Jisálamu 37 - O Mikanda Ikola

Athu Aiibha Azediua ngó Kakithangana

Mukumbi ua Davidi.

¹ Ku kale mu jiphata mukonda dia iá a bhanga kiaiibha; kuile uixi a lunguʼá akua kubhanga phulu,

² Mukonda kà nanga ku a sua kala iangu, anga a lela kala idima iauisu.

³ Dielela kua Jihova, enda ni kubhanga o mbote; phala u tunge ixi ienhiʼii, u kale u fiiele.

⁴ Ngalasa ié i tunde mu ku di tuma ni Jihova; muene u ku bhana ki ua solo mu muẋima.

⁵ Njila ié i uenda bhakula-iu kua Jihova, u mu dielele muene, a bhange-bhu kioso kia tokala.

⁶ Muene u idikiza o kidi kié kala muanha; kulunga kué ku moneka muene kala kumbi dia mediia.

⁷ Niohena kua Jihova, u mu kinge kimuanu; kana kulalama mukonda dia ió uedi kala ua mu zediuila mu njila iê iengi, u xinganeka jindunge jaiibha, anga uia muene ni ku ji bhanga.

⁸ Eie-phe, ku njinda tunda-ku, u ehe o kutema; kuma o kuthathamana ku ku bhangesa ngó kiaiibha.

⁹ Mukonda oso a bhanga ima iaiibha, a xikamena ku a batula bhoxi; oso-phe a kinga Jihova, ene a lundula ixi.

¹⁰ Bhu bhita ngó kathangana, mukua phulu-ó ubhua athu ku mesu; u tala kiambote, bhu kididi kiê kala-bhu dingi.

¹¹ Oso-phe alenduka, ene a lundula o ixi; A kala ku ngalasa ni kutululuka kuavulu.

¹² Mukua phulu u kanena ió mukua kidi; u mu kokotela muene ku mazu.

¹³ Maji Jihova-phe u mu olela, kuma ua mono o kizuua kiê ki kiza.

¹⁴ Akua phulu a fomona xibhata, oleka uta ua mufula, phala ku jikinisa o phulungu ni ngadiama, ni kujibha ió oso ala mu njila iaiuka.

¹⁵ Maji o xibhata iâ-phe, ia kà a bokona ku muẋima uâ-ene; o mata mâ ma mifula, ma kà bukujuka.

¹⁶ Kota kiatolo kiala na-kiu o muthu uaiuka; ku indi jimbongo javulu ja akua phulu a ndumba.

¹⁷ Kuma akua phulu ió, a kà bukuka o maku; Jihova-phe u fikidila athu ua a mono kuiuka.

¹⁸ Jihova uejiia o izuua ia athu a iuka; o undundu uâ u nangenena katé ku hádia ni hádia.

¹⁹ Ka kala ni jisonhi mu izuua iaiibha; o mu izuua ia nzala, ekutʼâ.

²⁰ Maji isuéia-phe i buila muene; jinguma ja Jihova a soka ni iẋinji ia túbhia; aia ni kujidila mu dixi, kindala a jimi.

²¹ Mukua phulu u sobha ngó, maji ka futu dingi; Uaiuka-phe izuua ioso u kuatela henda, u bhana.

²² Kuma oso a a lungisa kuala Jihova, ene a lundula ixi; oso a êlesa kuala Muene, a xikamena ku a batula-bhu.

²³ Makànda ma muthu uambote Jihova u a tambula konda; uendelu uê u mu uabhela.

²⁴ Né ua di bhale, ka di bhalelà-ku; kuma Jihova u mu kuata ni lukuaku luê.

²⁵ Tunde mu undenge, o kiki nga kuka; kiluua ngi mona mukua kidi a mu ehelela, mba mbutu iê ienda ni kubhinga jimola.

²⁶ Kumbi dioso u kuatela henda, u bindumuna akuâ atate, o mbutu iê i zediua kiengi.

²⁷ Ku ituxi tunde-ku, u bhange o mbote; u tunge kididi ni ku mululu ni ku mulaula.

²⁸ Kuma Jihova kia mu uabhela o kubatula mu kidi; a di tuma-nê ka ehelela, u a kondeka katé bhu kizuua. Maji o mbutu-phe ia akua kubhuma, a xikamena ku a batula-bhu.

²⁹ Ixi-phe i xalela ku athu iá aiuka, ene a i lundula, muene mua tunga, o thembu iâ ki ibhu.

³⁰ Dikanu dia muthu uaiuka di zuela uhete, maka ma kutetuluka ma mu kala bhu dimi.

³¹ Ngonge ia Nzambi ií ku muẋima uê; kana dikanda diê di xangumuka.

³² Ua bhukumuka u batamena iú uaiuka, u sota muene ndunge ia ku mu jibha.

³³ Jihova-phe ka mu ehela bhu maku mê; né ku mulonga, ka tena ku mu êlesa.

³⁴ Kinga kua Jihova, u kuate njila iê; muene u ku zangeleka kulundula ixi; kizuua ki batuka ió abhukumuka, eie u ki mona mesu.

³⁵ Nga muene kiá kisuéia ku kijingo kiavulu; u zanda muene kala kimuẋi kiakômo kia mono mavu.

³⁶ Maji, mu kubhita-bhu dingi, ki ngi mu sange-bhu; nga mu soto hanji, maji uendelela.

³⁷ Batekela o muthu u bhanga ima ia kidi, u tale kiambote uemana nzanza; kuma ku pholo kuia muthu ió, kuà kala kutululuka.

³⁸ Iá-phe a xibhaka, kibuika kiâ kimoxi kia kà fuila; ku pholo ku aia ió abhumu a kà jikinina.

³⁹ O kubhuluka-phe kua akua kidi, ku tunda kua Jihova; kuma muene kimbaka kiâ mu thembu ia jiphaxi.

⁴⁰ Jihova u a kuatekesa, u a kudila; u a kudila ku isuéia, hé u a bhulula, mukonda a lengela kua muene.