Jobe 30 - O Mikanda Ikola

Jobe u tanga kikexilu kia kuxixima mua bokona

¹ Maji kindala kiá, anʼa jindenge a mu ngʼolela, sumbala jitata jâ, ka fuamena ngó ku a ta kumoxi ni jímbua ja kilunga kiami.

² Nguzu ia maku mâ, iene ngi i bhanga kima kiahi? Ene nguzu ia unzangala momuʼâ ki iala-mu dingi, mukonda dia ku kuka.

³ Nzala ni ku kamba ioso, kua a sekalesa, nguzu kala na-iu; aia ni ku kunha mu ididi ia kukuta, tunde ukulu, mu jingundu ni mu mikáu ia kibuika.

⁴ Aia ni kunona tu miẋi tua malva ni tu mafe tua isasa, o kúdia kuâ jindanji ja muẋi ua zímbulu.

⁵ Mu kaẋi ka athu aia ni ku a kaia-kaia-mu; a a kola-kola, kala kiene mu kola muthu ua nhana.

⁶ A tunga mu makôlo mua vundu, ni mu jingenda ja mavu ni mu mabânda ku matadi.

⁷ A zumina mu kaẋi ka isasa, hé a di bhongoluela moxi dia misonge.

⁸ Ene anʼa malaji, ana a athu a kambe o majina, mu ixi aia ni kua kaia-kaia-mu.

⁹ Maji-phe kiki, nga kituka ngi muimbu uâ ua kutonokena, nga di bhange ngi Sabhu iâ.

¹⁰ A ngi zembe muene kiavulu, kia ngi mona a lengela dikanga, ka fulu-phe ku ngi ta mathe mu pholo iami.

¹¹ Mbata Nzambi mukolo uê ua u jituna, iú ua ngi tatesa; kienhiki ene a di zula jifelu mu kanu diâ, bhu pholo iami muène.

¹² Ku mbandu ia dilu, ku balumuka minzangala a xinjika inama iami hé a ngi lungidila jinjila jâ ja kibuika.

¹³ Njila iami a i sengulula, hadi iami aia ni ku ngi vudisila na-iu; ene athu ka moneka ngó uoso u a kuatekesa.

¹⁴ O kieza mu ku ngi lungulukila, a di lukula muene kala a mu tunda mu ngenda ia dikota, aia ni ku di mbolomuena mu kibuika.

¹⁵ Kua ngʼiza mauoma, kijingu kiami kia phephuluka kala a kiʼambata ku kitembu, kuzediua kuami kua bhiti kala ʼtuta dia mvula.

¹⁶ O kiki, muenhu uami ua mu ngi zunzumuka moxi, izuua ia dilamba ia ngi kondo!

¹⁷ Mu usuku, ifuba a ngi kubula na-iu anga a i sokomona, o kukata kua mu ngi kunha ki ku nhonha!

¹⁸ Mukonda dia kukata kuami kuala ni nguzu ia vulu kinéne, ni kizuatu kiami kia lunguluka, kukata kua bhingi kua ngi kutu mukua ni ngola ia divunga diami.

¹⁹ Nzambi, tata! Eie ua ngi takuila mu malôua, eme nga di bhange kala ngi fufutila mba ngi uthôka.

²⁰ Nga di kola kokué, maji eie kua ngi vutuila; ngʼemana muene, maji eie ua mu ngi talʼé ngoho kienhiki, ku ngi suu.

²¹ Ua ngi kitukila ni usuéia; ua muʼlua nʼeme ni nguzu ia lukuaku lué.

²² U ngi zangumuna ni kitembu hé u ngi bhangesa kuendela ku thandu diê; mu kibazu kia kibhungu muene mu u ngi sengumuina.

²³ Maji-phe, eme nga kʼijiia, kuila hádia u ngʼambata kuʼalunga, ku inzu ia dibhongolokelu, ia kinga ene oso ala ku muenhu.

²⁴ Ku ndumba ia mavu ma jinzu ja budika, muthu kene mu ku zanguila-ku lukuaku? O mu kutata kuê u kamba kuzangula mbimbi ni kudikola ku mu kudila?

²⁵ Manhi eme nga kambe kudila, ki nga mono muthu ua tate ni phaxi? Inga muenhu uami ki ua kexile ni dilamba kioso ki nga mono muthu ua bhindama?

²⁶ Mukonda dia kiki, nga kexi-phe mu ku kinga o mbote, maji, tala, kua ngʼiza jingongo, nga kinga jinga mukengeji maji kua ngʼiza kitombe.

²⁷ Moxi diami mua mu fulujuka, o kunhoha nga ku lémbua; o izuua ia phaxi ia ngi tula.

²⁸ Nga mu kuenda ni kuxiketela, maji ki kua muanha ua dikumbi; mu kionge, ngi balumuka mu kudikola phala ku ngi kudila.

²⁹ Nga di bhange ngi ndandu ia jimbulu, o injila ia lebha jixingu ni mikoto, ene akuetu u nga di bundu-nâ.

³⁰ O kikonda ku mukutu uami kiia ni kuxiketela hé ki sonoka, o ifuba iami iia ni kujokota ku kizuza kia kukata.

³¹ Kienhiki, o kakoxi kami, ka di bhange mikenu ia kubhindama, o mbendu iami, ila kala dízui dia athu a mu dila.