Jobe 36 - O Mikanda Ikola

O muthu mu ku tala hadi, Nzambi ua muʼandala mbote

¹ Edihu u kuata dingi kuzuela, uixi:

² Kinga dingi bhuʼòfele, nda ngi ku londekese, kuila, sai-ku hanji maba ma kulungisa Nzambi.

³ Tundé ku makanga ngi kiʼamba dingi lua mukuá, kuila, o Ió ua ngi bhanga kène ni mangonha.

⁴ Mbata mu ku tanga kidi, o maka mami u nga mu zuela ki a makutu, kana; kuma iú uala ni eie, muthu ua kidi mu kuzuela kuê.

⁵ Tala-ze! Sumbala o Nzambi ua kulu kinéne, maji muene ka texi muthu, kuma muene ukôla mu ku tetuluka kua muxima uê.

⁶ Muenhu ua kisuéia ka uʼehela, maji u batula mu kidi milonga ia jiphulungu a tate.

⁷ Ku athu a iuka muene ka katula-ku o mesu mê; maji u a xikika kumoxi ni jisobha ku kiandu, hé u a zangeleka ku mivu ni mivu ki iene kúbhua.

⁸ Se a a kutu mu jingidinhá, anga a a kuika ni mikolo ia mukondo,

⁹ muene-phe u a ejidisa imbamba iâ ioso ia bhange, ni ikuma iâ; kuma o mu ikuma iâ muene mua laiele jinga.

¹⁰ U jikula ue o mátui mâ, phala ku a longa, hé u a tuma kudiela kituxi kiâ.

¹¹ O kia muʼivua hé a mu bhikila, o izuua iâ a kà i zubhila mu kuzediua, o mivu iâ ia kà bhua ni mbote.

¹² O kia kamba-phe ku muʼivua, a kà a bhitisa ku xibhata, hé a kà fua sé ku kʼijiia.

¹³ Athu a ibha mixima, a di bhakela nzungule ia njinda ku thandu diâ; kia-nda kuila Nzambi ua a kutu mu jingidinhá, a lémbua kudikola phala ku a kudila.

¹⁴ Kalunga ka a dia mu unzangala hanji, a fuila mu kaẋi ka jindumbu ja mala a bhanga o undumbu ni mala nʼakuá.

¹⁵ O phulungu-phe ua tate, a mu bhuluila mu kutata kuê, o mu ku mu bhondeleka, muene mua mu jikuila o mátui.

¹⁶ Kienhiki eie ue, ua mu sota ku ku katula bhu dikelengu dia mukondo phala ku ku bheka bhu kididi kia zanze, bhua kambe kima ki ku phopheka, o mákudia ku meza mé anga a kʼèzala ni maji.

¹⁷ Maji eie-phe, ua dʼizalesa ni uanji ua muthu u bhanga phulu, mukonda dia kiki, o kufundisa ni mabatuilu ma kidi ma ku xikamena.

¹⁸ Enda-phe ni ku di langa, njinda ki i ku bheke mu ku ẋongona, mba u tondala mukonda dia ku xinganeka kuila uala ni ima ia vulu i tena kuku kula.

¹⁹ Eie ua fika kuma muene ua-nda kusuua kiavulu o umvuama ué, ni ku di hahula kuoso kua nguzu ié, anga ki fudisa o ku ku bhondeleka?

²⁰ O usuku ku uinde ngó, kuma muene mua-ndu katula o ifuẋi bhu kididi kiâ.

²¹ Di lange-phe, ku te muxima mu ku bhanga kia ibha; kuma o ku bhanga kia ibha, kota ua jijila o ku tala hadi.

²² Tala-phe, Nzambi u diʼdikiza kuma muene munéne mu kutena kuê! Nanhi u longa kala muene?

²³ Nanhi u tena ku muʼibhula ioso ia bhange muene mu njila iê, mba nanhi ua muʼedi kuma: Eie ua bhange kia ibha?

²⁴ Ta-kiu ku muxima, o ku jingisa ikalakalu ia Nzambi ia di monekena ku athuʼoso.

²⁵ Athuʼoso a mu i mona; o muthu uimana dikanga ni ku i tongolola.

²⁶ Kidi bá! Nzambi ukôla! Tua lémbua ku mu tongolola: o izuua ia mivu iê, ki i ẋikina ku i tanga.

Edihu u zangeleka o unéne ua Nzambi

²⁷ Kuma, muene, o mabèbe a menha ua a sungila kokue, anga u bhangesa kuila ku mbundu iê kunoka mvula.

²⁸ Iene i lunduluka ku matuta, hé i buabumuka nzungule ia menha ku thandu dia muthu.

²⁹ Mbebhu muthu u tena kutongolola kioso kia mu futunuka matuta, ni inuminu ia balaka iê?

³⁰ Talesa-ze, ku thandu diâ uzala-ku o mukengeji uê, hé o kalunga ka zongo u ka vungina.

³¹ Kuma o mu ima ienhiʼi-phe, muene mua fundisila madiembu, hé u a bhana kúdia kuâ kua di xala.

³² O mukengeji u u vungina ni maku mê hé u u fudisa kubhita mu ngenda ja milembu iê.

³³ Ió u tuʼijidisa o ixinganeku iê, kala o ibhaku ki i tongolola o kibhungu kiala mu kuiza.