Jobe 39 - O Mikanda Ikola

¹ Jihoha, thembu ia mu kala ni tuana, eie ua ijiia, inga eie ua mu langa jimbambi kioso ki ji teta tuana tuâ?

² Jimbeji jâ ja kuimita, eie u tena ku jiʼalula? Inga uejiia kithangana kia ku teta?

³ Jene ji kotama phala kuteta tuana tuâ, anga ji di sanza ku misusu iâ.

⁴ Tuana tuâ u sanga tua nete, tu kudilʼé ngó mu mukáu ua hatu, tu tunda, ki tu tena ku vutukila dingi mu mavumu mâ.

⁵ Nanhi uʼehelela mikete ku mukáu, mba nanhi ua jituna mikolo ia bulu ienda ni lusolo,

⁶ iene nga i bhana inzu iê, o mikáu ia kambe athu, o mu ixi ia môngua, muene mu mabhata mê.

⁷ Muene uolela kiʼevua kulunguta kua mbanza ionéne, o kudikola-kola kuavulu kua muendexiʼa ibhaku, muene ka ku ivu.

⁸ O milundu iene ididi iê ia kudila o sabhelela, anga uenda ni kusota ima ioso iala uisu.

⁹ O kuila o kaluimba u mesena ku ku xibhidila? Inga mʼusuku uiza mu kuzeka mu kibhanga kié?

¹⁰ Manhi u tena ku mu kuikila ku mubhanga ni mikolo? Mba u kaiela kuema dié ni ku ku sesumuina mavu a kudima mu ikhobo?

¹¹ Inga u mu dielela muene mukonda dia nguzu iê ia vulu? Mba ikalakalu ié-eie u muʼehela-iu muene ku i bhanga kia tokala?

¹² Inga u mu bhangesa kuila imbamba i ua kunu u ku bhekela na-iu mʼonzo, ni ku i bhongoluela muene bhu kienda kia ku vundila?

¹³ O kihendembumba u bhuka mabhabha mê ni kusanguluka; muene uala ni mabhabha ni jisala ja dibânda.

¹⁴ Muene maiaki mê u ma xá mu mavu, anga u ma temesa mu fufutila.

¹⁵ Anga u katula-ku o muẋima, ua kuila bhu kala kinama ki ma diata, mba iama ia mukáu i tena ku ma titidila.

¹⁶ Anʼê u a sasa kia ibha kala ki anʼê; sumbala o kikalakalu kiê ki di bota, maji ua tululukê muene kiambote.

¹⁷ Mbata Nzambi o kuijiia ua muʼimina-ku, ka mu bhana kitongoluelu.

¹⁸ Maji kia-nda kuila nhanhá, mu kulenga, né kabalu mba uoso ua mondala-ku, muene ua olela.

¹⁹ Eie o kabalu u ka bhana nguzu, mba u kʼezalesa o xingu ni jindemba?

²⁰ Mbé u ka bhangesa kutuka kala kihoho? Mazulu mê mu ku bhuima kala túbhia, ka kuata uoma!

²¹ Ikoto iê i kanda-kanda bhoxi mu dikôlo, utana mu nguzu iê, anga u tunda mu ku di bonga ni iá a di zakela ibhakatu ia ita.

²² Uoma kene na-u mba kusasumuka; ka vutuka-phe ku dima mukonda dia kulenga xibhata.

²³ Mu ku mu kondela muene, o kizu ki di kola-kola, o utadi ua felu ia sosa ni musongo, u lekujuka.

²⁴ Ni ku di sakesa ni ku di kukumuna, iu uia ni ku kanda makungu ni ikoto iê, dízui dia koloneta ka di suu,

²⁵ Ithangana ioso ki xika koloneta muene uila: Ndokuenu! O ita u i nuha dikanga, ni kulunguta kua ilamba, ni nzôngo ia ku di kola.

²⁶ O kuila kahaúla ka mu tuka bhulu mukonda dia kilunji kie-èie, kioso ki ka-nda kuoleka mabhabha ka lungu ku sulu?

²⁷ Inga eie ua mu tumina holokoko phala ni i di leka ni ku ta kikalanga kiê bhu ditala dia lebha?

²⁸ Holokoko ua tunga ku matadi a lebha, kuenhoko kuene kua bhange dibhata diê, bhu dizokozoko dia ditadi, bhu kididi kia kondama

²⁹ Bheneʼobho bhene bhua muena o mbole iê; o mesu mê a i muena dikanga.

³⁰ Anʼê a xibha manhinga, o bhuoso bhuala imbi, muene ka kambe-bhu.