Jisabhu 9 - O Mikanda Ikola

Unjimu u bhanga Fesa iê

¹ Unjimu uatungu kiá onzo iê, iambata sambuadi dia ngunji.

² Ua jibha kiá ibhaku iê, o vinhu iê ua i lungu kiá bhuamoxi, ua zale kiá o meza mê.

³ Ua tumu tuhetu tuê kubhita ni kuambela athu, ni ku a exana tunde bhu thalʼèlele ia diembu, uixi:

⁴ Uoso uala sébhue, eze kunu kokuami. A kamba kilunji ua ambela, uixi:

⁵ Zenu, mudie ku mbolo iami, mu nue ku vinhu i nga lungisa kiambote phala enu.

⁶ O uoua ehenu-u mu mone muenhu, di tedienu mu njila ia kilunji!

⁷ Muthu uoso u sota kuiukisa o semenhi, ku mu iza dilebhu; ió uoso u bazela o muthu ua bhumu, u di bhekela jindaka.

⁸ Kana kubazela semenhi, phala muene ka ku zembe; se uambe kubazela, bazela-phe o njimu, muene ua-nda ku ku zola.

⁹ O njimu mu longe, muene ua-nda ku beta dingi kudimuka, muthu ua iuka mu tetulule, u mu mone kiʼaia ku pholo ni kutongoloka.

¹⁰ Mukonda o uoma ua Jihova diene o dimatekenu dia kuijiia; o unjimu uala mu kudijiia ni Ió Ukôla.

¹¹ Mbata ko kuamiʼeme kuene ku ua kà muena o kuvula kua izuua ié, hé a kà ku bandekezela-ku mivu ia muenhu.

¹² Eie se ukala u njimu, mbote ié eʼmuene i u bonga-ku; o ki u kala-phe u semenhi, eʼmuene ua di-bhange-kiu.

¹³ Muhatu ua dilaji-ze kavuanza kavula; muene u kala kiximba kia ngoho-phe, kʼejiia kima.

¹⁴ Uxikama ku kialu bhu muelu uaʼnzo iê, bhu thalʼèlele ia diembu,

¹⁵ phala kuenda ni kuixana oso ala kubhita, ió oso muene ala kuenda njila iâ, uixi:

¹⁶ Uoso kilalu, a tale kunu. A kambe kilunji u a ambela, uixi:

¹⁷ Menha ma kunhana ma touala kiengi, o mbolo ia kudia ni kusuama kuuabha kuahi ngó!

¹⁸ Maji muene-phe ka kʼijiia, kuila bhenhobho bhene bhua di lunjika o imbi; o asonhi a muhatu muenhó u a sanga oso bhu hole ia bombo dia kalunga.