Jobe 14 - O Mikanda Ikola

Jobe u dionda kiadi kia Nzambi mukonda dia kubuta izuua ni kutata kua muenhu ua muthu

¹ O muthu, a mu vuala ku monʼa muhatu, u bhanga ngó tu izuua, kene kunanga ku muenhu iú ua vula malamba.

² A mu vuala mukua ni kitulu mi iangu, kuma kathangana ngó ua kukuta; u lenga lusolo kala kizúzumbia, kene mu kunanga kithangana kiavulu.

³ Muthu uala kiki, Ngana, muene u mu tonena o mesu mé, anga u bokona-nê mu kufunda?

⁴ Nanhi u katula kima kia zele, mu dixidilu? Ki bhuala muthu!

⁵ Mbata izuua iê a i aleka, dialuilu dia jimbeji jê eie-muène uala na-diu; muthu eie ua mu xindila ni jimbambe jê, ka tena ku ji somboka.

⁶ Katula mesu mé kua muene, phala a kale ni kunhoha, katé kiela kala ngunza ia mu kalakala, a sanguluke mu kuzubha o kizuua kiê.

⁷ Kuma ku muxi sai-ku kia kudielela, kuila né a u koka, hanji u tona dingi kusabhuluka, o jithangu jê ki jʼeha ku kula.

⁸ Se jindanji jê mu mavu ji kuka, anga muxi ufua bhoxi, mu fufutila,

⁹ ku dizumba ngó dia menha, uandeka kiá kusabhuluka, anga u bhana jithangu kala kixina kia ubhe.

¹⁰ Maji-phe, muthu ki a fua, anga u diua kiá muene … xi! muthu kuila ua tula muenhu, abha-phe u kala dingi kuebhi?

¹¹ Mukua ni menha a musanza ua kalunga ki a jikinina, o ngiji i bhunhena hé i kukuta,

¹² kiene ue, o muthu kia zeka mu kúfua, ka balumuka dingi; kioso hanji o diulu ki di bhu-ku luua, muene ka kà tona, mba u fundumuka ku kilu kiê kia kalunga.

¹³ Tamanu ua ngi suekele mu mbila, ni u ngi sueka muene katé o njinda ié ki i somboka, anga u ngi xindila kizuua, hé u ngi lembalala kiua!

¹⁴ Muthu nʼa fu, mbé ua kà kala dingi ni muenhu? Izuua ioso i nga mu lua ita ngeje ku kinga, katé kia ngi lungulula dingi lua mukuá.

¹⁵ Eie-phe ueje ku ngʼixana, eme hé ngi kuitaia; Ngana, kuatela henda ku kikalakalu kia maku mé!

¹⁶ Maji-phe o kiki, eie ua mu ngi tola manhanhu; manhi eie kua mu langidila o kituxi kiami?

¹⁷ Mulonga uami a u jikila mu nzeke, o ikuma iami ioso ua i tula kididi kimoxi.

¹⁸ Mukua ni mulundu ki u botomoka anga u sendumuka, o ditadi di sondoloka bhu kididi kiê,

¹⁹ kia difuangana ni menha, aia ni kuôza matadi, o fufuta ia mavu hé a i ambata ku masenza, kiene ue, eie ki u jikinisa o kudielela kua muthu!

²⁰ Eie-phe, Ngana, u nangenena jinga ithangana ioso, muthu u bhita; muthu Eie u mu lungulula o pholo iê, anga u mu xinjikila kinhá hé uendelela muene, nzaká!

²¹ O anʼê a kà kala ni kijingu sé muene ku kʼijiia dingi, mba a tunuka, hé a sebuluka sé muene ku ki tongolola dingi.

²² O muene uívua kiá ngoho o misusu ia mukutu ua muene-muène; o muenhu uê ki u tale dingi hadi ia muthu uoso-uoso, ki kale o iê-muène ngó.