Jobe 15 - O Mikanda Ikola

Ilifaji u tanga kuma Jobe ki muxikani

¹ Bhenhobho Ilifaji mukua Temane u vutula, uixi;

² Manhi muthu uejiia, mu ku vutula, u vutula kuijiia kua kitembu? Anga uʼizalesa o divumu diê ni kitembu kia thunda?

³ Hé uenda ni kuzuela uanji ki ua te kima, ni kulúnga ki ku bhandulula ngó kima?

⁴ Eie-phe o uoma ua Nzambi ku u kiti kima, o kudionda kala kia tokala ua ku sosolola.

⁵ Mukonda o dikanu dié diene dia mu tanga o ikuma ié, eie ua solo uzuelelu ua akua mangonha.

⁶ O dikanu dié, diene di ku belesa, kʼeme, kana; o mizumbu ié iene ia kala jimbangi ja ku tatela (ku mulonga).

⁷ Manhi, eie u muthu ua dianga a ku vuala? Inga, eie a dianga ku ku vuala, o tu thuthulundu tuenginina?

⁸ Mba uevu kioso Nzambi ki a te kikutu mu kasuèkele, o kuijiia eie ua di sukisa na-ku kiá ngó kokué?

⁹ Kima kiahi ki uejiia, etu-etu tua kambe ku kʼijiia? Kima kiahi kia ku tetulukila kia kambe ku kala momuetu?

¹⁰ Mu kaẋi ketu ue muala ni iá ala ni jimvi ni iá a kuka, a beta hanji o ku kuka tatʼenu ndenge.

¹¹ Manhi, o Nzambi kia kubhana o kutululuka, kia ku tolela? Inga, o moxi dié muala kima kia suama-mu?

¹² Muxima ué ua ku zangumukinaʼhi? Mesu mé a mu kuʼidilaʼhi, saxi! saxi!?

¹³ Phala ku bilukila Nzambi, ni muenhu ué, anga uehela izuelu kala iii ku tunda mu dikanu dié-eie?

¹⁴ Muthu kima kiahi, phala a kale ni kuzela? Ió a mu vuala ku muhatu u kala kiebhi mukua kidi?

¹⁵ Tala, Nzambi katé ni jisandu jê, ka ji dielela, né-mbe o diulu, ku mesu mê ki diala ni kuzela,

¹⁶ kuambe dingi o muthu ua kasana, ua xidi, únua o ituxi kala menha?

Ilifaji uidikiza kuma athu a ibha muenhu iú ene ku u muena hadi

¹⁷ Ngʼivue, ngi ku londekese-kiu; ki ngene mu kumona kiene ki nga-nda ku ku ambela.

¹⁸ (Kuma kia tange o jinjimu, kievu ue ku jitata jâ, ia a kambe o ku ki sueka,

¹⁹ kua ene ngoho kuene kua bhele o ixi, o mu kaẋi kâ ki mu bhiti dingi muthu uengi, kienhiki:)

²⁰ Muthu ua ibha izuua iê ioso ia kutala hadi; mivu ia butu kualula iene Nzambi ia bhakela o muthu uoso u bhondeleka akuá.

²¹ Mitendu i kuatesa uoma iala mu mátui mê; katé ni mu izuua ia mbote ku muʼ ʼiza kingumba ki mu tukumuisa.

²² Kala ni kuxikana kua kuila hádia ku kitombe u tunda-ku dingi, maji uadielela kuila xibhata ia mu kinga.

²³ Uenda ni kututumba mu kusota kia kúdia, ni kuila, uixi: Kudia kuala kuebhi? Uejiia muene kiambote kuila kizuua kiê kia kuvunda kia mu zukama muene bhu mbanduʼa lukuaku.

²⁴ O kizuua kiê kia kuvunda ki mu bhekesa kuambuka; ni mukondo ni kubhondalala a mu kuatesa uoma ua vulu; a mu lenda muene kala sobha ia di lungu phala kulua ita.

²⁵ Mbata muene ua zangula lukuaku luê mu kuzoka ni Nzambi; Muteni-a-Ioso ua mu luisa kaẋu,

²⁶ u di takula muene mu kuzoka-nê ni xingu ia landamana, anga u di xitila ni ngubu iê iala ni mukômo.

²⁷ Mbata o pholo iê ua i vungu ni kuneta, ua sabhuka jithumba ja kuneta mu malombo.

²⁸ Iú ua tungu mu jimbonge jʼo buikise, mu jinzu ja jingundu, ja xikamena kiá kubudijika ni ku di bhanga maxita.

²⁹ Kiene kia bhangesa kuila o umvuama ka kà u mona dingi, mba o umoni ue u nanga, o jimbongo jê ki ji tena dingi ku vula mu ngongo.

³⁰ Ka kà tena kubhulaka ku kitombe; o milengu ia túbhia ia kaùla o jithangu jê; o ku mulenge ua dikanu dia Nzambi ua kèndelela.

³¹ Ku dielele-phe ku ima ia ukumbu ni ku di nganala é-muène, mukonda ni kisakidilu kié kia kà kala muene ukumbu ngó.

³² Ukumbu uenhú, hádia u kalanga ku mu dia, kuila kizuua kiê kiluua ki bhixila, o luthangu luê ki lua kà sabhuluka dingi.

³³ Jiúvua jê ua kà ji lalumuna kuila ja uisu hanji, kala muvide, o itulu iê ua kà iʼehela kulaúka kala mudiva.

³⁴ Mbata o kilunga kia akua mangonha kia kà kala nguêdia, o túbhia tua kà jikinisa o jibalaka ja ndúta.

³⁵ Emita phulu, anga a vuala ituxi; mbata o muxima uâ uia ngó ni kufunha mangonha.