Jisálamu 35 - O Mikanda Ikola

O Kaxtiku ka Jinguma

Mukumbi ua Davidi.

¹ Fúnda o mulonga uami, eie u Jihova, ni iá u nga di kuata-nâ, bhânga, Ngana, ni iá ala kubhânga ni eme.

² Kuata o ngubu ni kadiakonda u imane mu ku ngi zokelela.

³ Zenga o dionga, ambela o muenhu uami, uixi: Eme-muène ngi Kibhamuenhu kié.

⁴ A lémbue-ku, a kale ni jisonhi, oso ala ku ngi seia o muenhu uami; a vutuke ni dima, a bhuuame, oso a bhindamena o ku ngi kuama.

⁵ A kale mukua ni ibhiate iala kuphephuluka ni kitembu; anjo ia Jihova aie ni ku a kaia.

⁶ Njila iâ i kale javundu, ia ẋanana; o anjo ia Jihova ende ni ku a landameka.

⁷ Kuma a ngi tela uanda ua ku ngi kuata; sumbala o mulonga u nga te ki u moneka; sé ngó kikuma, a ngi kandeia diela mu njila, phala kukuata o muenhu uami.

⁸ Enhó-phe kibuika kiâ a ki tukumuke; a fue muene mu uanda ua telele akuâ; a dibhale ene mu diela diâ dia kande.

⁹ Eme-phe muẋima uami u sangulukila mua Jihova; ngi tana, mukonda dia muene ku ngi bhulula.

¹⁰ Ngevu muene katé ni ifuba iami i ki tanga, kuma eie u Jihova ku moneka luiadi! Nanhi u soka-nê mu kubhulula ió uatâte, xi, ni phulungu ni ngadiama, kua ió a mesena o ku a bhûnda?

¹¹ Jimbangi ja isuéia ja balumuka; a ngi tatela ima ki nga ijiia ngó.

¹² Eme nga a bhange mbote, ene-phe a ngi vutuila phulu; muenhu uami a ngi tambula-u.

¹³ Ene-phe kia kexe mu kata, eme ngi zuata kidinhaji; ngi di bhinjika muene ni kujila o kúdia; ngi kala mu samba ni mútue uabhetama.

¹⁴ Ngʼila muene kala phange iami, mba kamba diami dia muẋima; ngi bhetamena bhoxi, ngʼenda muene ni kudila, kala muthu ua fundu mamʼâ.

¹⁵ Maji eme-phe bhu nga tâtela, ene kia a uabhela; a ngi bhongolokela muene kala athu engi; a bhindamena ku ngi dia ni ku ngi ẋuua-ẋuua, o kituxi ki nga te ki nga kʼijiia.

¹⁶ A xinga jindaka, a ngi sekalesa mu jifesa, a ngi kokotela muene ku mazu!

¹⁷ Eie-phe, Ngana, u tala ngó kienhiki katé bhebhi? Kudila o muenhu uami ku iama iii, muenhu uami umoxi-èlele kudila-u muʼaxaxi ka jihoje.

¹⁸ Phala ngi ku ximane mu kionge kia dikota; ngi ku sakidile bhua bhongoloka o mundu uavulu.

¹⁹ Kuehele jinguma jami ku ngʼolela uoua mu kingoho; a ngi zembe sé kikuma ka kale mu di jika-jika mesu, exi tua mu tobhesa.

²⁰ Kuma ene kene kuzuela ima ia kutululuka, a kanena ngó akuâ, athu a di xibhâ ku mabhata mâ.

²¹ A bhana muene mu kanu ni ku ngonesa, exi: Euá! euá! Etu tua ki mono muene ni mesuʼetu. U diuana!

²² Eie-phe ue ua ki mono, u Jihova, kana kudixibha; kana ku ngi kala dikanga, Ngana iami, tata!

²³ Phaphumuka, u balumuke mu ku ngi bhana o kulúnga; funda o mulonga uami, eie u Nzambi, Ngana iami.

²⁴ Ngi fundise, Jihova, u Nzambi iami, mu kidi kié ki uene na-kiu; enhó ka kale dingi mu ku ngi tobhesa.

²⁵ Ka kale dingi mu kuila ku miẋima iâ, exi: Euá! kienhókio! kienhókio! ka kale mu kuila: Tua mu minha muene!

²⁶ A kakuke, ene, a diuane, sonhi ja a kuatele kumoxi, oso a bhindamena ku ngi kuama; a kale ni jisonhi ni kusekala kala kizuatu, oso a di kaka mu ku ngi bhanga eme o phulu.

²⁷ Embe-phe, a dikole ni ngalasa, a sanguluke, oso a ngi bande ku mulonga uami; a kale jinge mu kuila: Jihova a tane-ku, ua zolo selevende iê, iu ua mu bhana o kulúnga!

²⁸ Kienhiki, eme bhabha, dimi diami di kuata mukumbi; ngi ximana jinga o kidi kiê, kumbi dioso dia kambamba, katé ku hádia ni hádia.