Jisálamu 97 - O Mikanda Ikola

O Kutumina Kua Nzambi Ni Unéne Uê

¹ Jihova ua hingi ungana uê; ixi ioso i tane-ku! Ni mu ikolo iê iavulu a kale ni ngalasa.

² Ni matuta ni kitombe a mu bhaka mu kaẋi; kiandu kiê kia di fikidila mu kubatula mu kidi ni kukumbidila.

³ Ku pholo Iê ku tuamena túbhia, o jinguma jê ji jokotela mu jimbandu.

⁴ Jinzaji jê ji telaka mu ngongo; ixi ia ki mono, ia teketa.

⁵ Milundu ia sengumuka kala sela bhu pholo ia Jihova, bhu pholo ia Ngana uavu o ixi ioso.

⁶ Maúlu ma kola kutetuluka kuê, o ifuẋi ioso ia mono o kubenha kuê.

⁷ Jisonhi ji kuata oso a bheza o mahamba maseta athu, oso a di fiiala o iteka; u kôla-ze iú, enu mu nzambi jengi; enu oso diundenu bhu pholo iê.

⁸ Ziione kia kʼivu, u kala ni ngalasa, o ilumba ia Juda a sanguluka, mukonda eie Jihova ua batula mu kidi.

⁹ Kuma, eie Jihova, eie-muène ngó Suke-ku mu ngongo ioso, eie kujinga kué jinzambi joso ja xala bhoxi.

¹⁰ Enu mua zolo Jihova, ituxi i mi ibhile; muene u bhaka o mienhu ia jifiiele jê; hé u a kudila bhu maku a kisuéia.

¹¹ Mukengeji a u kuua, phala athu aiuka; o kusanguluka phala oso emana mixima nzanza.

¹² Sangulukenu mua Jihova, enu mua iukila mu njila iê; sakidilenu mu kuxinganeka o dijina diê dikola.