Jobe 34 - O Mikanda Ikola

Edihu u tanga kuma Jobe ua mu zuelé ngó kia ibha, Nzambi ua lungu

¹ Edihu anga u zuela dingi, uixi:

² Enu muejiia, ivuenu ulungilu uami; enu mua tongoloka, bhanenu mátui kokuami.

³ Mbata dítui di lola o maka, mukua ni dimi ki di lola o kúdia.

⁴ O kioso kia iuka tu sote ku ki tungula phala etu; o mu kaẋi ketu tu tongolole kioso kia uabha-mu.

⁵ Mukonda Jobe uambe, uexi: Ngi muthu ua iuka, maji o Nzambi kulúnga kuami kuoso kua ngi fuama ua ngi katula-ku.

⁶ Sumbala nga lunguʼami, a ngi kiti ngi mukua makutu; fidila iami ia kituka mukôngo, ki i ẋikina dingi ku i saka; o kituxi ki nga te ki ki moneka.

⁷ Muthu nanhi u soka ni Jobe, o kutobhesa u ku nua kala menha?

⁸ Hé uenda mu kizomba kia iá a bhanga kia ibha, anga uendela njila imoxi ni isuéia?

⁹ Kuma uambe, uixi: Mu ku di tuma ni Nzambi, muthu ka katula-mu kima.

¹⁰ Mu kienhiki-phe, enu mu athu, mu jinjimu, ngʼivienu: Lu ku suke, eie Jobe! kuma Nzambi ka tena kubhanga kia ibha! o Muteni-a-Ioso ka tena kubhanga mangonha!

¹¹ Mbata o muthu ua kà mu vutuila kia fuama mu imbamba iê ia bhanga jinga; u bhangesa muene kuila muthu ni muthu u tambula kia fuama o njila iê.

¹² Kidi muene, Nzambi kene mu ku bhanga usuéia, mba Muteni-a-Ioso u bhanga mangonha mu ku fundisa.

¹³ Nanhi ua mu bhana o kutumina ngongo? Ima ioso ia moneka ku mesu ni iii ki i moneka, nanhi ua i te mu ididi iê?

¹⁴ Se Nzambi ua tele muẋima uê mu kubhanga phulu ku muthu, mba ua kexi mu ku di xinganekʼé ngó muene, anga o nzumbi iê ni mulenge uê u di bhongoluela na-u ngoho muene,

¹⁵ xitu ioso ieje kúfua, muthu-phe ueje ku vutukila ku fufutila.

¹⁶ Eie Jobe se moxi dié muala kutongoloka, kiki-phe ivua-kiu; bheteka mátui ku mbimbi ia kizuelu kiami.

¹⁷ Mbé, muthu ua zembe o kidi, u tena kutumina? Eie anga uandala kubelesa ió uala ni kuiuka ni kutena?

¹⁸ Mbé sobha ene ku muʼila: Xé! Muthu ua ibha? Mba o ilamba a i tanga, kuila: Enu! Isuéia?

¹⁹ Kuambe dingi ió kene ni kubhanga katungu ka uthu ua ilamba, mba mvuama u beta ku mu bhana ujitu, o jingadiama nʼa kala ndenge; kuma enʼoso kikalakalu kia maku mê.

²⁰ Ene muʼanzanzʼumu a fua. Ku tula muʼaxaxe ka usuku, madiembu a ma tungutisa, anga a bhita; o iiala ia nguzu a a tolola kuala nguzu ia kambe kumoneka ku mesu.

²¹ Mbata o mesu a Nzambi phe, a mu kengelela o njila ja muthu, hé a mona uendelu uê uoso.

²² Kana-ku kitombe mba kizenji kia kalunga kia vundu kinéne mu suama iá oso a bhanga kia ibha.

²³ Mbata o Nzambi ka bhindamena kithangana kia vulu ni kutala o muthu, phala ku mu bheka bhu pholo iê mu ku mu fundisa.

²⁴ O Mazonda u a jimisa, sé ku a tokuesa, o bhu ididi iâ hé u ta-bhu athu engi.

²⁵ Mukonda muene uejiia o ibhangelu iâ; o mu usuku, u a tandanganhesa anga a iokojoka.

²⁶ Mukonda dia kukala isuéia, Nzambi u a betela muene bhu pholo ia oso ala ku a mona.

²⁷ Mbata muene a mu xisa, o njila jê a lémbua ku jiʼjiia, né imoxi ngó.

²⁸ Mu kubhanga kiki, a bhangesa o kudikola kua ngadiama kubanda katé kua Nzambi, muene iú uevu o kuditenda kua phulungu.

²⁹ Muene se nʼa bhana kutululuka, nanhi ua-nda ku mu elesa? Se o pholo iê u i sueka, nanhi u tena ku mu tala? Muene ulangidila o miji ni diembu katé ni muthu umoxi ngó.

³⁰ Phala o muthu uala ni mangonha, ki mungu dingi a kala mu kutumina; mbé o mundu ki u kale mu iluezu.

³¹ Kuma, ni kidi kiene, se bhu kala muthu uambela Nzambi, kuma: Nga tale hadi, nguami dingi ku ta kituxi,

³² Kioso ki nga lémbua kumona, ngi longese-kiu eie; se nga bhange mangonha, nuka dingi ngi tona ku ki bhanga,

³³ mbé muene ua-nda ku ku futa kala ki ua mesena eie, mba kiokio ku ki mesena? Mbebhu muene ua-nda ku kuambela, uixi: Solʼé é-muène, eme kʼeme ngi ku solela? tanga ki uejiia, zuela!

³⁴ Athu oso ala ni kilunji a-nda kuzuela kumoxi ni eme, ni njimu uoso ua mu ngʼivua, kuila:

³⁵ Jobe ua didi kuzuela, ka zuela ni kilunji; ku maka mê ki kuala kuijiia.

³⁶ Aiué, Tatʼetuʼé! Tamanu o Jobe a mu lolele katé ku dizubhilu, mukonda muene ua vutula kala muthu ua ibha.

³⁷ Kuma ku kituxi kiê ua bandekesa-ku kubhukumuka; u beta jimbanda muʼaxaxi kʼetu, ni kusebulula, maka mê u ma vudisa mu ku bilukila Nzambi.