Jobe 17 - O Mikanda Ikola

Jobe ku muenhu iú ka kinga-ku dingi kima

¹ O muenhu uamni ua muia ni kujikinina, o izuua iami ia muia ni kujimuka, bhu pholo iami kiala-bhu ngoho, o mbila iene, kuabhu.

² Kia kidi muene, akua kusebulula a ngi kondoloka, o mesu mami ia a mona muene o kulokalala kuâ.

³ Amba-kiu, Ngana, u ngi bhane uoso u tokala ku ngi zokela kokué é-muène; kuma nanhi muene dingi u tena ku ngi bhana lukuaku luê?

⁴ Mbata ku miẋima iâ, kitongoluelu eie ua ki sueka, kienhiki-phe eie kua-nda ku a zangeleka dingi.

⁵ Uoso mu kuzuela uia ni ku dingila makamba mê, muene ue mesu a anʼê a kà zonda.

⁶ Maji eme-phe ua ngi kitula ngi Sabhu ia akua jixi; nga di bhange mukuâ ni ió u fuama ku mu ta mathe mu pholo.

⁷ Mukonda dia kiki, o mesu a ngi kala kavunda kingumba o hadi, o idiandu iami ioso iedi kiá kala kizúzumbia.

⁸ O athu a iuka, kiki kia kà a bhekela kudiuana; ni ió ua kambe o kikuma ua kà zangumuka mu kuzoka ni mukua mangonha.

⁹ Hanji-phe, o ua iuka ua kʼènda o njila iê ni kúbhua uoma, o ua zele maku uia ni ku di bandekeza jinga mu nguzu.

¹⁰ Maji, mu kidi, Vutukenu hanji enuʼoso, izenu kunu; kuma mu kaẋi kenu ki ngi mono-mo njimu.

¹¹ O izuua iami ia bhiti, o ima ioso i ngandalele kubhanga ia di boto, ni ioso ia semene o muẋima uami ki ia xikina dingi.

¹² Usuku a u bilula muanha; o mukengeji, exi, ua zukama kiá ku dizubilu diê mukonda dia kitombe.

¹³ Se eme o mbila nga mu i tala kiá kala inzu iami, se hama iami, ngi i zala kiá mua vundu,

¹⁴ se o kubola ngi ku ambela, ngixi: Eie u tatʼetu, o ku tubamba, ngixi; Enuʼenu mu a mamʼetu ni phange iami ia muhatu;

¹⁵ O kudielela kuami-phe, kua ngi kala dingi kuebhi? Xi, o kudielela kuami, nanhi ua kà tena ku ku mona?

¹⁶ Mukonda kuene ue kua-nda kua kà tuluka katé bhu mabhitu a kalungaʼngombe, kioso etuʼoso ki tua kà nhohena kumoxi mu fufutila.