Jisabhu 24 - O Mikanda Ikola

¹ Ku kale ni dixinga dia akua-phulu, kuinde ue kukala-nâ bhuamoxi.

² Mukonda o muẋima uâ ufunha usuéia, o mizumbu iâ i tanga isunji.

³ Kutunga dibhata unjimu u u kala na-u, kiu ta-bhu masunga-phe dibhata ua di fikidila.

⁴ O kuijiia kuene kuizalesa jinzo ni ima ioso ia mbote, ia te kiavulu, iene mu ku inda o muthu.

⁵ Kuma, o njimu dizonda; o muthu ua di longo kiavulu iu ua zubha, kusuina kuê kuia ni ku di bandekeza.

⁶ Mukonda kúlua o ita, ku tunda ku jiphangu ni ikutu ia sunguluka; o bhua bhongoloka nzungule ia jinjimu, bhu tunda kikóue.

⁷ Semenhi-phe unjimu uoso ua mu kala bhua lebha; o kieza bhu telelu mu kufunda, katena kujikula dikanu.

⁸ Muthu uoso uate muẋima mu kubhanga o phulu, a mu luka exi mesene ia ixinganeku iabolo.

⁹ O kiôua, kubanza kuê ngó, kituxi kiene; o Semenhi, u kuata kulongolola, athu oso a mu zemba.

¹⁰ Bhu kizuua kia phaxi, se u beleketa, kuabhu, ni nguzu ié itola.

¹¹ Se ua mono nguzu ia ku ki bhanga, kudila athu oso a a xindi kuia muʼalunga, ni ió oso a ambata phala ku a jibha.

¹² O ki uila uixi: Manhì diâ! manhi ió mukua kutala o miẋima, kanda ku ki bhanga konda? Ió mukua kulonda o muenhu ué, ka-nda ku kʼijiia? manhi muene muthu kioso ki a bhanga ki kiene kia mu vutuila?

¹³ Diá uiki, monʼami, kuma u bhana kudisanza; udia kixila kia uiki, mukonda kiene kiatouala mu kanu.

¹⁴ Kienephe ki touala ue o unjimu mu muenhu ué, se ua di longa-u; se ua u kuata, ua-nda ku ku xila kuzediua, o bhuoso bhu ua jika muẋima ka ku kakula-bhu.

¹⁵ Eie u muthu ua bhumu, kana ku batamena ku dibhata dia muthu ua iuka, o kididi kiê bhua kondamena eie ku ki sekalese.

¹⁶ Kuma o muthu ua iuka, né ua di bhale lusambuadi, ubalumuka; maji athu abhumu-phe, à ka jikinina mu kibuika.

¹⁷ Kioso ki di bhala nguma ié, eie ku sanguluke; o kia di bhukana, muẋima ué ki u tane.

¹⁸ Jihova ua vula ku ki mona, anga ki mu ibhila ku mesu mé, anga njinda iê u i zumbula kua ió.

¹⁹ Ku kale mu jiphata, ki u mona athu ala kubhanga o phulu; kukale ni dixinga dia athu a bhumu.

²⁰ Mbata o muthu ua bhumu, ka kà mona futu ia kima; o muanga ua akua phulu, ua kà jima.

²¹ Eie, monʼami, xila Jihova, ni muenexi ue mu xile; kana kubhangana kumoxi ni akua kulungujuka.

²² Mukonda o kibuika kiâ, kila ngó lundumuku! O kusekala kuâ, nanhi u tena ku ku ijiia?

²³ Jiji ue jene o jisabhu ja jingijiie; exi: O kukala ni katungu ka athu bhu kibhuna kia kufundisa milonga, koko kuzanga.

²⁴ Uoso uambela o kisuéia kuma: Eie ua lungu, mundu u mu tanga ikuma, o miji ioso i mu dila hunji.

²⁵ Maji oso-phe a mu bazela, a kà a ximana; enhó à kala ni nzungule ia jimbote ku thandu diâ.

²⁶ Muthu u batula kiambote mu kuzuela, mukua ni iú ua bhana nzóbole ku mizumbu ia muthu.

²⁷ Dianga ku bhanga o ima ioso ku kanga, dianga ue ku polondala o midimu ié ku mábhia mu mukáu, kiene kiua ki u tunga o inzo phala dibhata.

²⁸ Kana ku di xikina umbangi ua ku kundula mukuenu, bhua kambe kikuma; kifua eie uandala mizumbu ié u i bhitisa mu makutu?

²⁹ Kana kuila, uixi: Kioso kia ngi bhange muene, eme ue kiene ki nga-nda ku mu bhanga, mukonda kala muthu ngi mu vutuila kiafuama mu ima ioso ia ikalakalu iê.

³⁰ Ngʼele ku díbhia kua dimina o kimonha, eme nga bhiti kuzongola kʼóbhia dia mivide dia muthu ua kambe o kilunji,

³¹ talesa-ze nga sange díbhia dioso dia koboka mu minha, o kibende kioso kia takana ni kasau-sau, o lumbo luê lua matadi lua lundumukina bhoxi.

³² O ki nga ki mono, nga sunga-bhu kilunji, o ki nga kiʼedi suí, nga tambulaku disá.

³³ Kuma eie ua uabhela o kuila: ngi zeka-ku kakilu, ngi zendalala-ku hanji bhuofele, ngi bunjike maku ngi zeke-ku dingi.

³⁴ Utukumuka-phe uadiama ua kuiza kala kifumbe kia ku batuila; o kubhindama kua ku tula kala a ku kondela kuala kiiala kia nguzu kia maneka.