Jobe 11 - O Mikanda Ikola

Zofale u bazela Jobe, anga u muʼidikiza kuijiia kua Nzambi, ni ku mu bhomba kudiela

¹ Bhenhobho Zofale mukua Nahama u vutula, uixi:

² Manhi kubuabuala kuosʼuku ku kamba vutuilu diê? O muthu uzuela kinéne mbé u lunga?

³ Mukonda dia makutu u ua tange, kiene athu kia di xibhila? Eie anga u ta kasekelu muene kienhiki, xi, bhu kala muthu u ku kuatesa sonhi?

⁴ Kuma eie uambe, uixi: Ijila iami ia iuka, bhu mesuʼé nga zele muene.

⁵ Maji kutanga o kidi, tamanu se Nzambi ua kexe mu zuela, anga u jikula dikanu diê mu ku kuamba.

⁶ Anga u ku tukuluila o kuijiia kuê kuene mu kasuekele, kuijiia kua kidi, kua vula matelu, phala uijiie kuila Nzambi ua ku vutuila kambandu kòfele ngó ku ikuma ié.

⁷ Ua fika eie u tena kuijiia ijinganu ioso ia jinjila ja Nzambi, mba u bhixila bhu ditala dia kutenena muene kala kia tenena Muteni-a-Ioso?

⁸ Kala kia di leka o diulu, kiene kia soko ni kuijiia kuê; eie ua-nda kutena kubhangaʼhi? Mu kuzonga ue kota, mukiukuluku ndenge; eie ua-nda kuijiia kima kiahi?

⁹ Mu kulebha ue kota, ixi ioso ndenge; mu kuzanza ue kota o musanza ua kalunga ndenge.

¹⁰ Se muene uedi u buidisa, mba u jika, mba u bhongolola, nanhi muene u tena ku mu fudisa?

¹¹ Mukonda muene athu a ngoho ua ejiia, o ífua ia ibha u i mona; mbé u kamba ku ki suua?

¹² Maji muthu ua ngoho ka moneka kilunji; kiene muene, muthu a mu vualʼé ngó kala kamona ka mukete ku mukáu.

¹³ Eie-phe se ua di iudika o muẋima ué, sunununa o maku mé kua muene.

¹⁴ Se bhu lukuaku lué bhuala kikuma, texi na-kiu muene dikanga, o kubhanga mangonha ku kuehele ku tunga mu jibalaka jé.

¹⁵ Kuabhu-phe, pholo ié ia kambe o kisemu ia kà bhetuka, ua kèmana sè uoma, ua kà kala bhua kondama.

¹⁶ Mbata ni jihadi ji ua mono, ja-nda kuà ku jimba kiá, ua kà ji xinganeka ngó mukua ni menha a bhiti kiá.

¹⁷ O muenhu ué ua kà beta kutomboloka, dikumbi dia mediia ndenge; né hanji ku kala kuvunda, kia kèla kala mu kimene.

¹⁸ Ua kà dívua kuila ua kondama, mukonda uà kala ni kudielela; ua kà iala mu jimbandu anga u zekʼé muene ni kutululuka.

¹⁹ Ua kà zeka muene, ki bhu kala muthu u ku sasumuna; athu àvula muene, a kèza mu ku di bhomba kokué.

²⁰ Maji-phe o isuéia, mesu mâ ma kà zonda; disuamu diâ ki dia kà moneka; kudielela kuâ, kua kà kala ngoho o kúfua kuene.