Jobe 27 - O Mikanda Ikola

Jobe u tanga kuiuka kuê ni ku di phopheka kuê

¹ Jobe u kuata kuzuela mu ifika, uixi:

² Nzambi a tane-ku! Ua ngi katula o kulúnga kuami, ni Muteni-a-Ioso ua ludisa o muenhu uami.

³ Kioso momuʼami ki mu kala hanji muenhu ni mulenge ua Nzambi mu dizulu diami,

⁴ dikanu diami ki dia kà zuela kima kia ibha, o dimi diami ki dia kà tanga mangonha.

⁵ Ki ngi kale ue dikanga, o ku mi lungisa enu, kuma katé bhu nga kà fuila, nuka ngi di sandula mu kidi kiami.

⁶ O kuiuka kuami ngi ku naminina muene, ki nga-nda ku kueha, kana; mbata o muẋima uami ki ua mu ngʼelesa ngó kizuua kimoxi kioso-kioso kia muenhu uami.

⁷ Nguma iami a soke ni mukua phulu, o uoso u zangumuka mu ku ngi bilukila, a soke ni kisuéia.

Jobe u tanga disukilu dia ió oso a bhanga kia ibha

⁸ Mbata o mukua mangonha o kudielela kuê kua kà kala kuahi, kioso kia zubha kukala kinjenje, o Nzambi hé u mu sua o muenhu ué?

⁹ Mbé Nzambi ua kà muʼivua dingi o kudikola kuê, kuila dilamba dia mu tulukila kiá?

¹⁰ O muthu ua ibha u tanena kiebhi mua Muteni-a-Ioso? Mba u hingila kiebhi Nzambi mu ithangana ioso?.

¹¹ Nga-nda ku mi longa kioso kiala bhu lukuaku lua Nzambi, ki nga-nda ku mi suekela kioso kiala ni Muteni-a-Ioso.

¹² Mbata enuenuʼoso ima iii mua i mono kiá, mukonda diahi mua mu tanga ngó uanji uòkukutu?

¹³ Talesenu! Muthu ua ibha dikânda diê dia kà kala diahi ku mbandu ia Nzambi? O ió a bhanga kusuina a kà tambula undundu uahi kua Muteni-a-Ioso?

¹⁴ Se anʼê a di sokolola, a kà buila ku xibhata; o muiji uê ki ua-nda kua kà mona kúdia nʼekuta.

¹⁵ Oso a kà subhuka-ku, a kà a funda muʼalunga-ngombe, o atudiʼâ a kà lémbua kudila.

¹⁶ Se o kisuéia u bhongolola phalata kala kufutila ia mavu, anga u lunda izuatu kala malôua,

¹⁷ muene ua-nda ku i lundé ngo, maji muthu ua iuka muene ua-nda kua kà i zuata; o muthu ua bene, muene ua-nda kua kà uana o phalata iê.

¹⁸ Muene inzu iê u i tunga kala kibamba; kala o mulangidi kia tunga o muiônga uê.

¹⁹ Mu kuzeka, u zeka mvuama ni umvuama uê, o kia tona mesu, umvuama ki u moneka dingi.

²⁰ Kimbulambula ki mu kuata kala menha a disenza; mu usuku a muʼambata ku kibhungu!

²¹ Kitembu kia thunda, kia kà muʼambata; o bhu kididi kiê bhua kexe, ki mu xixila-bhu muene ni nguzu ioso.

²² Ima iosuʼiii, Nzambi u mu lunduluila-iu muene ku thandu diê, ka muʼehela, kana; sumbala muene u sota kulenga bhu lukuaku lua Nzambi.

²³ Muene kia di bhana kibhalu, akuâ a beta jimbanda ni maku, mu kusondoloka kuê, a mu tobhesa ni jibuia ni ku mu xikila jisupiia.