Jobe 26 - O Mikanda Ikola

Jobe u bazela Bidade anga u zangeleka unéne ua Nzambi

¹ Jobe-phe ua vutula, uexi;

² Eie uejiia ku kuatekesʼó, kua iú ua kambe nguzu! Ni ku kudila lukuaku lua kambe kusuina!

³ Kaiula kahi ngó ku ua bhana kua iú ua kambe o kuijiia! Ni kulondekesa kuijiia kua subhaka kua kidi!

⁴ O kiene ngó ki ua mu zuela ienʼiii, nanhi ua ku kuatekesa? O muenhu u uala na-u moxi dié, ua mu zuela, ua nanhi?

⁵ Bidade uexi Katé ni jinzumbi já iá a fua kiá jiteketa koxiʼa mavu, o muenha ma kalunga ue ateketa kumoxi ni iá a tunga kuenhoko.

⁶ Ku mesu mê ni ithangana ia kèza-ku ia di monekena kala kima kia zula, kana-ku kima ki mu xitila o mukiukuluku.

⁷ Muene o thunda u i zala ku thandu dia ngoho, anga u bhangesa ixi kuzenzamena bhua kambe kima.

⁸ O menha ua a kuikila mu matuta ia xiketela, o ene-phe ka tanduka ni kunema kuê.

⁹ O mbeji né iala mu kumuika kua nguzu iê, muene u i vungina o pholo, o ku thandu diê-phe u zala-ku dituta.

¹⁰ Ku thanduʼa menha ua te-ku mbambe, katé ku maẋokololo kua suku o mukengeji ni kitombe.

¹¹ Jingunji ja diulu ji teketa, anga ji kala ni uoma ua ikusu iê.

¹² Musanza ua kalunga u u tandula ni nguzu iê, ni kutongoloka kuê, nguma u i diotela muene bhoxi.

¹³ O diulu ua di kembesa ni Nzumbi iê; O lukuaku luê luene lua iudika o kinhoka ki di nhonga jihata.

¹⁴ Iii-phe ngoho, kífua o mizumbu ia jinjila jê! i tuene mu kuívua kua muene iòfelefele ngoho! Nanhi-phe u tena kutongolola kibazu kia nzaji ia kutena kuê?