Jobe 13 - O Mikanda Ikola

Jobe kuiuka kuê u ku bhângela kua Nzambi

¹ Talenu ima ioso ienhiʼii mesuʼami a i mono, ni mátui ami a ivu, i ia tongoloka muene.

² Kioso ki muejiia enu, eme uami nga kʼijiia; enu ki mua ngi tundu, kana.

³ Maji Muteni-a-Ioso nga-nda ku mu zuelela, ngandala ku di bhângela bhu pholo ia Nzambi.

⁴ Maji enu-phe muala mu akua kufunha makutu; anuenuʼoso muala mu imbanda ia kingoho, ki mua te kima.

⁵ Tamanu mua di xibhile muene hudí, kieju beta kulondekeza o kuijiia kuenu!

⁶ Kindala ivuenu o ku di zokelela kuami, muividile kiambote o maba ma mizumbu iami.

⁷ Mbebhu muambe kuzuelela Nzambi, mu zuela ima ki ia tokala? Mukonda dia muene, mu tanga makutu?

⁸ Muia ni ku tungula athu mukonda dia muene? Nzambi mu mu bhângela mvunda?

⁹ Kieji ku mi uabhela, se muene u mi solokota? Inga mu mu tobhesʼé kala kia tobhesa muthu uoso-uoso?

¹⁰ Muene-phe, ni kidi kiene, u mi bazela se athu muia ni ku a bhanga kathômbo mu kasuekele.

¹¹ Manhi unéne uê ki u mi di-uanesa? O kimbulambula kiê, ki ki mi tula ku thandu?

¹² Sabhu jenu jila kala Sabhu ja uthôka ngó; imbaka ienu, imbaka ia malôua.

¹³ Bhu pholo iami dixibhienu, eme ngi zuele; kioso kiambe kuiza ku thandu diami, kize.

Jobe u dielela Nzambi, maji uinda kuijiia ituxi iê

¹⁴ Mukonda diahi ngi di numata o xitu iami ni mazu ami-eme-muène? Ngi tudilaʼhi muenhu uami bhu lukuaku luami eme-muène?

¹⁵ Né-mbe muene u ngi jibha, hanji nga kinga kua muene; sumbala kiene, maji jinjila jami ngi ji zokela kua muene.

¹⁶ Mukonda ue kuene o kubhuluka kuami; kuma muthu ua ibha ka tena kuiza bhu pholo ia muene.

¹⁷ Kulunga kuami talenu-ku muene kiambote, mátui menu evidile kiambote o ima kioso ki nga mu i londekeza.

¹⁸ Mulonga uami nga u te kiá mu ididi iê, ngejiia kuma a-nda ku ngi lungisa.

¹⁹ Nanhi u kuata phata nʼeme? Mukonda se eme nga di xibhile, kindala ngeji kutula muenhu.

²⁰ Ngi bhane ngó ima i iadi, kuabhu-phe, ki nga-nda ku di sueka dingi bhu pholo ié:

²¹ Katula lukuaku lué ku thandu diami, kimbuua kié ki ki ngi sasumuise.

²² Ngʼibhule-phe, phala eme ngi ku vutuile, mba-phe ngʼehele kuzuela, eie nda u ngi vutuile.

²³ Ikuma iami ni ituxi iami, ikuẋi eme i ngala na-iu? Kituxi kiami ni mulonga, ngi tangele-kiu.

²⁴ Ngana, phalaʼhi u sueka o pholo ié, anga u ngi kita ngi nguma ié?

²⁵ Manhi o dífue diambata kiá kuala kitembu eie hanji u di kuatesa uoma? Iangu ia kukuta kiá, eie u i zuididika dingi?

²⁶ Mukonda diahi eie ua mu ngi xindila ima ia lulu, o ikuma iami ia unzangala ua mu ngi lunduisa na-iu dingi?

²⁷ O inama iami ue, ua mu i tula ku iẋinji, u tonginina njila jami joso, o makànda mami ma inama u ma xindila jimbambe,

²⁸ sumbala eme ngedi kiá kala kima kia bolo, kia mu diua, mukua ni kizuatu kia mu diua ku tubamba.