Jobe 24 - O Mikanda Ikola

Jobe u tanga kuila athu a ibha, bhu kala ni bhabha, ku muenhu iú kene mu ku a bhana njumbu

¹ Phalaʼhi Muteni-a-Ioso ka xindi ithangana ia kufundisa? Mukonda diahi o ió a muʼijiia, izuuʼiii ka mu i mona?

² Sai-ku amoxi, jimbambe a ji sondolola, a nhana ilunga hé a kuata ku inga

³ O monʼa-kitungu bulu iê a muʼambata na-iu muene; o mutudi ngombe a mu tambula-iu mu kiximbi.

⁴ Oso a bhindama a a jimbidisa o njila; o jingadiama jaʼxi kikale joso jiia ni ku di sueka.

⁵ Mukua ni ki tunda o mikete ia milundu mu kikangalakata, kiene ue ki tunda eneʼá mu kuia ku midimu iâ, a di meneka mu kusota o mbole; o mukáu ua diehelela, u bhana kúdia kua ene ni kua anʼâ.

⁶ A muna kúdia kuâ mu mukáu, a kanza ji-uvua mu díbhia dia mukua phulu.

⁷ O mukua tuẋi, ua kambe kia ku di vungila o mbambi, a mu bhitisa o usuku sé kizuatu.

⁸ O mvula ia milundu i a betesa, kia kamba bhua lengela, a basa ku matadi.

⁹ O jihukunhu ja tuana tua ndenge, a a katula muene ku mele a mamʼâ, kiximbi kia ngadiama a ki xikina muene.

¹⁰ A bhangesa kuila akua tuẋi enda sè izuatu, akua nzala o kúdia a a katula na-ku.

¹¹ O mu imbaka ia athu a ibha eneʼá, muene mua vukila o maji; a a kamena o vinhu mu matangi, maji hanji a kala ni dinhota.

¹² Tunde mu jimbonge athu ia kema, o iá a kuama mienhu iâ i i di kola, maji Nzambi phe ka ki mono kuila kima kia ulaji.

¹³ Ene (o isuéia) ala mu kaẋi ka iâ oso a zemba o mukengeji; jinjila jâ a lémbua ku jʼijiia, o mu a sola kuendela ka nange-mu;

¹⁴ O kijibhanganga u balumuka mu kimene-mene, hé u jibha o ngadiama ni phulungu ua tate; o mu usuku u di fuangana ni muiii.

¹⁵ Mukua ni mesu a mukua jiphanda kia kala mu ku kinga o kufulamana kua usuku, uixi: Mu usuku kana-ku dingi diesu dia-nda ku tena ku ngi mona; anga u sueka o pholo;

¹⁶ O mu usuku a kanda o jinzu ja dianga kiá kulanga mu muanha; o mukengeji ka uiji dingi.

¹⁷ Mukonda ene osuʼó, o kimene phala ene, kila kala kitombe kia kalunga; kuma se athu a ejiia, ene evua uoma, kala uoma ua kizenji kia kalunga.

¹⁸ Enu muexi: Akua phulu ene mu a kungulula lusolo ku thandu dia menha; ku mundu, o dikànda diâ dia kuxixima; o mu njila ja mábhia a mivide ene kʼendela-mu dingi.

¹⁹ Mukua ni kixibhu ni munza ki a kukutisa o menha ma kikulakaji; kiene ue hádia o mbila ki ia kà sengumuna ió oso a ta ituxi.

²⁰ A kà mu jimba kiá kuala mamʼâ; o tubamba tua kà mu dia ni vondadi ioso; kana-ku dingi ua kà mu xinganeka; mukua mangonha a kà mu bukujula kala muxi.

²¹ Kuma ua tatesa jinga o kisula kia kambe ana, anga u lémbua kubhanga o mbote ku mutudi ua muhatu.

²² Lémbua-phe! ki kiene! Nzambi mu nguzu iê u vudisa izuua ia mazonda; a tukumuka hanji emana, kioso muene kia kexi mu ku kinga kiá o kúfua.

²³ O Nzambi kia a bhana kunhoha, ene-phe a dielela kiá ngó kienhókio; o mesu ma Nzambi phe ia a talela mu jinjila jâ.

²⁴ A a zangeleka muene mu ka kithangana kòfele; anga a bhita kiua kala kia muia ene oso; a a batula kala mítue ia masa.

²⁵ Se ki kiene, nanhi u ngi kuatesa makutu, o ioso i nga zuela a i tumbulula i kituke kingoho?