Jobe 16 - O Mikanda Ikola

Jobe u tanga kuila makamba mê kala ni henda mba kizola

¹ Kienhokio Jobe u mu vutuila, uixi:

² Nga mu kuiva kiá ima ia vulu kala iii; enu-enuʼoso mu ku ngi konda malamba mua mu ngi kuama dingi.

³ Manhi, izuelu ienu ia kitembu, ki ia-nda ku kala dingi ni dizubhilu diê? Inga, kima kiahi kia ku thathamesa phala u vutule kienhiki?

⁴ Eme uami ngeje kuzuela kala ki mua mu zuela enu, se o muenhu uenu ua kexile bhu kididi bhuala o muenhu uami? Inga, ngeje ku mi vudixila ndumba dia maka, anga ngi kubuakesa ue mútue uami mu ku mi bhanga kia ibha?

⁵ Eme-phe, bhu kididi kia ku mi bhanga kiókio, ngeju ku mi suinisa ni dikanu diami, o mu ku mi konda malamba ni mizumbu iami, ngeje kusosolola o misusu ienu.

⁶ Se eme ngi zuela, misusu iami ki i di xibha, o ki ngiia ngi di xibha, nhohenu diami diebhi?

⁷ Kidi muene, nguzu jami joso ja ngʼibhu; eie-phe, u Nzambi, jindandu jami joso ua ji buikisa.

⁸ Kia di monekena kuma eie ua ngi bhange kiá ifuta-ifuta, o kubhela kuami kua-nda ku ngi bhanga kiá kia ibha, mu pholo diami mua di monekena ue kuila ki ngala dingi kiambote.

⁹ Ua ngi sanujuna mu njinda ié; ua ngi luualela muene; ua ngi kokotela ku mazu; kia ngi tala u xikulula muene kala nguma iami.

¹⁰ Athu a ngi bhanena muene mu kanu, a ngi sebulula ni ku ngi bhana jihuxi ku matama; eneʼoso a di bhongolola mu kuzoka nʼeme.

¹¹ Nzambi ua ngi bhakula muene ku kisuéia, o bhu maku a mukua phulu bhene bhua ngi sonuena.

¹² Nga kexile ni kunhoha, kiki-phe muene ua ngi juualesa; ua ngi kuata bhu xingu, iu ua ngi sana-sana. Ua ngi bhange eme ngi tudilu diê.

¹³ Akua kuasa o mifula iê, a ngi kondoloka; u ngʼasa muene mu anʼa-sonhi ka ngi kuatela henda, kana; ndululu iami i zunzumukina mu mavu.

¹⁴ U ngi kuama ni italakanha ku italakanha, mu kuzoka ni eme u di takula muene kala dizonda dia ita.

¹⁵ Ku kikonda kiami nga tungila-ku kidinhaji, mútue uami nga u fufujula mu mavu.

¹⁶ Pholo iami ioso ia ngi lunguluka ni kudila, o kuthanduʼa mesuʼami kua ngi kala kizenji kia kalunga,

¹⁷ sumbala bhu makuʼami ki bhuala kusuína, o musambu uami ua iuka muene.

¹⁸ Eie mavu, tata! Kana kuvunga manhinga mami! Ki bhu kale kididi bhu suama o ku di kola kuami!

¹⁹ Kindala-phe ijiienu-kiu kuila mbangi iami iú ku diulu, o u ngi zokelela ku mulonga uene ku matuta.

²⁰ O makamba mami ene muene a mu ngi sebulula, maji o mesuʼami a zangiua ni masoxi bhu pholo ia Nzambi.

²¹ Ai ué! Se bhua kexile muthu u tena kuzoka ni Nzambi mu kubhangela o muthu, kala o monʼa muthu kia bhângela kamba diê!

²² Mukonda bhua-nda kubhita ngó tu mivu tuofele nga-nda kuia mu njila i bhinga ki nga kà vutuka dingi.