Jobe 18 - O Mikanda Ikola

Bidade u tanga kuila Jobe kala ni muanu, ukumbu ua mu kuata

¹ Bheneʼobho Bidade, musuita u vutula, uixi:

² Ua-nda kusuka bhebhi ni kudimbikiza mu kuzuela kué? Xinganeka kiambote, phala tu zuele kiua.

³ Mukonda diahi eie ua mu tu bhanga kala tu iama, tua di bhange tu dixidilu ku mesu mé?

⁴ Eie-phe ua mu di sana-sana muenhu ué njinda i uala na-iu; ua fika ixi a i ehelela mukonda dié-eie? O matadi a sondoloka bhu kididi kiê?

⁵ Kidi muene, mukengeji ua akua phulu ua kà jima, ni soso ia dijiku diê ki ia kà muika.

⁶ Mukengeji mu jibalaka jê ua kà kituka kitombe, o kandeia kê ka kà jimʼé muene ku thandu diê.

⁷ O uendelu uê ua nguzu ua kà zonda, ni kikutu kiê-muène kiene kia kà mu mbolomona.

⁸ Kuma inama iê-muène, iene ia kà mu fuisa mu uanda, ua kʼèndela ku jingoji ja uanda.

⁹ Dibhèbhe dia kà mu kuata mu kasènde, o kimbokoto kia kà mu tolola muene.

¹⁰ O mukolo a mu suekela na-u koxi a mavu, a mu tela mubhetu mu njila iê.

¹¹ O isunji ia kènda ni ku mu sasumuisa ku mbandu joso; ia kà bhangesa kuila kuoso-kuoso kua di tela, uia ni kulenga-lenga ngó!

¹² Kibuika ki kia-nda ku mu tula kia kèza ni nzala ioso, o hadi ienié kiá bhu mbandu iê.

¹³ Anga ia kà mu dia o idiandu ia mukutu uê; xi! phande-kumbi ia kalunga-ngombe ua kà mu dia o idiandu iê.

¹⁴ Mukua phulu a kà mu vuza mu balaka iê mua kexile mu dielela, anga a kà mu bheka kua sobha ia kimbulambula.

¹⁵ Ió ka mu kexe kima, muene ua kà tunga mu balaka iê; ku dibhata diê a kà kuua-ku xofidi i jokotesa.

¹⁶ Bhoxi, jindanji jê ja kà kukuta, o jithangu jê bhulu ja kà lela, a kà ji batula.

¹⁷ Mu ngongo ki mua kà kala dingi u mu xinganeka, o mu jinzunga dijina diê-muène ki dia kà kala-mu.

¹⁸ Mu mukengeji a mu katula-mu nʼa mu takuila mu kitombe, ku mundu a kà mu kaia-ku.

¹⁹ Mu kifuẋi kiê, muene kà kala-mu ni mona mba mulaula, mba ngó mua tungile mua kà subhuka muthu.

²⁰ O kizuua kiê kia kà kuata uôma kua iá oso a kèza-ku, o akua ukulu kiá, kia kà a kuatesa kimbulambula.

²¹ Uenhú, kidi muene, uene o utungilu ua kisuéia, didi diene o disukilu dia ió uoso kejiia Nzambi.