Jisálamu 84 - O Mikanda Ikola

O Kuinda O Tembulu ia Jihova

Ua Mesene Ngimba; mbimbi iê ia Ngitita. Mukumbi ua anʼâ Kola.

¹ Balaka ié Ngana, kuuabha kuahi, u Jihova dia ilômbo!

² Muenhu uami moxi uala ni hânji, ua-lu sota muene kusénduka, mu kuinda kukala mu lumbu lua Jihova; ni muẋima uami, ni xitu iami, ia dikola ni vondadi ia eie u Nzambi ia muenhu,

³ Katé ni kanjila ka sanga kididi kiê kia kukala, o phiáphia ua tungu kikalanga kiê bhua totuela anʼê, eme-phe, bhene bhu kalatódio ké u Jihova dia ilômbo, Sobha iami, Nzambi iami!

⁴ A lungu-â oso a tungu mʼonzo ié; a kala jinga mu ku ximana sé kuzumbuka. (Selah.)

⁵ Ua lungu muthu ió nguzu iê ia mu kala ko kué; uala ni muẋima ua ungenji mu kikoka kia Ziione.

⁶ Kuma kia bhita mu dikôlo dia kikaku mua kukuta, mu di bhanga kididi kia jifiẋi ja menha; mikáu iê i zuata kala bhu thembu ia kisonaxi.

⁷ Mu kuenda kuê ku tunda nguzu kuiza nguzu, katé kia bhixila; kuma ene oso a kala kiókio, a kà mona o pholo ia Nzambi mu Ziione.

⁸ Jihova, Nzambi ia ilômbo, ivua o musambu uami, bhana mátui, eie u Nzambi ia Jakobo!

⁹ Talesa-ze, Nzambi u ngubu ietu, tu tale Ngana! Mesu mé a kale jinge mu tala o pholo ia muthu ué ua mu undu ni maji.

¹⁰ Kuma kizuua kimoxi ku lumbu lué, kota, o midi ku bhata diengi, ndenge! Ngʼinda ngi kala ngi muthu ua kuimana ngó bhu muelu uaʼnzo ia Nzambi iami, ki ngʼindi kutunga ku mabhata ma akua phulu.

¹¹ Kuma Jihova Nzambi muene dikumbi dietu, ngubu ietu; Jihova u tu bhana kiadi ni ujitu; kana kima kiemina, athu enda ni muẋima uazele.

¹² Eie Jihova dia ilômbo, tata! Muthu ió u zediua, uoso ua ku dielela eie.