Jobe 23 - O Mikanda Ikola

Jobe uinda ku di bheka bhu pholo ia Nzambi anga u dielela ku jihenda jê

¹ Jobe-phe u vutula, uixi:

² Katé ni mu lelu, hanji o kuditenda kuami kua ngi ludila; o nguzu ia dibhebhu diami ia muia dingi ni ku di bandekeza, o kukema kuami kuala ndenge.

³ Uaué! Tamanu ngʼejidile kuoso ku ngi tena ku mu sanga! Hinu ngeji ku bhixila bhu difundisilu diê.

⁴ Ni kutetuluka kuoso ngeji ku mu tudila o mulonga uami, o dikanu diami ngeji ku diʼzalesa ni maka ma uanji.

⁵ Ngeji kuijiia o izuelu ieje ku ngi vutuila na-iu muene, anga ngʼividila kiambote ioso ia ngi tangela.

⁶ Manhi ni unéne uê uoso iuná, o kutena kuê, ueje kuzoka nʼeme? Kana. Inda ueje ku ngi langa muene.

⁷ Bhobho-phe kiá o muthu ua iuka ueje ku funda ni muene, eme-phe ngeje kujituka ku mivu ni mivu kua Mufundixi uami.

⁸ O kiki-phe ki ngiia ku pholo, muene koko kala-ku; se ngedi ngi vutuka ku dima, ki ngi muʼivu.

⁹ Se u kalakalela ku kiasu, eme ki ngi mu mono; o kia di sueka ku dilu, ngi tokoka ku mu mona.

¹⁰ Maji muene-phe o njila iami ua ijiia; se muene ua ngi lolele, ngeje kutunda utadi ua ulu mukuá.

¹¹ Kuma o inama iami ia kaiela mu manhanhu mê; njila iê nga i lange, ki ngi i tondala, kana.

¹² Ku kijila kia mizumbu iê, tundeʼami ukulu kiluua ngi tunda-ku; o maka ma dikanu diê, ma beta ku ngi uabhela o kúdia kuami ndenge.

¹³ Maji o Nzambi kia lungulukila muthu, nanhi muene u mu fudisa? Kioso kiendi o muenhu uê, kiene muene kia bhanga.

¹⁴ Mukonda o ioso iâ ngi xinda, muene ua-nda ku i kumbidila muene; ni ima dingi ia vulu, iala na-iu hanji muene, ia di fu kala iii.

¹⁵ Kiene kia mu ngi bhekesa kuteketa bhu pholo iê-muène; ki ngi xinganeka o ima ienhiʼii, ngi mu kala ni uoma!

¹⁶ Mukonda o Nzambi ua botomokesa muẋima uami, o Muteni-a-Ioso muene ua ngi kuatesa uoma.

¹⁷ Kuambe a fulu ku ngi vuza kiosuʼiki kuma ki kuiza luua kitombe, mba pholo iami u i vungina kiá ni kuvunda.