Jobe 20 - O Mikanda Ikola

Zofale u tanga o mavuua oso ene mu kubhita na-u athu oso a bhanga ia ibha

¹ Bheneʼobho Zofale, mukua Nahama, u vutula, uixi:

² Mukonda dia ixinganeku iami ia ngi tumu kuvutula, nga-nda ku lenguluka kuzuela.

³ Eme ngevu kubazela kua ngi kuatesa o jisonhi, maji muenhu uami ua ngi tumu ku vutula, kioso kia ngi kala mu kilunji.

⁴ Mbebhu eie ku kʼijiia kuila tundé ukulukulu, tundé muthu kia mu tula mu ngongo,

⁵ o kutana kua isuéia ki ku nange, o kusanguluka kua ati-a-ituxi kua kithangana ngoho kiofele?

⁶ Né hanji o kitala kiâ ki lebha hé ki banda katé ku diulu, o mítue iâ i bhixila ku matuta,

⁷ ua kà bola kala o tuji tuê-muène; nuka dingi a kà moneka, o ió a muʼijidile, a kèla: Iú kuebhi?

⁸ Ua kà tuka, mukuâ ni nzoji, ka kà mu mona dingi; a kà mu lengesa kala kisukila kia usuku.

⁹ O mesu a mu muene jinge, ka kà mu mona dingi, ni kididi kiê ki kia kà mu tala dingi.

¹⁰ O anʼê a kà sota o ku di uabhesa ku jingadiama; anga a kà fukununa dingi o soua iâ ni maku mâ.

¹¹ Né-mbe hanji o ifuba iâ izala ni nguzu ia unzangala uâ, hanji-phe nguzu iâ a kà zeka na-iu muene mu fufutila ia mavu.

¹² Né-mbe hanji o ku ibha kua mu toualela mu kanu, muene hé u ku sueka muene koxiʼa dimi diê,

¹³ Anga u ku bhaka, ka kuehela, maji o kutouala kuê u ku jijila,

¹⁴ hanji-phe, o kúdia kuê kua kà kituka kiengi mu divumu diê; kua kà di bhanga kala ndululu ia jinhoka ja mathe a ikolakola moxi diê.

¹⁵ Ua minha maumvuama, maji hádia ua kà ma lusa, mu vumu diê, Nzambi ua kà ma tundisa-mu.

¹⁶ Ua kà zuuela ikolakola ia jinhoka; ua kà fua ku dimi dia diuta.

¹⁷ Mesu mê ka kà mona jihonga ni jingiji ja subhaka ni uiki ni lete.

¹⁸ Ibundu i tunda mu ku kalakala kuê, ua kà i vutula, ka kà i minha, kana; mu jinzungule ji di ta ku uenji uê ua kubhûnda, ka kà katula-mu kusanguluka kua kima.

¹⁹ Mbata ua tatesa jinga athu, o jingadiama ua jʼehelela, iú ua nhana jinzu ki muene ua ji tungu.

²⁰ Mukonda dia luimbi luê ki lu kala ni mbambe, ka kà tena ku bhixila bhu ditala dia kubhulula o ima ioso iandala muene.

²¹ O luimbi luê lua kihabula, ki luʼehela kima kusomboka, mu kienhiki-phe, o kuzediua kuê ki kua kà tena kunanga.

²² O Muene kia kà kala bhu ditala dia ima iavulu u mona kingumba kia muʼiza; maku oso a ió a bhindama a kèza ku thandu diê-muène.

²³ Ku kala-phe hanji ima i tena kuizalesa o divumu diê, Nzambi ua kà mu tumikisa o kutema kua njinda iê, anga i kala mu kunoka ku thandu diê, kioso kia kala mu kúdia.

²⁴ O kia kà lenga mata a utadi ua felu, mufula ua ngôndo ua kà mu tundidila kumbandu ia mukuá.

²⁵ Muene ua kà di vuza o mufula ua mu kubu mu mukutu uê, o uene ua kà tunda ni kubenha kua ndululu iê; uoma ua vulu anga ua kà tula ku thandu diê.

²⁶ O makuvunda moso ma kà suama mu masuamenu mê-muène; túbhia ki tuʼobhuse ngoho tuene tua kà mu jikinisa, ioso ia subhuka mu balaka iê ia kà kituka kúdia kua túbhia.

²⁷ O maúlu a kà tungununa o kikuma kiê; ngongo ia kà zangumuka mu kuzoka ni muene.

²⁸ Maumvuama ma inzu iê a kà mʼambata; a ka ma lundulula kala menha bhu kizuua kia njinda ia Nzambi.

²⁹ Didi, ku mbandu ia Nzambi, diene o dikànda dia muthu ua ibha; iú uene o undundu ua mu bhakela kuala Nzambi.