Jisabhu 2 - O Mikanda Ikola

O uuabhelu ua Unjimu ni ditûndilu diê

¹ Monʼami, se u xikina maka mami, anga u kondeka o jingonge jami mu muẋima ué,

² phala ute mátui mé ku unjimu, ni ku lungisa muẋima ué mu kubatekela;

³ se u di ta mutendu mu sota o kuijiia, anga u suinisa dizui dié mu sota o kutongoloka,

⁴ se u sota o kutetuluka kala kia sota phalata, anga u sota ni muanu kala kia sota jimbongo jʼòsueke,

⁵ eie-phe ua-nda kuijiia uoma ua Jihova, anga u dʼijiia kiambote ni Nzambi.

⁶ Kuma Jihova muene u bhana o unjimu; o mu kanu diê muene mu tunda o kuijiia, muene mu tunda o kilunji.

⁷ O unjimu ua kidi muene ua u lundila oso emana mixima nzanza; Nzambi iene o ngubu i xitila oso enda mu kuiuka.

⁸ Phala kufikidila o jihoka ja ubatuilu uambote; o njila ia athu ê angene u i tambula konda.

⁹ Bhenhobho-phe eie ua-nda kuijiia kioso ki kala o kuiuka, ni ki kala o kilunji, ni ki kala o kufundisa kua kidi; ni jinjila joso ja fuama.

¹⁰ Mukonda o unjimu ua-nda kubokona mu muẋima ué, o kuijiia anga kuuabhesa o muenhu ué.

¹¹ O kilunji kiambote-phe kia-nda ku ku bhaka, o kutongoloka kua-nda ku ku kondejeka muene;

¹² mbé o ku ku ebhesa o njila ia ibhʼoio, ni ku ku kudila ku muthu u zuela isunji,

¹³ o athu ió a xia ikoka ia kuimana mixima nzanza, nʼa kuata o kuenda mu jinjila ja kitombe;

¹⁴ athu a sangulukila o ku bhanga o phulu, anga atanena o ubalukutu ua akua kubhanga kiaiibha.

¹⁵ Athu edi o ikoka iâ ienda jihonda joso ni ibhèngele; o kuenda kuâ, iá ku pholo, iá ku dima!

¹⁶ Mbé ku ku kudila ku muhatu ua ngene ni ku muhatu uengi mukuaʼxi ia dikanga u bhomba ni izuelu iê;

¹⁷ o muhatu u xa diiala dia undenge uê, anga o kikutu kia Nzambi iê u ki jimba.

¹⁸ Mbata onzo iê i bhekesa kalunga, o jinjila jê ji bheka mu bombo dia madifundu.

¹⁹ Oso a kutuka mu njila ja muene, ka tena dingi ku sukunuka-mu; jihoka jiia ku muenhu a lémbua ku ji bonga.

²⁰ A ku dimuna-phe, phala eie u di tele mu njila ia athu a mbote, u aluke o jihoka ja athu aiuka.

²¹ Kuma athu ambote ene a kà tunga mu ngongo, oso aiuka muẋima a kà nangenena muenhomo.

²² Maji akua-phulu mu ngongo a kà a buikisa-mu, o ibalukutu a kà a vuza-mu muene.