Jobe 21 - O Mikanda Ikola

Jobe u tanga kuzediua kua akua phulu mu ngongo

¹ Jobe-phe anga u vutula, uixi:

² Ivenu muene kiambote o maulúngilu mami, kienhiki ki mi tululuise o mixima.

³ Ngi kuatedienu muanu, eme nga-nda kuzuela; eme ki ngi zubha o kuzuela, mu bhange kiua o kasekelu.

⁴ Manhi eme nga mu di tenda ku muthu uoso-uoso? Né hanji kiene ki kia kexile, muenhu uami u kamba kiebhi ku kala ni dilamba?

⁵ Talenu kokuami nda mu diuane, ni mu te lukuaku ku dikanu.

⁶ Mbata kienhiki ngó, ki ngi ki xinganeka, ngi teketa, mu mukutu uoso mu ngi bhita muene mbambi, kuií!

⁷ Mukonda diahi, athu a ibha, a kola muenhu, a kuka muene, anga a kala dingi kota mu kutena?

⁸ Anʼê a tunga a soma ku mesuʼê a ku mona, a kala kiambote kumoxi ni muene, ni mbutu iê ioso i mu kaiela.

⁹ O jinzu jâ u sanga jala ni kutululuka, ki muala uoma; o mbangala ia Nzambi ki iene ku a beta.

¹⁰ O ngombe iê ia ndumbe i vualesa muene, ki i kambe; o ngombe iê ia mukaji i teta muene, ki i seluka, lémbue.

¹¹ O tuana tuâ a tuʼehela kutunda ni kulenga-lenga kala kilunga; anʼâ a tuka-tuka muene ni ngalasa.

¹² A zangula dízui mu kuimba ni kangoma ni mbânza, a sanguluka muene ni kuxika mbendu.

¹³ Mu kuzediua muene mua zubhila o izuua iâ, maji mu kithangana kiofele a tuluka mu mbila.

¹⁴ Eneʼâ-phe, ene muene ambela Nzambi, kuila: Tunda bhu mbandu ietu! Mbata o jinjila jé, ki tua bhindamena ku jiʼjiia.

¹⁵ O Muteni-a-Ioso muene nanhi, kuila etu tu mu bhikila? Mu ku mu sambela muene, tua-nda ku katula-ku kima kiahi?

¹⁶ Talenu muene kuila, o kuzediua kuâ, ki kua mu tunda kokuâ-ene, bhu lukuaku luâ; eme-phe kikutu kia isuéia ki ngi kale dikanga!

¹⁷ Lukuxi kia mu bhita kuila o mukengeji ua isuéia u jima? Mba kibuika ki a tukumuisa? Mba-phe o Nzambi mu njinda iê u a uanena misusu?

¹⁸ Kuma edi kala ibhiate ku kitembue, mukuâ ni izeji i phephuluka ni kitaphephe.

¹⁹ Enu muexi: Kikuma kia isuéia Nzambi uene mu ku ki bhaka phala anʼâ. Maji muene-ku, o kisuéia, muene ua tokalele ku mu bhana futu kuala Nzambi, phala ni ki mu xixima.

²⁰ Kioso ki muiza uíndua, u di muene-kiu muene-muène ni mesu mê, anga únua muene ku njinda ia Muteni-a-Ioso.

²¹ Mbata kia zubha o kúfua, kuila a mu batula kiá ku dialuilu dia jimbeji jê, ki mu kuatelaʼhi dingi o inzu iê?

²² Manhi Nzambi bhuala u mu longa o kuijiia, se muene muene ua mu fundisa oso ala mu diúlu?

²³ Bhu kala muthu u fua mu izuua iê ia nguzu, kuila ua batama hanji muene kiambote iú ua tululukʼê.

²⁴ O itabhu iê iezala ni lete, o mu ifuba iê muezala ni uôngo ua kindala.

²⁵ O mukuá u fua kiengi, mu lamba dia muẋima uê, ku mbote ua lémbua kulola-ku.

²⁶ Ene oso kumoxi a a funda mu mavu, o momo kiá tubamba tuene tu a vungina ene oso.

²⁷ Talenu muene kuma ixinganeku ienu nga ijiia kiambote, ni ima ia ibha ia makutu i mua ngi zukutisa na-iu.

²⁸ Mbata mua-nda kuila, muexi: Inzu ia kilamba ii kuebhi? Dibhata diala kuebhi mua tungile mukua phulu?

²⁹ Mbebhu enu kiluua muʼibhula oso akua kuenda mu njila? O ijimbuete iene mu ku mi tangela, ki mu i tongolola?

³⁰ Kuila athu a ibha kizuua kia uíndua ene mu ku a langa, o bhu kizuua kia njinda a a kudila?

³¹ Ima iê ia ibha, ia mu ku bhanga nanhi muene u i amba bhuoso bhuala muene? Nanhi ua-nda ku mu futa, ku imbamba iê ioso ia bhanga?

³² Ku dizubhilu-phe, aia mu mu bheka mu mbila, o ku mbila iê a ta-ku kilangidilu phala kuenda ni ku i langa.

³³ Ibumu ia mavu ma honga ki i mu nemena, atuʼoso a mu kaiela, kala kia kambe o dialuilu dia oso a mu kalangela kiá.

³⁴ Enu-phe mua mu ngi bhombelaʼhi ngoho? Mukonda ku ioso i mua mu ngi vutuila kana-ku kidi, kuma kuala ngó makutu.