Jobe 41 - O Mikanda Ikola

¹ Eie u tena ku kuata o ngandu ku nzolo, mba ku muʼoleka dimi ni mukolo?

² U tena ku mu ta mukolo mu mazulu, mba ku mu kubula jinganzuánzua ni muinha?

³ Manhi muene ua-nda kudionda kiavulu? Mba u ku zuelesa ni kilendu kioso?

⁴ Muenʼió eie u ta-nê kikutu? Inga u mu bhanga mubhikʼé u xalelà-ku?

⁵ Ua-nda tonoka-nê kala kanjila, inga ua-ndu mu ta bhu mukolo nda u mu bhane ku tuana tué tua ahatu, tu tonoke-nê?

⁶ Akuenu mu kisangela kié a ta-nê uenji? Inga a mu uanena ku abadi akua kusumbisa?

⁷ U tena ku muʼizalesa kikonda ni jinzolo, mba u muʼizalesa mútue ni matôma ma akua kutamba?

⁸ Kuaku lué, mu tule na-iu ku thandu, ki u lembalala o mvunda i ua bhiti na-iu, nuka dingi u ki fikisa!

⁹ Athu ene mu ku di metena mu ku dielela kuâ; mbé muthu i kamba ku mu bha kibhalu mu ku i mona ngó?

¹⁰ Kana-ku muthu ua di kake u fikisa ku i tonesa. Nanhi-phe muenʼió u tena kuzangumuka bhu pholo iami?

¹¹ Nanhi ua dianga ku ngi bhana, phala eme ni ngi mu vutuile? Mbata o ima iene ioso iala bhoxi dia maúlu, iami eme-muène.

¹² Ki nga-ndu di xibha ku mbandu ia idiandu iê, mba ku nguzu iê ia vulu, ni kikexilu kiê kia mu bhange na-kiu.

¹³ Nanhi u tena kujikula izuatu ia malombo mê? Nanhi u tena ku bokuena bhu jinganzuánzua jê ja di bunjika.

¹⁴ Mabhitu ma dikanu diê nanhi u tena ku ma jikula? Mukonda uoma uala ku mazu mê ma kondoloka.

¹⁵ O mikalatata ia ibalabala iê, iene o ku di zangeleka kuê; iene ia di jondo kiambote mu kimoxi-kimoxi kala a i te ni Selu.

¹⁶ I di toteka muene kumoxi, bhu kaẋi kâ né mulenge ki u tena kubhita.

¹⁷ I di naminina kumoxi anga i di kuatenena muene, ki i ẋikina ku i muangununa.

¹⁸ O ki i ta ngexexe imoxi, ku di muika mukengeji; o mesu mê mʼela saxi! saxi! kala ibhebhetela ia ukielu ua kimene.

¹⁹ Mu kanu diê mu tunda sama ja túbhia; muia ni kuila jisoso manu-manu.

²⁰ Mu mazuluʼê muia ni kufuafua dixi, kala dia ímbia ia mu fuluka bhu jiku, mba kitumba kia uama.

²¹ O muha ua dikanu diê, u tena ku uika makala; o mu kanu diê mu tunda mulengu.

²² Mu xingu iê muene mua tunga o nguzu; ku mu tukulukila, ni dilamba di lenga

²³ O idiandu ia mukutu uê, ia di naminina kiambote kumoxi; o misuinhi ia jixitu jê iene ioso momuê ia di fikidila, ki bhuala musuinhi u zamba.

²⁴ O muẋima uê ua kolo kala ditadi, ua kolo muene kala o ditadi dia kuhuhila di kala kʼoxi.

²⁵ Muene se u fundumuka, ni mazonda a teketa; se u zabuka, eneʼoso ela kala a juuala.

²⁶ Se bhu kala muthu u mu vunda xibhata ku thandu, ki i bokona; né ngumba mba ditoma mba musongo.

²⁷ Kua muene, felu i di bhanga kala kiangu; o ngòndo i di bhanga mukua ni muxi ua bolo.

²⁸ O musongo ua mufula muene ka u lenge; o matadi a ku takula ni mbala-fundu, kua muene a kituka kala mafe.

²⁹ Se a mu takula jimbangala, kua muene jʼila kala iangu ia hatu; se a mu zengela ngumba, ki mu bhangesa kuolela.

³⁰ Kʼoxiʼa divumu diê, kuala ibheletete iedi kala jisongo; muene u di zala ku thandu dia jisongo kala uala mu malôua.

³¹ O ididi ia zongo muene u i bhangesa kufulujuka kala kiene kufulujuka ímbia iala bhu jiku; o musanza ua kalunga u u kitula mukua ni kiene kufulujuka o unguendu.

³² Mua bhiti muene mu xala hoka ia mukengeji u di muika; o mua zongo mu zela ni muene, phé, kala jimvi.

³³ Mungongo ki muala kima kia ku mu sokesa na-kiu, kuma kioso kia mu iudika, ka mu bhange phala ku kala ni uoma.

³⁴ Kima né kia lebha, muene u ki tala ni usudi; muene Sobha ia iama ioso ia di zangeleka.