Jobe 6 - O Mikanda Ikola

Jobe u di lungisa mu ima ioso ia di tende

¹ Bhenhobho, Jobe u vutula, uixi:

² Aiué, tatʼé! Se o lamba diami dia ẋikinine muene ku di pezala, ni hadi iami ue ku i tula kumoxi ku dipezalelu diê!

³ Diene-ku, mu kutanga o kidi, dieju beta kunema museke ua ndundu ia kalunga, ndenge; kiene ki nga zuelela lusolo sè ku xinganeka dingi.

⁴ Mukonda o mifula ia Muteni-a-Ioso ia ngi kuata, o muenhu uami uala mu kúnua o ikolakola iê; ima ioso ia Nzambi i kuatesa uoma, ia ngi kondoloka.

⁵ Mbebhu o bulu ia mukáu i didila bhu mbanduʼa sabhelela? Mba o ngombe i didila bhu mbanduʼa iangu ia kúdia kuê?

⁶ Kima kia usáu ene mu ku ki dia kia kambe o môngua? Inga menhʼa diiaki a kala ni kutouala kuahi?

⁷ Muenhu uami kiene ki ua di tunina kukuata ku izuelu ienu, phala ni utululuke, kuma iedi kala o kúdia kuami kua ngi kumu kiá, mukonda dia mahaxi a mukutu uami.

⁸ Tamanu bá se kia ẋikinine ku di bhanga uila ki ngala kubhinga, Nzambi anga u ngi bhana kioso ki nga mu kinga.

⁹ Tamanu Nzambi kia mu uabhelele o ku ngi sasujula, anga uehelela lukuaku luê o ku ngi zubhidisa!

¹⁰ Kuma kienhiki hanji kieju beta kota, mu ku ngi uabhela; muene ku kamba ku ngi langa, anga ngi jimuka, kiejuʼngi konda muene malamba; kuma o izuelu ia Ió Ukôla, eme ki nga di tunu-iu.

¹¹ Ngi kingileʼhi ngó, se o nguzu iene ki ngala na-iu dingi? O muenhu u ngi vudilaʼhi ngó izuua, se o dizubhilu diami kidi?

¹² Mbebhu o nguzu iami ia soko ni nguzu ia ditadi? Mba o xitu ia mukutu uami ia utadi ua ngòndo?

¹³ Lémbue! Ki ku ngi kala dingi kubhanduluka kua kima! Nguzu joso ja ngi muangana!

¹⁴ Uoso ua tate, o dikamba dia fuama ku muʼidikiza henda; né kiá kala dingi ni uoma ua Muteni-a-Ioso.

¹⁵ Phange jami ka ngi bhange kiambote, a ngi tobhesa kala kahonga ka menha, mukuâ ni hungulule ki i bhita mu jihonga, hé i somboka.

¹⁶ Menha mê ma di vunza ni jelu ia di sueka-mu, o mukonda dia kionde, ku thandu diê kuizala neve.

¹⁷ O bhu thembu ia kusangumuka kuê ni kizuza, ji di zunza, o bhu kixibhu ki ji bhita ku muanha, ji kukuta hé jʼendelela muene nzaká, bhu kididi kiê bhu ja kexe ki ji kala-bhu dingi.

¹⁸ O ibuka ia jingenji, jihoka ja jinjila jâ ji lungulukila kiá kuengi, a banda mu ididi ia kututa ia kikangalakata, anga a jikinina.

¹⁹ O jingenji ja Temane jʼa sota hanji; abhiteʼa njila ia Seba a tala kua ene ni ku di tula mienhu.

²⁰ O kudielela kuâ, ku a kuatesa jisonhi; mu ku bhiẋila bhobho, u sanga a tandanganha.

²¹ Kiki-phe enu ue mua soko-nâ; ki mua mono phaxi jami, uoma ua mi kuata.

²² Mbebhu eme nga miʼambela, ngixi: Ngi bhanienu, mba ngi bhangienu ujitu ku imbamba ienu?

²³ Mba ngixi: Ngi kudidienu ku nguzu ia mutatexi? Inga ngedi, ngixi: Ngi tambudienu bhu maku a isuéia?

²⁴ Ngi longienu phala ngi di xibhe; ngʼijidisienu ioso i nga tondala.

²⁵ Ai-ué! Tatʼé! Maka a kulunga ala ni nguzu bá! Maji kima kiahi ki bazela o kubazela kuenu?

²⁶ O kuila mua mu xinganeka i mu zuela phala ku ngi bazela, kuma maba ma maka ma muthu ua tate, né ua lungu, a sokela ni kitembu.

²⁷ Enu-phe kuma monʼa kitungu mua soko-bho ku mu tela muondona, ni kamba dienu mua soko-bho ue ku mu ta uenji!

²⁸ Kala kiki-phe, se kia mʼindukila talenu kokuami, mu mone kuma ki nga mu tanga makutu bhu pholo ienu.

²⁹ Ngi fundisienu dingi luamukuá, nga mi diondo, ki ki kala kituxi, kana; ngi fundisienu, kuma mu mulonga iú o kidi kiami kiene kia-nda kutolola.

³⁰ Mbé bhuala kikuma, bhu dimi diami? Inga dimi diami ki di tena kutanga o dilamba di ngala na-diu?