Jisabhu 3 - O Mikanda Ikola

Jikoseliu phala Minzangala ia Mala

¹ Monʼami, ngonge iami ku i jimbe, o muẋima ué ubhake ijila iami.

² Kuma iene ia-nda ku ku vudisa o izuua ié; i ku bandekezela mivu ia muenhu ni kutululuka.

³ O mbote ni kidi kanaku i jimba; kutila-iu muene mu xingu ié, soneka-iu ku dibaia dia muẋima ué.

⁴ Bhene-phe ua-nda kumena o kiadi ni diximanu ku mesu ma Nzambi ni ku athu.

⁵ Dielela kua Jihova ni muẋima ué uoso; kana kudielela ngó o kilunji kié

⁶ Mu suue muene ngó mu mauendelu mé moso, muene a iukise o njila jé joso.

⁷ Ku di-mone unjimu ku mesu mé eʼmuene; ku phulu tunda-ku, u xile Jihova,

⁸ ienhiʼii iene o milongo phala o ngombo ié, uene o uôngo phala o ifuba ié.

⁹ Jihova mu jingise ni ima ioso i uala na-iu; mu bhane ku jisamba-tènde ja ima ioso ia kumona kué.

¹⁰ Kienhiki-phe o itula ié ia-nda kuizala kinéne ni tiliku, o matangi mé anga ma ẋamujuka ni maluvu.

¹¹ Monʼami o kulonga kua Ngana ki ku ku kuate usudi; muene kia ku bazela, eie ki ki ku ibhile.

¹² Kuma Ngana, uoso ua mu zola u mu longa; mukua ni tata kia longa mona uosoʼa mu indila kumona mbote.

¹³ Uazediua o muthu uoso ua bongo o unjimu, ni muthu uoso ua tambula o kuijiia.

¹⁴ Kuma o muenhú uenji uê kota, o uenji ua phalata ndenge; o dibhandulukilu diê kota, o ulu ua fina-fina ndenge.

¹⁵ O suilu iê kota mu kuta, madiiamande ndenge; ima ioso i uindʼoio ki i xikina ku i sokesa ni diene.

¹⁶ Ku lukuaku luê lua kadilu kuala dibandekezu dia izuua, o ku lukuaku luê lua kiasu maunvama ni kijingu.

¹⁷ Jihoka jê jihoka ja malau, o jinjila jê joso jinjila ja kutululuka.

¹⁸ Oso a u kuata, a bongo muxi ua muenhu; azediua athu oso a u jijila.

¹⁹ Katé Jihova muene, ixi ua i bhange ni unjimu, o diulu ua di iudika ni kuijiia kuê.

²⁰ O mu kuijiia kuê muene mua jikukila o majiia ni makôlo; anga o matuta ma suka mbundu.

²¹ Monʼami ima ienhiʼii ki i kubhue ku mesu; lunda o unjimu ua kidi, ni kukala ni kilunji kiambote.

²² Kuma iene i kala muenhu phala o nzumbi ié, i di-bhanga makembu ambote phala o xingu iê.

²³ Kienhokio-phe njila ioso i uenda, ua-nda ku i enda ni kudielela sè hele, o kinama kié ki kia-nda ku dibhukana.

²⁴ O kioso ki u zeka, uzeka muene sè uoma; kidi-ze, u nhoha muene, o kilu kié kʼila muene nzué!

²⁵ Ku kala ni kekenha, ia kima kiaiibha kiza mu lusolo, né-mbe kuiza o kibuika kia athu a bhumu.

²⁶ Mbata eie, o Jihova muene o dixamenenu dié; muene u langa inama ié phala kufue bhu ngoji.

²⁷ Muthu uoso ua tokala ku mu bhanga mbote, eie kufule ku mu bhanga-iu se o lukuaku lué luala ni kutena kua ku ki bhanga.

²⁸ Mukuenu kana ku mu ila: Ndé, hanji, mungu uize, ngi ku bhane kiua; se o kiene uala na-kiu kiá kindala.

²⁹ Mukuenu kana ku mu xinganeka ima iaiibha ku muẋima, mukonda ki ua tungu-nêʼ okio, ua ku dielela.

³⁰ Kana kuzoka ni muthu ka ku bhange kima; o ku zoka ni mukuenu kale ua ku bange kima kiaiibha.

³¹ Ku kale ni luimbi lua kiiala kia hame; kana ku sola hoka iosoioso ia tokala ku mauendelu mê.

³² Kuma Ngana ua di-zemba ni athu abhukumuka, maji o kikutu kiê u ki jituina athu oso aiuka muẋima.

³³ Mázui ma Jihova u ma sanga mʼonzo ia athu a bhumu; maji o dibesá diê diala ku dibhata dia athu aiuka.

³⁴ Kutanga kidi, o jisemenhi muene ue u a bhanga kasekelelu; u bhana-phe kiadi kua oso a talamana.

³⁵ Jinjimu à lundula kijingu; maji o iôua-phe à di bongesa malebhu.