Jisabhu 4 - O Mikanda Ikola

O Jimbote ji tunda mu kuijiia

¹ Enu anʼami ivenu ulongelu ua tatʼenu, jikulenu mátui mu tambule kilunji.

² Mukonda ngala ku mi sámbukisa ulongelu ua mbote; ngonge iami ki mu i bhane dikunda.

³ Mbata eme ue nga kexi ngi mona ni tatʼetu; ngi muzelembete, eme-muène ngó a ngi zola kua mamʼetu.

⁴ Muene anga u kuata ku ngi longa, uixi: Muẋima ué u kuate kiambote o maka mami; aiuka ijila iami, u mone muenhu.

⁵ Sota unjimu, sota ku tongoloka, o maka-phe ma tunda mu kanu diami ku a jimbe mba u a ta dikunda.

⁶ O unjimu ku u ehe, uene uende ni ku ku langa; zola-u, uene-phe ua kà ku kala kimbaka kié.

⁷ Kima kiala kota ku muenhu ua muthu o unjimu; sota-phe o unjimu ni kutongoloka; ima ioso i uavu bhana-iu muene mu kusota unjimu.

⁸ Zangeleka unjimu, unjimu u ku zangeleke; o ki u kuata, uene u ku muesa ujitu.

⁹ Unjimu ua-nda ku ku zuika kitundu kia kuzediua ku mútue uê; anga u ku bhana kijinga kia matunda.

¹⁰ Ivua, monʼami, u xikine ulongelu uami, phala mivu ia muenhu ué ivule.

¹¹ Mu njila ia unjimu mune mu nga ku longela; nga ku kutukisa mu njila ja muenhu.

¹² Mu kuila-mu, makanda mé ma dixala kiambote; o ki uila ngi lenga lusolo, ku tena ku di bhukana.

¹³ O ulongelu ua ku kubazela, ku uehe; lunda-u muene, kuma uene o muenhu ué.

¹⁴ Kana kuẋikina ku ila mu phangu ia iala iabhumu; kana kubhita mu njila ia akua ituxi.

¹⁵ Mu njila iâ tunda-mu; ku bhite-mu, kondolokela kuengi, u bhite dikanga.

¹⁶ Kiene kialʼokio, kaii ku kilu, se ka bhange phulu; o kia kamba ku luezesa muthu mu njila jê, kilu ki a lenga mu mesu.

¹⁷ A kaka mu kudia mbolo ia ngene, anua vinhu ia kubhunda.

¹⁸ Maji o njila ia athu a iuka-phe i di bhanga mukua ni mukengeji ua kimene, uia ni ku di bandekeza mu kuzela katé kuma ki ku zubha o kúkia.

¹⁹ O njila-phe ia akua kubhanga kiaiibha mukua ni usuku-ua-nzumba; a di bhukana ku kima, maji ka kʼijiia mba kima kiahi.

²⁰ Eie monʼami, suua maka mami, bhana mátui ku ioso i ngala ku ku longa.

²¹ Maba u ngala ku ku longa ka ku bhue ku mesu; lunda-u muene muʼaxaxe ka muẋima ué.

²² Kuma a di bhanga muenhu kua ió oso a di bonga-nâ, ene o kudisanza kua mukutu uâ.

²³ Ku ioso ia fuama ku langa, langa o muẋima ué, kuma mu muẋima muene muala o dimatekenu dia matundilu moso ma muenhu.

²⁴ Ambula o kuzuela kua ibhengèle; o phekalu i tanga mizumbu, ehaiu.

²⁵ Mesu mé a tale muene ku pholo, o ibhebhetelu ié lungisa-iu muene kiambote mu njila.

²⁶ Hoka i u bhita, dianga ku i xinganeka kiambote; o jinjila jé joso ji ku kale ja uhete!

²⁷ Kana ku kuata uendelu ua ku takujuka ngó, né ku dilu mba ku kiasu; o kinama kié sondolola-kiu mu kubhanga phulu.