Jobe 40 - O Mikanda Ikola

¹ Ngana anga uambela dingi Jobe mu kitaphephe muenhomo, kuila:

² Manhi o kuzoka mu ku bilukila Muteni-a-Ioso, kuene o kulonga? Uoso u tembula Nzambi mu kienʼiki, a vutule hanji ku ima ienʼiii.

Jobe u vutula ni ku di tolesa

³ Jobe-phe anga u vutuila Ngana, uixi:

⁴ Ngana, eme nga bolo; ngi ku vutuila kima kiahi? Ku dikanu diami ngi ta-ku o lukuaku luami.

⁵ Nga zuela lumoxi, ki nga-nda ku vutula dingi, mba-phe luiadi, kuabhu muene, ki nga-nda kuia dingi ku pholo.

Ngana u kuata dingi kuzuela. O kutena kua Nzambi

⁶ Bheneʼobho, Jihova mu kaẋi ka kitaphephe uvutuila Jobe, uixi:

⁷ Kindala di kute bhu kinhonga kala u dikuenze; eme nga-nda ku kuibhula, eie nda u ngi vutuile.

⁸ Ni kidi kiene, eie kufundisa kuami ua-ndu ku kitula kingoho, mba u ngi belesa eme, eie ni u di lungise?

⁹ Inga uala ni lukuaku kala Nzambi, mba u tena ue o ku numina ni dízui kala o diê-muène?

¹⁰ Di kembese-phe ni matunda ni unéne; di zuike ungana ni fuma.

¹¹ Lundulula o jingiji ja njinda ié, u talese uoso ua di zangeleka nda u mu tululule.

¹² Tonginina oso a di zangeleka, eie u a bhane kusebuluka, akua phulu diota na-u ku thandu bhu kididi kiâ.

¹³ A vungine eneʼoso kumoxi mu fufutila, o pholo iâ jikila-iu mu kididi kia di seuka.

¹⁴ Bheneʼobho-phe kiá, eme ue ngi ki tanga ku mbandu ié kuila o lukuaku lué-eie lua kadilu, lu ku bhana kikóue kia kutolola.

¹⁵ Kindala-phe tongolola o nguvu, i nga bhange kumoxi nʼeie, u sanga ídia iangu kala ngombe.

¹⁶ Tala-phe, nguzu iê-muène ia mu kala mu malombo, o kusuina kua kutena kuê, kua mu kala mu misuinnhi ia divumu.

¹⁷ Hé uandala, mukila uê u u kolesa kala muxi ua musédulo; o mixibha ia matabela mê, ia di nhonga-nhonga.

¹⁸ O ifuba iê kala malumbungu ma ngôndo, o kitánda kia ifuba iê ioso kila kala mixi ia felu.

¹⁹ Maji muene-phe, uala ngó matunda a kikalakalu kia ibhangelu ia Nzambi; uoso ua mu bhange, ua mu manekesa ue ni xibhata.

²⁰ Kidi muene, o milundu i mu bhana kia kúdia; ku milundu kuene ku sangulukila o jixitu joso mu iangu.

²¹ Muene-phe u zeka mʼoxi a isasa ia vundu, u suama mu madianga ni mu malôua.

²² O miẋi ia vundu i mu vungina ni kilembeketa kiâ; o isasa ia misalakelu ia ngiji ia mu kondoloka.

²³ Se o ngiji i di bhanga masenza, o muene ki ki mu kuatela kima; u tululukʼé muene kiambote, né-mbe o ngiji ia Njolodá i subhaka katé ku dikanu diê.

²⁴ Mbé sai-ku muthu u tena ku i kuata, kuila iene ia tono ni kutala, mba ku i ta mukolo mu mazulu?