Jobe 32 - O Mikanda Ikola

Edihu u thathamena Jobe ni makambʼê kitatu

¹ Bheneʼobho athu kitatu ió anga eha ku vutuila Jobe kuma a mono ua mu di lungise kiá muene-muène.

² Anga Edihu, monʼa Balakiiele, mubuzita, ua tokala ku mbutu ia Lame, njinda iê i mu kuata; u kuatela Jobe njinda, mukonda Jobe ua mu di fika ua beta kuiuka Nzambi ndenge.

³ Njinda iê ue anga i mu kuata ku makamba a tatu a Jobe, kuma, sumbala a lémbua kia ku vutula, maji hanji elesa Jobe.

⁴ Edihu-phe ua kinga Jobe nʼa dianga kuzuela, mbata Jobe ua kexi muadiakime, muene ndenge.

⁵ Edihu kia mono kuila, mu kanu dia mala kitatu ió ki muala dingi kia kuvutula, njinda i mu kuata.

⁶ Bhenhobho-phe, o Edihu, monʼa Balakiiele, mubuzita, u kuata kuzuela, uixi: Eme ngi monʼa ndenge, enu mu adiakime; nga kexile ni hele ni uôma ua ku mi tangela kixinganeku kiami,

⁷ eme ngixi: O izuua i zuele, ndumba dia mivu i longe o kuijiia.

⁸ Ni kidi muene, moxi dia muthu muala nzumbi, o nzumbi ia Muteni-a-Ioso iene i mu bhangesa o kutongoloka ni kuijiia.

⁹ O makota ki ene kiá ngó ejiia, mba a kuka ene kiá ngó a tena ku tongolola kima kioso kia iuka.

¹⁰ O kiki-phe, ngi zuela muene, ngixi: Ngʼibhienu mátui, eme ue nda ngi mi tangele kixinganeku kiami.

¹¹ Talesenu, nga kexi mu ku kinga o izuelu ienu, nga bhana ue mátui ku ioso i mua tanga jinga, kioso ki mua kexe mu ku sota o kulúnga.

¹² O ki nga mi di suí, ki ngi mono muthu ua tena kutolola Jobe mba ku mu vutuila mu maba mê ma kulúnga.

¹³ Phala ue ki mu di thathe, kuila: Tua sange unjimu, Nzambi ngó ua ki tena, ki muthu kana.

¹⁴ Talenu-phe, kuila, muene ka ngi zuelesa kima, eme ue ki nga-nda ku mu vutuila ni izuelu ienu.

¹⁵ Mua kakuka-ze! mua lémbua kiá kuvutula, o ia kuzuela ki muala na-iu dingi!

¹⁶ Nga kinga muene, maji ki mua tena kuzuela; mua lémbua muene; o kuvutula dingi mua ki tokoka.

¹⁷ Eme ue, ku mbandu iami, nga-nda kuvutula; nga-nda kutanga ue i nga xinganeka.

¹⁸ Kuma ngala ni ia vulu ia kuzuela, nzumbi iami ia ngi sakalala phala ku i tanga.

¹⁹ Mu mala mua ngi nane kala vinhu ia ubhe ia kambe kididi bhu tundila o mulenge, mukuâ ni itabhu ia ubhe ia-nda baza!

²⁰ Ngʼehedienu-phe ngi zuele, nda ngi tululuke; nga-nda ku jikula mizumbu iami ni ngi vutula.

²¹ Tamanu ki ngi bhange kathômbo kʼathu, mba ngi kala ni kubanza muthu.

²² Mbata eme ki ngʼijidila ku di uabhesa; kuma se ki kiene, ió ua ngi bhanga ueje ku ngʼambata kindaúla.