Jobe 1 - O Mikanda Ikola

O kuiuka kua Jobe ni umvuama uê

¹ Kua kexile muthu, mu ixi ia Uze dijina diê a muʼixana Jobe. Muthu iú ua kexile kidi, muthu ua iuka, mukua uoma ua Nzambi; o ia ibha u i lenga.

² Anga u vuala sambuadi dia mona ua diiala ni kitatu kia ahetu.

³ O ibhaku, ua vuile sambuadi dia midi ia jimbudi, midi jitatu ja jikamelu, hama jitanu ja makaza a jingombe ni hama jitanu ja jibulu ja akaji; akalakadi ku bhata a kexile ndumba ku thonga iê; mukonda dia kiki, muene iu ua betele kota ku unéne ene oso ku thunda ndenge.

⁴ Anʼê anga a kuata kuila: Lelu aia mʼonzo ia iú, o mungu aia mʼonzo ia iuná, mu kubhanga fesa, kala muthu mu kizuua kiê, anga aia ni kuambela phange jâ ja ahetu kitatu, kuiza mu kúdia ni kúnua-nâ kumoxi.

⁵ Jobe anga uia ni kuila, kioso ana oso kia zubha kubhanga o jifesa, u a exana anga u a lumbila kua Ngana; kuma u balumuka mu kimenemene, anga uia mu kubhana jisata ja soko ni diauilu dia ene, mukonda, uixi: Sumba anʼami a te kituxi, a ẋonguena Nzambi ku muẋima uâ. Kienhiki kia kexi mu bhanga jinga Jobe thembu joso.

Jobe a mu lola lua dianga

⁶ Kueza kizuua kimoxi, anʼa Nzami eza mu ku di bhakula bhu pholo ia Jihova, Satana ueza ue mu kaẋi-kâ.

⁷ Bheneʼobho Jihova uibhula Satana uixi: Ua tundu kuebhi? Satana u vutuila Jihova, uixi: Mu ku kondoloka o ngongo ni kunhunga-mu.

⁸ Ngana anga uibhula dingi Satana, uixi: Mubhikʼami Jobe ua mu mono? Mukonda ki kuala mukuá mu ngongo ua soko ni muene; muthu ua kidi, ua iuka o muẋima, u xila Nzambi, o ia ibha u i lenga.

⁹ Satana anga u vutuila Jihova uixi: Manhi, o Jobe Nzambi ua mu mu xila mu kingoho?

¹⁰ Manhi eie ku mu izalesa ni jimbote, ni muene ni dibhata diê dioso ni ioso iala na-iu? O kikalakalu kia maku mê eie ua ki zediuisa, o ibhaku iê ia sokoloka mu ngongo.

¹¹ Maji zènga hanji ngó o lukuaku lué, u mu kuate ku ioso iala na-iu, utale se ka-nda ku ku ẋonguena bhu pholo iê.

¹² Ngana anga uambela Satana, uixi: Tala, ima ioso iala na-iu, iala bhu maku mé; inda kua muene ku te-ku lukuaku lué. Satana anga u tunda bhu pholo ia Ngana.

Malamba a Jobe ni muanu uê. O mudiangu ua Kadiaphemba

¹³ Anga ki bhita kuila, kizuua kimoxi anʼê a mala ni anʼê a ahatu a kexi mu kúdia ni kúnua vinhu mʼonzo ia kota diâ, phande-kumbi ia tatʼâ.

¹⁴ Kueza mukunji kua Jobe u mu tangela, uixi: O jingombe ja kexe mu kudima, o jibulu ja kexe bhu mbandu iâ mu kúdia;

¹⁵ tala, kueza muʼanzanzaʼumu jisabéu ja di lunduluila-ku ia a jʼambata; abhika oso a a jibha ku mazu a xibhata, eme-muène ngó nga subhuka-ku phala ku ku tudila o njimbu.

¹⁶ Kioso iú kia mu zuela hanji, kueza mukuá, uixi: Túbhia tua Nzambi, tua tuluka mu diulu, tu tuoha jimbudi ni abhika oso katé kia buila, eme-muène ngó nga subhuka-ku phala ku ku tudila o njimbu.

¹⁷ Kioso iú kiluua ngó a tula kuzuela, kueza mukuá, uixi: Akua Kaldeia a di uane mu ibuka i tatu, ia a di lunduluila ku jikamelu, ia a ji bhûndu, abhika oso a a jibha ku mazu a xibhata, ememuène ngó nga subhuka-ku phala ku ku bhekela o njimbu.

¹⁸ O iú ue ua kexʼé hanji mu zuela, kioso kia bhixila mukuá iu uambe, uixi: Anʼé a mala ni a ahetu a kexi mu kúdia ni kúnua vinhu mʼonzo ia kota diâ, o Phande-Kumbi ié.

¹⁹ Tala, kueza kitémbue kia dikota, kia tundila mu kikangalakata, ʼkí kia di vundu ku thungi jiuana jaʼnzu, o inzu i ia lundumukina ku thandu diâ, minzangala ia afu ene oso; eme-muène ngó nga subhuka-ku phala ku ku bhekela o njimbu.

O kitongola kia Jobe

²⁰ Bheneʼobho, Jobe u balumuka, u tandula divunga diê, u konga jindemba mu mútue, hé u di takuila mu mavu, anga u bheza Nzambi.

²¹ Uamba, uixi: Ngeza ni tuẋi mu mala dia mamʼetu, hádia ue nga kà vutuka ni tuẋi kuenhoko; Ngana ua bhele, Ngana ua tambula; dijina dia Ngana a kale mu ku di ximana jinga!

²² Mu ima ioso iii Jobe ka tela-mu kituxi, mba u ta ngó mulonga uoso-uoso kua Nzambi.