Jobe 12 - O Mikanda Ikola

Jobe u di bhângela ku ima ia mu tatela makamba mê

¹ Bhenhobho Jobe u vutula, anga u zuela, uixi:

² Kidi muene, kifua enu ngó muala mu athu a dimuka; kioso ki mu fua, ni kuijiia mua-nda kúfua na-ku.

³ Maji, eme ue ngala ni kilunji kala enu, enu-phe ki mu ngi tundu, kana; nanhi u kamba kuijiia ima kala iii?

⁴ Eme nga di bhange ngi kima ki thathamesa makamba mami; eme nga hingila jinga Nzambi, muene hé u ngʼitaia; kiene muene, mukua kidi ni iú ua iuka, a bhangesa kuthathamana, a kuatesa njinda muene.

⁵ Mu ixinganeku ia muthu ualʼê kiambote, kubhindama phala muene ki kima; o ió ua teketa kiá inama, muene hanji a mu lundula.

⁶ Mu jinzu ja iá a bhanga phulu, u sanga muala muene kutululuka (paze); o ió oso a lokalala Nzambi, u sanga a kondama muene kiambote; Nzambi ioso u a tudila-iu bhu maku mâ.

⁷ Maji, kindala ibhula hanji o iama ia mukáu, iene ioso i ku longa-kiu; ni ku jinjila ja diulu, jene ue ji kuijidisa na-kiu.

⁸ Mba-phe zuela hanji ni mavu, ene ue a kà ku longa na-kiu; katé ni jimbiji mu musanza ua kalunga ja kà ku tangela na-kiu.

⁹ Nanhi ki kamba ku mu tongolokela mu ima ioso iii, kuila o lukuaku lua Nzambi luene lua bhange kienhiki?

¹⁰ Kuila o muenhu ua ima ioso i bhuima, uala bhu lukuaku luê, ni nzumbi joso ja mbutu ia muthu?

¹¹ Manhi o maka moso kene mu ku a lola ku dítui, kala dimi ki di lola o kúdia mu kanu?

¹² O kuijiia kuala ni iá a kuka kiá; o mu kuvula izuua muene muala o kilunji ni kutongoloka.

¹³ O Nzambi muene uala ni kuijiia ni nguzu; muene uala ni phangu-ni-ndongo, ni unjimu.

¹⁴ Muene kia bula, ki bhuala dingi u tena kutunga; o uoso a mu jika kuala muene, kana-ku dingi u tena ku mu jikula.

¹⁵ Se menha u a kondela, ima ioso i kukuta; se ua ehelela, ngongo a i ta musèndu.

¹⁶ O nguzu ni kuijiia iala ni muene; ene oso a mu tokala muene, ku tale uoso u tondala uixi ió uoso u tondalesa.

¹⁷ Akua kubhana o kaiula, uia na-u a zuluka, ididi a i xa; o afundixi uene mu a bhekesa kujuuala.

¹⁸ Ungana ua jisobha uene mu u zubha-ku, anga o mukolo u a kondoloka mu mbunda.

¹⁹ O ilamba uene mu i ambata maku a hatu, o ididi iâ hé i xala; o mala a nguzu uene mu ku a ta musèndu.

²⁰ Muene o nganji ja maka, o kizuelu u a katula-kiu mu kanu; o ió a kuka kiá, kilunji u a tambula-kiu.

²¹ U takuila o ilamba mu lusebu, o phonda ia mazonda u i zozesa.

²² Mua vundu, u londekesa ima ia zongo; u bheka mukengeji, bhuala kitombe kiedi muene buí.

²³ O ifuẋi ia athu u i sokolola, anga u i bhangesa kujikinina; muene u i muanganesa anga u i ongeka dingi.

²⁴ O mixima ia atumini mu ngongo, u a katula-iu, anga u a bhangesa kubungana mu kikangalakata mua kambe o njila.

²⁵ Mua vundu aia ni kubabajala, mukengeji ka u mono; anga u a bhangesa kubhendajala kala jihólua ja kodiua.