Jobe 19 - O Mikanda Ikola

Jobe u di tenda o ku kola mixima ni kujiza kua makamba mê

¹ Jobe-phe u vutula, uixi:

² Katé bhebhi mu tatesa muenhu uami, ni ku ngi iokojola ni kuzuela?

³ Lukuinhi kiá mua ngi bazela ni nguzu, ki muala ni jisonhi ja ku ngi kolela muxima?

⁴ Né-mbe hanji eme nga tondala kidi, kutondala kuami ku kala ni eme.

⁵ Se enu mu ngi balumukina ni ku di zengeleka, anga mu ngi bazela, mukonda dia kutata kuami,

⁶ ijiienu-kiu-phe kindala, kuila Nzambi muene ua ngi tatesa, ua ngi kondoloka ni uanda uê.

⁷ Tala, ngi tá nzôngo, ngixi: Kusuinʼé! maji ka ngʼivu, kana; o ki ngi di kola, ngixi: Ngi bandienuʼé! kana-ku u ngi batuila mulonga mu kidi.

⁸ O njila iami muene ua i xiti, nga lémbua kubhita; o mu tu njila tuami ua te-mu kuvunda ni kitombe.

⁹ O ujitu uami ua ngi zula-u, iu ua ngi katula kitundu kiami ku mútue.

¹⁰ Ua ngi sekalesa ku mbandu joso, eme-muène nga-nda ku katuka kiá; o kudielela kuami ua ngi vuza-ku kala kixina kia muxi.

¹¹ Iu ua bambukisa o njinda iê kokuami, iu ua ngi bhange kala ngi muthu ku jinguma jê.

¹² Masoladi ma muene ejiia kumoxi, ia a iudika njila ia kúlua ni eme, a te muene ilômbo mu jimbandu ja balaka iami.

¹³ Jiphange jami ua ngi tela-ju dikanga, oso a ngʼijiia a ngi muangana kala athu engi.

¹⁴ Jindandu jami a ngʼehelela, jingijiue jami, oso a ngʼijidile, ka mu ngi xinganeka dingi.

¹⁵ Akuaʼnzu iami ni abhikʼami a ahatu, a ngi kiti ngi muthu uengi; ku mesu mâ ngedi kala muthu ua tundu dikanga.

¹⁶ Ki ngʼixana mubhikʼami, muene nguê dingi ku ngʼitaia; kia bhingi kale ngi mu bhomba muene ni kanu diami.

¹⁷ Dizumba diami, muhatuʼami ka tena na-diu dingi; o mukonda dia kunuha kia ibha, anʼa mamʼetu a ngi kala ni fokoso.

¹⁸ Katé ni tuana tua ndenge a ngi sebulula, ki ngi mesena kubalumuka, ene a ngi bhanga kasekelu.

¹⁹ Athu oso makambʼami a muxima a ngi kiti ngi kima kia malebhu; katé ni iá u nga zolele muene, a ngi kitukila.

²⁰ O ifuba iami ia naminina kiá ku kikonda kiami ni ku xitu iami; nga subhuka kiá ngó ni kikonda kia mazu, kuabhu.

²¹ Ngi kuatedienu henda, enu makamba mami, tata, ngi kuatedienu henda! kuma lukuaku lua Nzambi lua ngi tula!.

²² Phalaʼhi mua ngi landameka kala kia ngi landameka Nzambi; o xitu iami anga i kamba ku mi kuma?

²³ Tamanu kindala maka mami a ma soneka! Tamanu a ma xinda muene mu divulu!

²⁴ Mba, ni kisonekenu kia utadi ua felu ni ua ximbu, a ma seta muene bhu ndanji ku mivu ni mivu!

²⁵ Mbata eme nga kʼijiia kuma Mukudi uami iú-ué ni muenhu, kuila ue ku dizubhilu, Muene ua kà zangalala mu ngongo!

²⁶ O kioso hádia kikonda kiami ki kia kà zubha o kudiua, hanji mu jixitu jami Nzambi nga kà mu mona mesu.

²⁷ Nga kà di muena-nê eme-muene-muène; mesuʼami muene ene a kà mu mona, ki engi kana. Kiene o muẋima moxi ki ua ngʼizalela ni nguzu iavulu.

²⁸ Kutanga o kidi, mua fuamena kuila: Tua mu mu zukutisilaʼhi? Mbata o kakuma ka maka iá kalʼé moxi diami.

²⁹ Anuʼenu-phe uoma u mi kuate, ua xibhata; mbata sai-ku xibhata ia kuvutuila o phonzo kua oso a bhanga kiaiibha, nda mu kʼijiie kuila sai-ku difundisilu.