Jobe 22 - O Mikanda Ikola

Ilifaji u tanga kuila Jobe uate ituxi ia makota, ua fuama u diela

¹ Kieneʼokio, Ilifaji, mukua Temane, u vutula, uixi:

² Mbebhu ku muthu, Nzambi u nganhala-ku kima? Muthu se uala njimu mbote ie-muène ngó, kuabhu.

³ Inga Muteni-a-Ioso kua mu kala ihi, kioso eie ki u kala u muthu ua iuka? Mba muene u tambula-ku kima kiahi, kioso eie ki u iukisa o jinjila jé?

⁴ Inga muene u ku bazela ku uoma ué, ua Nzambi, mba u di ta ni eie mu ku funda?

⁵ Manhi o ku ibha kué eie ki ku vulu muene, o ikuma ié ia vudila-ku muene ki iene mbambe?

⁶ Mbata o jiphange jé ua ji te ku ungunji sè kikuma kioso-kioso, o akua makoza eie ua a zula ioso ia zuatele.

⁷ Ua fulu ku bhana menha a kúnua kua ió ua bhuila, o uala ni nzala, eie ua muʼimina kúdia.

⁸ Maji ixi ua iʼehela mukua nguzu, oso ngoho ala ku ungana, ene a tunga-mu.

⁹ Atudi ua a kaie ni maku a hatu, o jihukunhu ua ji bukujula o maku.

¹⁰ Kiene kia ku kondolokela o mabhebhe, o kiteketela ki kia ku tula mu lusolo.

¹¹ Eie uala mu kitombe mua bhingi kutena kumona kima, o ndumba dia menha ia a ku bhiti ku thandu.

¹² Manhi Nzambi kala ku thandu dia maúlu? Tala ditala dia Jithéthembua! Ku di leka kuahi ngó!

¹³ Eie uixi: Nzambi ku imʼiii uejiiaʼhi? Mbé muene u tena ku fundisa mu kaẋi ka kitombe kiedi buí?

¹⁴ Imatuta ia kômo ia mu vungina, uila kiki, katena kumona, o muene u nhungina koko ku diulu.

¹⁵ Eie uandala u kaiela o hoka ia ukulu mua diota jinga athu a ibha?

¹⁶ Eneʼá a a buikisa kioso ngó kithangana kiâ ki ki bhixila luua; hungulule ja menha ja sengulula ibhela iâ.

¹⁷ Nzambi a muʼambela jinga, kuila: Tunda bhu mbandu ietu. Ni kuila: O Muteni-a-Ioso ua tena ku tu bhanga kima kiahi?

¹⁸ Né kienhókio muene, jinzu jâ ua jʼizalesele jinge ni jimbote; mukonda dia kiki, o kikutu kia isuéia ki ngi kale dikanga!

¹⁹ O athu a iuka a ki mono, ia a kala ni kusanguluka; o ua kambe ku kiʼjiia ua bhanga kasekelu,

²⁰ uixi: Nguma ietu a mu muange, túbhia ue tua jikinisa oso a subhukile-ku ku mbandu iâ.

²¹ Diluulule-phe ni muene, nda u mone kutululuka, mu kubhanga kiokio, mbote i kuiza.

²² Nga diondo, xikina mulongi ua dikanu diê, maka mê u ma te ku muẋima ué.

²³ Se u biluka kua Muteni-a-Ioso, muene ua-nda ku ku tungisa dingi, se o kubhanga kia ibha eie u ku sandula monzo ié.

²⁴ Kienhokio-phe o ulu ua kà u lunjijika mukua ni fufutila, ni ulu ua Ofidi uà kela kala matadi ma jingiji.

²⁵ Katé ni Muteni-a-Ioso ua kà di bhanga muene kiá o ulu ué ni phalata ié ia di lunjijika.

²⁶ Mbata ua kà tanena mua Muteni-a-Ioso, ua kà zangumuna pholo ié kua Nzambi.

²⁷ Eie ua kà sambela Nzambi, o muene ue u kuívua; eie ua kà futa muene ioso i ua di hambelela kua muene.

²⁸ Ki uinda kubhanga kima, kia kà ku tunda mbote; o mukengeji ua kà ku muikina mu jinjila jé.

²⁹ O iá kiʼaia ni ku kulumuka, eie-phe ua kèla uixi: Bhulu! Anga Nzambi ua kà bhulula uoso ua di tolesa.

³⁰ Anga (Nzambi) u bhulula katé ni ió mukua mulonga, xi! a kà mu kudila muene, mukonda dia maku mé-eie mala ni kuzela.