Jobe 3 - O Mikanda Ikola

Jobe u naka kizuua kiê kia ku mu vuala. Anga u dila o kusekala kuê

¹ Ki kia bhiti kienhiki, Jobe u kuata kuzuela hé u naka (u ta mázui) kizuua kiê kia mu vuala.

² Jobe uamba, uixi:

³ Ki jikinine muene o kizuua kia ngi vuala ni usuku uambe, exi: Emita-ku monʼa diiala!

⁴ Kizuua kienhókio ki di bhange kitombe; o Nzambi ue bhuluʼobho ka ki kuatele muanu, né ngó o mukengeji ki u tue-ku.

⁵ Usuku ua nzumba u ki sambukila ni kitombe kia kalunga; matuta a vundu a tunge ku thandu diê; ima ioso iedi bhuí ifuafua kala dixi i jimuna o muanha i ki kuatese uoma.

⁶ Usuku uenhó a u tambule kuala o kitombe kiedi muene buí; mu izuua ia kutana ku muvu, kiene ki ki bokone-mu; mu kualula o jimbeji, kiene a ki katule-mu!

⁷ Auá! Usuku uenhó u kale ni ngùnzu; uile kala muhatu ua mbaku ua lémbua kuvuala; o mimbu iambote ia kusanguluka kana ku imba-mu.

⁸ Usuku uenhó a u bhubhidile kuala oso a di zemba kinéne ni muanha; ió oso ejiia muene kuthathamesa o ilulu mu kalunga;

⁹ jithéthembua ja usuku uenhó ji fuuetele, né mu ikiélua; o usuku uene uila kingʼé o kúkia, kúkia ki ku moneka; phala ki u mone o ibhebhetela ia mesu a ukielu ua kimene.

¹⁰ Mbata mabhitu ma divumu dia ngʼimitine ua kambe ku ma jika; mba kubhagesa kuila mesuʼami ka mone ki kala o hadi ni ngongo!

¹¹ Eme ki ngi fuilaʼhi tundé mu divumu dia mamʼetu, o mu ku tunda mu mala ki ngi zubhidixilaʼhi kiá kúfua?

¹² Phalaʼhi ngó nga sange jiphuna, phala ku ngi tambulula? Mukonda diahi nga sange mele phala eme kuámua?

¹³ Mukonda hinu nga tandelelaʼmi kiá, nga tululuka; ngeju ʼzekʼami kiá, kienhokio ngeju kala kiá ni kunhoha kuami,

¹⁴ Kumoxi ni jisobha ni jinjimu ja maka mu ngongo, a di tungila jinzu ja makembu katé ni bhu jimbila.

¹⁵ Mba hinu nga zeka kumoxi ni ilamba a kexile ni ulu, a kexile mu kuizalesa jinzu jâ ni phalata;

¹⁶ Mba-phe hinu ngeju kuila kala muthu a mu seluka, ua suama; ki ngeju kala-ku dingi mu kulaia; mukuâ ni tuana tua bhingi kuila muanha nuka a u muene dingi.

¹⁷ Momo kiá ni athu a ibha ka tena dingi kuzukutisa; muenhomo mua bhingi kuila ni iá a bhuila a sanga kunhoha.

¹⁸ Oso a a kutu, momo enhoso a sanga dinhohenu diâ, o dízui dia muzukutixi uâ ka diʼvu dingi.

¹⁹ Momo ua kulu ni ua tolo a sokela kumoxi; o mubhika u di kalela kiá ni ngana iê.

²⁰ Mbata phalaʼhi ngoho o mukua hadi a mu bhana mukengeji uê, o oso a bhondalala mixima a tambula muenhu,

²¹ anga ela kingʼé o kalunga, maji kene ki keza; mu kusota o kalunga a beta kukanda muene, jimbongo jósueke ndenge;

²² kutana kuahi kua kala na-ku, se a sanga kina; a sanguluka muene kiavulu se a bonga mbila?

²³ Phalaʼhi a bhana mukengeji ku muthu ua bhingi o njila iê ia suama, o Nzambi ua mu suekela-iu, katé ni ku aia kʼejiia-ku?

²⁴ Mukonda bhu kididi kia kúdia kuami, ku ngiza hanji mikemu; o ku di tenda kuami ku lunduluka mukuá ni menha.

²⁵ Mbata o kia ngi kuatele uoma, kiene muene kia ngʼiza; o ki nga kuatelele hele kiene muene kia ngi bhiti.

²⁶ Ki ngene ni kunhoha, mba kutululuka, mba muẋima u ngi tula ngó bhu kididi, maji kiki kua ngiza dingi kubhondalala kua dikota!