Jobe 31 - O Mikanda Ikola

Jobe u jiza ni kutanga o kutenena kuê mu ima iê ia mu tokala o kubhanga

¹ Nga te kikutu ni mesu mami; ngi ma talesa-phe kiebhi ku monʼa kilumba kia muzeletete?

² Kuma kua Nzambi, bhuluʼobho, ngeji ku kala-ku ni dikânda diahi? Mba undundu uahi kua Muteni-a-Ioso, tundé ku madimbinza?

³ Manhi ki kuene o kutexika phala mukua ituxi, ni kuxixima kua ió oso a bhanga kia ibha?

⁴ Inga Nzambi o jinjila jami ka mu ji mona? O uendelu uami uoso ka mu u ualula?

⁵ Se ngende ni mangonha, se kinama kiami kia lengela kuia mu kutobhesa muthu.

⁶ Nzambi a ngi pezale ku jipezu ja iuka kiambote, nda a ngʼijiie o ku di phopheka kuami.

⁷ Se mu uendelu uami nga bhambuka mu njila, se o muẋima uami ua mu kaiela (kua lungu o) mesu mami, mba ku maku mami kua naminina dibaka dioso-dioso.

⁸ Kuabhu-phe, eme ngi kune, mukuetu a die; o muiji uami a u vuze muene katé ni jindanji jê bhoxi.

⁹ Se o muẋima uami ua diʼehelela kudiangukila muhatu, mba se ngaii ni kuzongojola bhu dibhitu dia mukuetu.

¹⁰ Kuabhu-phe, muhetuʼami a zuke, phala muthu uengi; muhatuʼami ue a mu kotame ku thandu kuala athu engi.

¹¹ Mukonda se kiene ki ngi bhanga, kieje ku ngi kala kituxi kia dikota, mulonga u bhekesa kubela ku afundixi;

¹² mbata kieji ku kala túbhia tu jikinisa katé mu kibuika, kieji ku jimisa umonhi uami uoso.

¹³ Se nga di tunu kubhana kima kia tokala ku mubhika uami ua diiala mba ua muhatu, kioso ene kia kexi mu ku ngi dionda,

¹⁴ bheneʼobho-phe, eme ngeje ku bhanga kiebhi kioso Nzambi kia balumuka? O kia ngʼibhula o kikuma, eme ngeje ku mu vutuila kiê?

¹⁵ Ió ua ngi iudika mu vumu dia mamʼetu, ki muene ue ua a bhange ene? Inga ki muene umoxi ua tʼumbu, etuʼoso, kikexilu kimoxi mu divumu?

¹⁶ Se kima kiandalele o jingadiama eme nga ki jijidile, mba nga bhangesa mesuʼa mutudi ua muhetu kubenguka;

¹⁷ mba o dikânda diami nga di di ubheka uami, o monʼa kitungu ka tambula-ku kima

¹⁸ (mukonda tundé mu undenge uami, ua kulu nʼeme kala eme ngi tatʼâ; eme nga di bhangele ngi musonguedi ua mutudi tundé mu vumu dia mamʼetu);

¹⁹ se nga mono muthu ua mu fua mukonda dia kukamba kizuatu, ni iú ua bhindama mukonda dia kukamba kia ku di vunga;

²⁰ se o miongo iê ki i ngi tanesa, mba muene ka di vungu ni kindemba kia jimbudi jami;

²¹ se o lukuaku luami nga-lu zengela monʼa kitungu, mukonda dia ku ngi suinisa kuala afundixi bhu dibhitu,

²² kuabhu-phe, kiphenza kiami kia lukuaku ki sonoke mu kisuxi, ni kifuba kiami kia lukuaku ki bukuke tunde mu kisuxi, mu a lu sokekela.

²³ Kuma o njumbu ia Nzambi, phala eme, kima ki ngi kuatesa uoma, o kuimana bhu pholo ia unéne uê, ki ngeje kutena.

²⁴ Se eme nga dielela ku ulu, mba ngʼambela ulu ua fina, ngixi: Eie-muène kiá nga ku dielela;

²⁵ mba eme nga sanguluka mukonda dia kuvula kua jimbongo jami, ni mu kuila o lukuaku luami lua bhongolola kia vulu;

²⁶ se nga tale ku dikumbi kioso ki dia kexe mu kubenha, mba ku mbeji, kioso ki iia ni kuenda, ia zele kiambote,

²⁷ anga mu kasuèkele muẋima uami u ngʼehela ku di nganala, hé ngi leka lukuaku mu ku a bhana jibeju,

²⁸ kiki ue kieje ku ngi kala kituxi ki ngi belesa ku afundixi; mbata kieje kuila kala nga di tunu Nzambi uene ku diulu.

²⁹ Se nga sangulukila o uíndua ua mukuetu ua ngi zembe, mba eme nga tana kioso kuxixima ki kua mu tula,

³⁰ (dikanu diami ue ki ngi diʼehela ku ta kituxi, ni ku kola-kola mu ku mu bhingila o kúfua kuê);

³¹ se athu mu bhata diami ka kiambe muene, kuila: Aiué! Nanhi bhobho, ua kambe kuikuta ni xitu ia bhana jinga muene!

³² Muthu ua tundu dikanga, o nzuá-ngiza, ka zeka jinga mu nzunga; o ngenjiʼa thumba nga mu jikuila jinga muene o mabhitu mami.

³³ Se ngedi kala Adá, nga sueka ikuma iami, mulonga uami anga ngi u sueka bhu homba iami;

³⁴ Kuabhu-phe, eme ngi kale ni kimbulambula bhuezala o mundu ua dikota, o uoma ua ku ngi sebulula kuala o madiembu u ngi kuate, nda eme ngi di xibhe, ngi kambe ku tunda bhu muelu.

³⁵ Uaué, taté! Tamanu eme nga kexile ni uoso u ngʼivua! Kuma ku di bhângela kuami kuku nga ku te dijina! O Muteni-a-Ioso a ngi vutuile! O nguma iami a soneke kutatela kuê!

³⁶ Ni kidi muene o kutatela kuê ngeje ku kuʼambata bhu kisuxi kiami, ngeje ku di kuta na-ku kala kitundu.

³⁷ O uendelu uami ngeji ku mu londekesa-u o konda iê, mu ku bhiẋila kua muene ngeji kuia muene kala ngi kilamba.

³⁸ Se o ixi iami i ngi bilukila ni ku di kola, mba o mibhanga iê i didila kumoxi;

³⁹ se o ibundu iê nga i di, eme nga kambe ku i futa kala kia tokala, eme nga bhekesa kalunga ku jingana jê,

⁴⁰ bhu kididi kia tidiku muʼime minha; bhu kididi kia sevada, muize iangu. Kuzuela kua Jobe kuabhu. Mahezu!