Jobe 10 - O Mikanda Ikola

Jobe u ki tanga muene kuma Nzambi ua mu mu bhanga ima ia nguzu

¹ Muenhu ua ngi kumu kiá; kuditenda kuami ki nga-nda ku ku sueka dingi; mu kutata kua muenhu uami, nga-nda kuzuela.

² Nzambi nga-nda ku muʼambela, kuma: Kana ku ngʼelesa; ngʼijidise mba mukonda diahi Eie ua mu zoka ni eme.

³ Kiedi kala kia ku uabhela ku ngi bhondeleka; kikalakalu kia maku mé u kiʼehelela anga u kuatekesa kikutu kia isuéia?

⁴ Eie, mbé uala ni mesu a xitu? Manhi eie u mona kala ki mona o muthu?

⁵ Mbebhu o izuua ié iene imoxi ni izuua ia muthu mukua kúfua? Inga mivu ié ia soko ni mivu ia muthu?

⁶ Phala uibhule o kikuma kiami, ni kusota kutokuesa o kituxi kiami?

⁷ Eie ua kʼijiia kiambote kuila ki ngi mukua mulonga; maji né kiki, hanji ki bhuala muthu u ngi bhulula bhu lukuaku lué.

⁸ O makuʼé ene a ngʼumbu, a ngi iukisa, maji eie uandala ku ngi dia.

⁹ Nga ku diondo, xinganeka kuma eie ua ngi bhange kala mavu; kindalʼiki uandala kiá ku ngi kitula ngi fufuta?

¹⁰ Manhi eie ku ngi kame kala lete, eie ua ngi zunza kala keju?

¹¹ Ua ngi zuika kikonda ni misuinhi, eie ua ngi tungu ni ifuba ni mixibha.

¹² Ni muenhu ni mbote ua ngi bhana na-u mu kiadi kié; o muanu ué uene ua lange o nzumbi iami.

¹³ Maji ima iosuʼiii ua i sueka ku muẋima ué; nga kʼijiia muene kiambote kuma iene iosuʼiii eie-muène ua i solo.

¹⁴ Se eme ngi ta kituxi, eie u ngi mona; o mu kikuma kiami eie kua-nda ku ngi loloka.

¹⁵ O ki ngi kala ngi mukua phulu, kôkolo diami! Ki ngi kala ngi mukua kidi, ki ngi tena ue kubhetuka mútue, mukonda ngezala ni dilebhu, ngi tala ngó ku hádi iami.

¹⁶ Mbata se eme ngi di zangeleka, eie u ngi tomba mukua ni hoji ia kiluami, anga u bhanga dingi ima ia isunji ni madiuanu mu ku ngi bhanga kia ibha.

¹⁷ Eie u tukulula dingi o jimbangi jé mu ku ngi belesa, o njinda ié u i vudisa dingi ku thandu diami, ni ima ia ibha ni ita i vula dingi ku thandu diami.

¹⁸ Eie-phe ua ngi katuilaʼhi ngó mu divumu dia mamʼetu? Tamanu nga fuile, kuila kana-ku luua mesu oso-oso a ngi mono!

¹⁹ Hinu ngediʼami kala nuka ngi kala-ku; hé a ngʼambataʼmi kiá mu mbila tundé mu mala!

²⁰ Manhi o izuua iami ki iòfele ngó? Zumbuka-phe, u ngi xie, phala ngi nhohe-ku hanji ngó bhuòfele.

²¹ Kiosuʼiki kiluua ngiia bhu kididi bhua bhingi kuila ki nga kà tena dingi kuvutuka; ku ixi ia kitombe ni kizenji kia kalunga.

²² Ixi ia vundu kinéne kala kikala o kuvunda kuene; ixi ia kuvunda kuònene ni usuku uedi bui, ixi ia kizenji kia kalunga ni kavuanza; mua bhingi o mukengeji uene ua sokuʼé ngó ni kitombe kia mujijima.