muẋima ué kiki.

¹⁸ O imene ioso uia ni ku mu tala, ithangana ioso u mu lola?

¹⁹ Katé bhebhi ki u ngi xá, mba u ngeha? Katé bhebhi u kamba ngó ku ngi bhana kithangana kia ku minha mathe mu kanu diami?

²⁰ Se-phe nga te kituxi, Ngana, ngi ku bhanga kiebhi, Eie uene mu kulanga athu? Ua ki bhangelaʼhi ku ta mesu kokuami, se kiedi katé ni eme-muène nga di kumu kiá, kuma kia ngi nemena?

²¹ Phalaʼhi, kutondala kuami eie ngué ku ku loloka? kikuma kiami ngué ku ki katula? Kindala-phe nga-nda kuzekaʼmi kiá ku mavu, mu kimene ki u ngi sota, eme ki nga-nda ku kala-ku dingi.