Jisálamu 65 - O Mikanda Ikola

Kusakidila O Jimbote Javulu Ja Nzambi

Ua Mesene Ngimba. Mukumbi, Muimbu, ua Davidi.

¹ Jiphèmbele ja ku xikamena mu Ziione, Ngana Nzambi; jipolomesa ji tokala a ji kumbidila ko kué.

² Eie u mukua kuívua o kusamba, ko kué kuene ku bhongolokela o xitu ioso.

³ Eme ki ngalʼiki, milonga ia ngi tundu; maji eie-phe ikuma ietu u i loloka.

⁴ U zediua muthu uoso eie ua mu solo, anga u mu bhiẋidisa kokué, phala nʼa tunge mu kithâdi kié; mbé tu ikute jinge ni jimboteʼojo ja dibhata dié, ja Tembulu ié ikôla.

⁵ Ima ia undanda, Ngana, i uene kubhanga mu kuitaia kué ni kidi kié, u Nzambi ietu ia kibhamuenhu; eie a ku dielela katé ku maẋokololo aʼxi, ni kua iá a takuka dikanga ku musanza.

⁶ Eie, Ngana, mu nguzu ié, ua bhake o milundu mu ididi, ua di kutu muene ni kutena.

⁷ Ua tena kubateka o kuzuma kua kalunga, o kuzuma kua mabhuku, ni ibulukutu ia ifuẋi kʼejiia Nzambi.

⁸ A tunga ku makanga a kala ni uoma ua isuma ié; ni ku tundilu dia dikumbi, ni ku tudilu, eie-muène u a bhana o kusanguluka.

⁹ Ixi u i zungila, u i tekela; u sueka jimbongo javulu mu mavu, mukonda dia ngiji ia Nzambi iezala menha; athu u a dikila ni masa, ki u zubha kukalakala ku mábhia.

¹⁰ U bhitisa menha mu jimbondongolo jê, u sokelesa kiambote o mibhanga; u i ombamesa ni mvula ni isanga, ni dibesá dié, i kuata kusabhuka.

¹¹ Muvu ua u te kitundu kia jimbote jé, mu njila mu ua bhitila u sonona ima ianete.

¹² Isonoka ni mu iangu mu dila ibhaku; tuthuthùlundu tu kemba ku mbandu joso.

¹³ Mikáu i fukuka ni ilunga ia jimbudi, ivuza i zuata ixina ia masa; ni mikáu ni jihonga kífua i di handekela, i tambujila kala iala mu kuimba.