Jobe 29 - O Mikanda Ikola

Ku di tenda kua Jobe, kia xinganeka kikexilu kiê kia dianga kia kuzediua

¹ Jobe hé u kuata hanji kuzuela, uixi:

² Ai-ué, taté! Ki ngi tundila kuebhi, o ku kalaʼmi dingi kala ki nga kexile mu jimbeji ja bhiti, kala mu izuua ia kexi mu ngi langa Nzambi!

³ Kioso Muene kia ngi muikina jinga ni kandeia kê bhu thala ia mútue uami, eme hé mua vundu ngiia ni kuendela mu mukengeji uê.

⁴ Kala ki nga kexile mu izuua ia unzangala uami, kioso o kikutu kia Nzambi kia kasuêkele ki kia kexile mu balaka iami;

⁵ Kioso hanji Muteni-a-Ioso kia kexile nʼeme, o tuana tuami a ngi kondoloka;

⁶ kioso ki nga kexile mu kuila, mu lete muene mu ngi sukula inama iami, o mu ditadi muene mu ngi tundila o jingiji ja maji jiia ni ku kunguluka!

⁷ Kioso ki ngàʼia jinga bhu muelu ua mbonge, o bhu itanda bhene bhua ngi iudikila kialu kiami kia kuxikama,

⁸ minzagala kia ngi mona jinga a suama; o adiakime-phe a balumuka, hé emana.

⁹ O ilamba-phe maka mâ a ma jikila jinga ku muẋima, a ta muene lukuaku luâ ku dikanu;

¹⁰ athu òʼnéne, mbimbi iâ ia kexi mu ku sukamena, dimi diâ di a kukuta mu kanu.

¹¹ Se bhu kala dítui di ngʼivua, dienhódio diamba muene kuma nga zediua; se bhu kala diesu di ngi mona, dienhódio di ngi bhela umbangi.

¹² Mukonda eme nga bhulula jinga jingadiama joso ji di kola, ni monʼa kitungu ka moneka uoso u mu kudila.

¹³ Kizediuise kia ió ua mu fua, kieza jinga kokuami, kuma eme nga kexile mu sangulukisa o muẋima ua mutudi ua muhatu.

¹⁴ Eme nga di vunga jinga o kuiuka, o kuene kua dibhangele kiá kiene o kizuatu kiami, o kubhanga ima ia ku kamba kathômbo kua di bhangele kiá diene o divunga diami ni kitundu kiami kia mútue.

¹⁵ Eme nga di bhangele eme kiá ngi diesu dia kifofo, ngi kinama kia kinema u tenguna.

¹⁶ Kua ió a bhindama, nga kexile ngi tata, katé ni iá ki nga ejidile, milonga iâ ngi i thothesa muene ni muanu uoso.

¹⁷ Eme o isuéia nga i bukula jinga o jingandelu, a mu nhengeneka kiá ku mazu mâ, eme ngi bhangesa kuila a mu sonona muene.

¹⁸ Eme nga kexi mu tanga, ngixi: Hádia ngi fuila bhu kikalanga kiami bhene, anga izuua iami ngi i sokolola kala kisékele.

¹⁹ Lundanji luami lua kà lebhelela muene katé ku menha, o mu usuku uoso dimume dia ka xikama mu jithangu jami.

²⁰ Ujitu uami ua-nda kua kàia ni ku di bandekeza momuʼami, o mufula uami ua kà suina kiengi bhu maku mami.

²¹ Oso a kexe mu ku ngʼivua, kaiula kami a ka kinga; a kexi mu kuila muene hudí, phala kuividila o kaiula ku nga a bhana.

²² O ki ngi zubha kuzuela, ene ka vutula dingi, kuma o izuelu iami ia kexi mu ku a sumina kala dimume.

²³ Aia jinga muene ni ku ngi kinga, kala kiene mu kinga o mvula, a bhana mu kanu, mukua ni bhu mvula ia kauana.

²⁴ Se nga olelesa, ene ka ki xikana kuila eme nga olelesa kiókio; kienhókio, o mukengeji ua pholo iami ka kexe mu ku u jima.

²⁵ Njila iâ, eme-muène nga kexile mu ku i sola, ngi xikama kala ngi kilolo kiâ, anga ngi tunga mukua ni sobha mu kaẋi ka ilômbo ia masoladi mâ, mukua ni muthu u konda malamba ku iá akua ku ta jingololo ni kudila.